3 Naegbɔ̌n Mɛɖagbe lɛ Nɔ Jiya?
Nuxewutu Mǐ Ðóná Nyɔ́ Gblɔndó Lɔ
É nɔ vɛna mǐ nadó mɔɖɔ mɛɖagbe lɛ nɔ jiya. Mɛsusu nɔ wá mɔɖɔ ɖagbewiwa ma ɖoale.
Lɛnnukpɔ́ndó Exe Ji
Mɛɖélɛ yise ɖɔ gbɛtɔvi lɛ nɔ kú bo nɔ wá nyí vivɔji hwlasusu. Yé nɔ ɖɔ ɖɔ mɛxe wà ɖagbe lɛ nɔ nyí vivɔji nadó wá ɖugbɛ bɔ mɛxe wà nuylankan lɛ nɔ nyí vivɔji nadó jiya. Exe zɛɛmɛdó ɖɔ mɛxe tlɛ to ɖagbe wà todin gán wá jiya, enyí é ko cì nudelɛ wà to hwenue é nɔgbɛ̀ wayi. Amɔ́ . . .
-
Ðagbe tɛ́wɛ to é mɛ, enyí mɛxe to yaji lɔ ma tlɛ gán flinɖɔ emi ko cì nudelɛ wà wayi?
-
Be é ma nyí nulunu wɛ é nyí ɖɔ mǐ ni nɔ jɛtukla nadó nɔ ganji bo nɔ dakpana asidan lɛ to hwenue é nyiɖɔ nuɖékpókpé wɛ gán jɔ dó mǐ go, ná nǔxe mǐ ko ciwà wayi lɛ wutu ya?
DINDONÁ DOGƆ
Kpɔ́n video lɔ Naegbɔ̌n Jixwéyɛxwe Do Jotɛnna Yajiji? to jw.org jí.
Nuhe Biblu Ðɔ
Oyà mǐtɔn ma sɔ́n Jixwéyɛxwe go.
Kakatimɔ, kosɔ lɔsu nɔ zɔ́n to ninɔmɛ susu mɛ, é gán nyiɖɔ mɛɖé to fixe nuylankan ná jɔ te to ojlɛ̌ xe mɛ é ma ɖóná to finɛ.
“É ma nyí awuyatɔ lɛ wɛ nɔ ɖuto wezundidó jí to hwekpókponu, kavǐ xuhlɔnnɔ lɛ to avùn jí, kpóɖɔ é ma nyí nunywɛtɔ lɛ wɛ nɔ tindó núdùdù to hwekpókponu, kpóɖɔ é ma nyí mɛxe tindó zinzin lɛ wɛ nɔ jɛ adɔkun to hwekpókponu, mɔ̌jánwɛ é ma nyí mɛxe tindó onywɛ lɛ wɛ nɔ tindó kɔɖetɔn ɖagbe to hwekpókponu, ná yemɛkpó jí wɛ ojlɛ̌ kpó kosɔ kpó nɔ wá.”—YƐHWEXOÐƆTƆ 9:11.
Ylandó xe mǐ ɖugu etɔn sɔ́ nɔ hɛn yajiji wá.
Mɛlɛ nɔ zán xogbe lɔ “ylandó” nadó dlɛnalɔdó nuylankan xe mɛɖé wà. Amɔ́, Biblu sɔ́ nɔ yí xogbe lɔ zán nadó dlɛnalɔdó nǔxe gbɛtɔvi lɛkpó ko ɖugu etɔn, vlavo yé nyí mɛɖagbe kavǐ mɛylankan.
“Ylanwiwa mɛ wɛ nyɛ nyí jiji te, kpóɖɔ ylandó mɛ wɛ onɔ̀ cie mɔxò cie te.”—SALMU LƐ 51:5.
Ylandó nɔ hɛnnugble to gbɛtɔvi lɛ go.
Gbɔnvona ɖɔ é zɔ́n bɔ mǐ nɔ vɛtolina Jihweyɛhwe, é sɔ́ nɔ bɛ́kpla nuyiwa mǐtɔn xɛ́ hatɔ mǐtɔn lɛ kakajɛ kanlin lɛ kpó ayigba lɔ blebu kpó jí. Enɛ ko hɛn yajiji susu wá.
“Hwenue nyɛ jlo nadó wà nǔxe sɔgbe, nǔxe ylan wɛ nɔ tíin to dè é.”—LOMUNU LƐ 7:21.
“Nudida lɛkpó wɛ to hunwɛn dókpɔ́ bo tíin to awufiɛsà mɛ dókpɔ́ kakajɛ din.”—LOMUNU LƐ 8:22.
