Be Biblu Gán Gọalọna We Nado Jo Amasin Adínọ Ṣiṣizan Do Ya?
To whemẹwhemẹ, gbẹtọ livi susu lẹ wẹ nọ kú na amasin adínọ wunmẹ voovo lẹ wutu. Ninọmẹ lọ tlẹ wá vantan dogọ to ojlẹ azọ̀nylankan COVID-19 tọn ehe mẹ. Nuyọnẹn he to Biblu mẹ lẹ ko gọalọna mẹsusu nado jo amasin adínọ ṣiṣizan do. E gán gọalọna hiẹ lọsu, eyin a to pipehẹ nuhahun ehe. a
To hosọ ehe mẹ
Naegbọn a dona dín alọgọ to Biblu mẹ nado jo amasin adínọ ṣiṣizan do?
Ayinamẹ Biblu tọn ẹnẹ delẹ he na gọalọna we nado jo amasin adínọ ṣiṣizan do
Wefọ Biblu tọn he gán gọalọna we nado jo amasin adínọ ṣiṣizan do lẹ
Otàn jọnun devo lẹ: Duduto amasin adínọ ṣiṣizan ji po alọgọ Biblu tọn po
Be Biblu jẹagọdo dotowhé yìyì nado jo amasin adínọ ṣiṣizan do wẹ ya?
Be Biblu gbẹ́ dọ mí ma dona yí amasin adínọ zan do penukundo mẹhe to azọ̀njẹ go wẹ ya?
Naegbọn a dona dín alọgọ to Biblu mẹ nado jo amasin adínọ ṣiṣizan do?
Dodinnanutọ lẹ doayi e go dọ mẹlẹ nọ wá peve to amasin adínọ zinzan mẹ na yé nọ to ṣokẹdẹ bosọ nọ hanú, apọ̀ nọ ṣì yé, podọ na yé nọ jẹflumẹ wutu. Biblu gán gọalọna we bọ a na do yise he sin hudo a do nado duto nuhahun he gán zọ́n bọ a na ṣì amasin adínọ zan lẹ ji. Biblu sọ dọ lehe a gán jihọntọn hẹ Jiwheyẹwhe do. (Salmu lẹ 25:14) E gán gọalọna we nado duto nuhahun he taidi nuhe ji a ma gán dù te na dewe lẹ ji.—Malku 11:22-24.
Ayinamẹ Biblu tọn ẹnẹ delẹ he na gọalọna we nado jo amasin adínọ ṣiṣizan do
1. Yọ́n Jehovah Jiwheyẹwhe. b (Johanu 17:3) Ewọ wẹ Mẹdatọ lọ podọ Asisa huhlọn madodogbó tọn. Gbọnvona enẹ, ewọ wẹ Otọ́ owanyinọ olọn mẹ tọn towe. E jlo na jihọntọn vivẹ́ hẹ we bosọ jlo na zan huhlọn etọn do ota towe mẹ. (Isaia 40:29-31; Jakọbu 4:8) E dopà nado na we sọgodo dagbe de, eyin a de nado duvivi owanyi etọn tọn.—Jelemia 29:11; Johanu 3:16.
2. Biọ Jehovah dọ ni gọalọna we. Hodẹ̀ hlan Jiwheyẹwhe dọ ni gọalọna we nado duto aṣa he mẹ a ko peve te lọ ji, na a nido lẹzun omẹ “wiwe, he yin alọkẹyi na [ẹn].” (Lomunu lẹ 12:1) Jiwheyẹwhe na zan gbigbọ wiwe he yin huhlọn-yido-wazọ́n etọn do na we “huhlọn he hú jọwamọ tọn.” (2 Kọlintinu lẹ 4:7; Luku 11:13) Huhlọn he Jiwheyẹwhe na na we lọ na gọalọna we nado jo amasin adínọ ṣiṣizan do bo wleawuna “gbẹtọ-yinyin yọyọ lọ” he nọ hẹn homẹ etọn hùn.—Kolosinu lẹ 3:9, 10.
3. Nọ hẹn linlẹn Jiwheyẹwhe tọn lẹ do ayiha mẹ. (Isaia 55:9) Jiwheyẹwhe na gọalọna we nado “to huhlọn mẹwhinwhàn apọ̀nmẹ tọn [towe] hẹn jẹ yọyọ” kavi nado diọ lehe a nọ lẹnnupọndo, na mọwiwà na zọ́n bọ a na jo amasin adínọ ṣiṣizan do. (Efesunu lẹ 4:23) Biblu mẹ wẹ mí nọ mọ linlẹn Jiwheyẹwhe tọn lẹ te, podọ nujọnu taun wẹ dọ a ni nọ hia ẹ to gbesisọ mẹ. (Salmu lẹ 1:1-3) Mẹsusu ko mọaleyi to whenue yé biọ alọgọ nado mọnukunnujẹ nuhe Biblu plọnmẹ lẹ mẹ. (Owalọ lẹ 8:30, 31) Kunnudetọ Jehovah tọn lẹ do tito hodọdopọ sinai do Biblu ji tọn vọnu de. Mí sọ jlo dọ a ni wá opli mítọn lẹ, fie mí nọ dọhodo nuhe Biblu dọ lẹ gọna lehe mí gán yí yé do yizan mẹ do ji te.
4. De ogbẹ́ dagbe lẹ. Mẹhe a nọ dogbẹ́ hẹ lẹ gán hẹn ẹn bọawu kavi hẹn ẹn vẹawuna we nado jo amasin adínọ ṣiṣizan do. (Howhinwhẹn lẹ 13:20) Jiwheyẹwhe nọ namẹ họntọn dagbe lẹ to mẹhe nọ sẹ̀n ẹn lẹ ṣẹnṣẹn, podọ e jlo dọ a ni jihọntọn hẹ yé. (Salmu lẹ 119:63; Lomunu lẹ 1:12) Nọ pọ́n ayidedai do de, na e nọ taidi dọ yè to gbẹdo hẹ nuhe yè nọ pọ́n, nọ dotó kavi nọ hia lẹ wẹ nkọ wutu. Dapana nudepope he na zọ́n bọ e na vẹawuna we nado wà nuhe sọgbe.—Salmu lẹ 101:3; Amọsi 5:14.
Wefọ Biblu tọn he gán gọalọna we nado jo amasin adínọ ṣiṣizan do lẹ
Salmu lẹ 27:10: “Eyin otọ́ ṣie po onọ̀ ṣie po tlẹ gbẹ́ mi dai, Jehovah uwọ na yí mi.”
“N’ma yọ́n baba ṣie paali, ehe zọ́n bọ n’nọ mọ ’vọ́ mẹ na dee. Amọ́, whenue n’wá yọnẹn dọ Jehovah Jiwheyẹwhe tin nugbo bosọ yiwanna mi, linlẹn ṣie gando gbẹninọ go diọ bọ n’penugo nado duto aṣa he mẹ n’peve te lọ ji.”—Wilby he wá sọn Haïti.
Salmu lẹ 50:15: “Dawhá ylọ mi to ojlẹ ayimajai tọn mẹ. Yẹn na whlẹn we.”
“Whlasusu wẹ wefọ ehe ko na mi huhlọn nado to vivẹnudo nado jo amasin adínọ ṣiṣizan do, etlẹ yin whenue n’gboawupo. N’mọdọ Jehovah hẹn opà etọn di.”—Serhiy he wá sọn Ukraine.
Howhinwhẹn lẹ 3:5, 6: “Nọ yí ahun towe lẹpo do dejido Jehovah go, bo ma nọ ganjẹ nukunnumọjẹnumẹ towe titi go blo. Nọ hẹn ewọ do ayiha mẹ to nuhe wà a te lẹpo mẹ, ewọ nasọ jlọ ali towe lẹ.”
“Wefọ ehelẹ ko gọalọna mi nado nọ dejido Jehovah go, kakati nido yin do dee go. Huhlọn he Jehovah na mi zọ́n bọ n’diọ gbẹzan ṣie pete.”—Michele he wá sọn Italie.
Isaia 41:10: “A dibu blo, na yẹn tin hẹ we. A yin magbọjẹnọ blo, na yẹn wẹ Jiwheyẹwhe towe. Yẹn na hẹn we lodo, mọwẹ, n’na gọalọna we, na nugbo tọn, n’na yí adusilọ dodowiwa tọn ṣie do hẹn gowe gligli.”
“N’jiya apọṣimẹ sinsinyẹn tọn whenue n’ma mọ amasin adínọ he n’na zan. Amọ́, wefọ ehe gọalọna mi nado mọdọ Jiwheyẹwhe na gọalọna mi nado duto apọṣimẹ lọ ji.”—Andy he wá sọn Afrique du Sud.
1 Kọlintinu lẹ 15:33: “Yè klọ mì blo. Gbẹdido ylankan lẹ nọ hẹn walọ dagbe lẹ gble.”
“Ogbẹ́ ylankan lẹ wẹ do alọ amasin adínọ tọn hia mi, podọ n’wá peve to e mẹ. Whenue n’gbà-gbẹ́ yetọn bo jẹ gbẹdo hẹ mẹhe do walọ dagbe bọ n’yiwanna lẹ ji wẹ e wá pà mi nado jo aṣa enẹ do.”—Isaac he wá sọn Kenya.
2 Kọlintinu lẹ 7:1: “Mì gbọ mí ni klọ́ míde wé sọn hẹnflu agbasalan tọn podọ gbigbọ tọn lẹpo mẹ.”
“Hogbe enẹlẹ gọalọna mi nado zindonukọn bo to vivẹnudo nado hẹn agbasa ṣie do wiweji bosọ jo amasin adínọ he to nuhẹngble to go e do.”—Rosa he wá sọn Colombie.
Filipinu lẹ 4:13: “To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.”
“N’yọnẹn dọ huhlọn ṣie kẹdẹ ma ko pé nado jo amasin adínọ ṣiṣizan do, enẹwutu n’họdẹ̀ dọ Jiwheyẹwhe ni gọalọna mi. E ka sọ na mi huhlọn he sin hudo n’do lọ.”—Patrizia he wá sọn Italie.
Otàn jọnun devo lẹ: Duduto amasin adínọ ṣiṣizan ji po alọgọ Biblu tọn po
Joseph Ehrenbogen whẹ́n to fie danuwiwa sù te, podọ e wá peve to ahàn sinsinyẹn po azọ̀-nùnù po mẹ bosọ nọ zan marijuana po heroïne po. Whlasusu wẹ e ko dibla kú na e zan amasin adínọ zẹjlẹgo wutu. Wefọ Biblu tọn de wẹ gọalọna ẹn nado mọdọ e sọgan jo aṣa enẹ do. Hia otàn etọn to hosọ lọ “N’Plọn Nado Nọ Na Sisi Dee po Yọnnu lẹ Po” mẹ.
Whlasusu wẹ Dmitry Korshunov tẹnpọn nado jo ahàn sinsinyẹn ṣiṣizan do whẹpo e do pà ẹ. Pọ́n video lọ ‘Gbẹzan Ṣie Wá Ṣì Mi Pete’ nado mọ nuhe zọ́n bọ e pà ẹ.
Be Biblu jẹagọdo dotowhé yìyì nado jo amasin adínọ ṣiṣizan do wẹ ya?
Paali. Biblu dọ dọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ.” (Matiu 9:12) Mọdopolọ, Azọ́nwhe He Nọ Penukundo Whẹho Amasin Adínọ Ṣiṣizan Tọn Go to États-Unis dọ dọ: “Azọ̀n sinsinyẹn de wẹ amasin adínọ ṣiṣizan yin, podọ nue e nọ biọ to mẹde si nado jo aṣa enẹ do zẹ̀ ojlo lọ nado doalọtena ẹn poun go.” Na nugbo tọn, alọgọ he Jiwheyẹwhe nọ na mí nọ zẹ̀ nue mílọsu gán wà go. Etomọṣo, susu to mẹhe ayinamẹ Biblu tọn lẹ ko gọalọna nado jo amasin adínọ ṣiṣizan do lẹ mẹ gbẹ́ do hudo nukunpedomẹgo dotowhé tọn. c Di apajlẹ, dawe de he nọ yin Allen dọ dọ: “E ma bọawuna mi paali whenue n’jlo na jo ahàn sinsinyẹn nùnù do, n’mọ awufiẹsa taun. N’wá mọdọ n’do hudo alọgọ doto tọn gbọnvona alọgọ he n’to mimọ sọn Biblu mẹ.”
Be Biblu gbẹ́ dọ mí ma dona yí amasin adínọ zan do penukundo mẹhe to azọ̀njẹ go wẹ ya?
Paali. Biblu tlẹ dọho gando ahàn sinsinyẹn yiyizan nado penukundo mẹhe to azọ̀njẹ de go, podọ nado yí i do de awufiẹsa mẹhe jlo na kú de tọn pò. (Howhinwhẹn lẹ 31:6; 1 Timoti 5:23) Amọ́, dile yè gán nùahàn sinsinyẹn zejlẹgo do, mọ wẹ yè gán sọ peve to amasin adínọ he nọ de agbasa vivẹ́ pò lẹ zinzan mẹ do niyẹn. Enẹwutu, nuyọnẹnnu taun wẹ e yin nado doayi owù he to amasin he nọ de agbasa vivẹ́ pò lẹ mẹ go bosọ nọ nọ̀ aṣeji gando lehe mí nọ zan yé do go.—Howhinwhẹn lẹ 22:3.
a Dile etlẹ yindọ hosọ ehe dọhodo lehe mẹde gán jo amasin adínọ ṣiṣizan do ji, ayinamẹ Biblu tọn he to e mẹ lẹ gán gọalọna mẹhe to pipehẹ nuhahun devo lẹ taidi, ahànnunu zẹjlẹgo, azọ̀-nùnù, núdùdù zẹjlẹgo, akọhiho, yẹdide po video gblewa tọn lẹ po pinpọn gọna mẹhe nọ ṣì nọtẹn gbẹdido Intẹnẹt ji tọn zan lẹ.
b Jehovah wẹ oyín Jiwheyẹwhe tọn. (Salmu lẹ 83:18) Hia hosọ lọ “Mẹnu Wẹ Yin Jehovah?”
c Fie yè gán mọ nukunpedomẹgo yí te lẹ, dotowhé lẹ po ofi mọnkọ susu devo lẹ po gán gọalọ nado jẹgangan. Mẹdopodopo dona yí sọwhiwhe do lẹnnupọndo aliho nukunpedomẹgo tọn he tin-to-aimẹ lẹ ji bo de dehe na yọ́n na ẹn hugan.—Howhinwhẹn lẹ 14:15.
A Gán Sọ Pọ́n Hosọ Ehelẹ
HOSỌ DEVO LẸ
Nuhe Nọ Do Lẹnpọn Na Sunnu lẹ—Lehe Biblu Gán Gọalọ Do
Nuhiha yin nuhahun he fọ́n bo to agayi to ojlẹ awusinyẹn tọn he vẹawu nado pehẹ ehelẹ mẹ. Eyin nude to lẹnpọn do na we, be Biblu gán gọalọna we ya?
ATỌ̀HỌ̀-NUHIHỌ́ LỌ TỌN
Etẹwẹ A Gán Wà Na Jiwheyẹwhe Nido Nọ Sè Odẹ̀ Towe?
A gán hodẹ̀ daga kavi hodẹ̀ do homẹ to fidepope podọ to gàn depope mẹ. Jesu tlẹ plọn mí nue mí gán nọ dọ.
HOSỌ DEVO LẸ
Nuhe A Gán Wà Ma Nado Nọ Nùahàn Sinsinyẹn Zẹjlẹgo?
Ayinamẹ atọ́n delẹ he gán gọalọna we nado nọ nùahàn sinsinyẹn do jlẹkaji, etlẹ yin to ojlẹ sinsinyẹn lẹ mẹ.
YỌ́N MÍ DOGỌ
Biọ Dọ Kunnudetọ de Ni Wá Dla We Pọ́n
Dọhodo kanbiọ sinai do Biblu ji de ji, kavi plọnnu dogọ gando Kunnudetọ Jehovah tọn lẹ go.
