Yemboe 9
¿Mbaepa reyapota nderëtara oyerovia katu vaerä?
1. ¿Maerapa ikavi omenda kuimbae jare kuña oiko päve vaerä?
YandeRu Jehováko omee yandeve ñee ikavi vae, jae oyerovia katu jare oipota tëtara oiko yerovia reve (1 Timoteo 1:11, NTG). Jaeko omboɨpɨ menda. Kuimbae jare kuña omenda yave omboɨpɨ kavi jëtara jare oyererovia katuta, jayave ipuereta ombokuakuaa kavi imichia reta. Cristiano reta oyapotakovi jëtaguasu iley jei rami, jaeramo oikuatiaukatako imenda. Emongeta Lucas 2:1, 4, 5.
YandeRu Tumpa oipota omenda vae yogüɨreko päve avei. Jehová oipotaä omenda vae oyombotavɨ oyoupe (Hebreos 13:4). Jehová guɨröɨro divorcio (Malaquías 2:16). Tumpa Iñee jei metei cristiano ipuere oñemodivorcia jare omendaye, ërei jaeño imenda ïru iyaguasa yave. Emongeta Mateo 19:3-6, 9.
2. ¿Këraitapa yogüɨreko omenda vae?
Jehová oyapo kuimbae jare kuña oyomborɨ vaerä omenda yave (Génesis 2:18). Jëtara ombotenonde vae jaeko kuimbae, jae oparavɨkɨtako jëtara peguarä. Ipope oï vi omboe jëtara Tumpa Iñeere. Oaɨu jembireko ramo oyangarekota jese yepetëi iyavai katu chupe. Omenda vae oyoaɨu pävetako jare oyeendu kavitako oyoupe. Jare mokoi reve amo ámope peyavɨ ramo, peɨ̈rotako oyoupe peiko vaerä yerovia reve. Emongeta Efesios 4:31, 32; 5:22-25, 33, jare 1 Pedro 3:7.
3. ¿Ikavipa oyereya omenda vae?
Oime mbaemboavai yave mokoi reve oyemongeta kavitako mboroaɨu reve (1 Corintios 13:4, 5). Biblia mbaetɨko omboe omenda vae oñono kavita imbaemboavai reta oyereya yave. Emongeta 1 Corintios 7:10-13.
4. Taɨ reta ¿mbaepa oipota Tumpa peve guarä?
Jehová oipota reyerovia. Jaeramo, jae ndemboe kërai ikavi reguata vaerä. Oipotavi reyeapɨsaka nderu jare ndesɨre echa jae reta oipɨsɨma arakuaa oiko vae rupi (Colosenses 3:20). Jehová oipota reyapo Jae jare Taɨ jei vae reyerovia vaerä. Emongeta Eclesiastés 11:9–12:1; Mateo 19:13-15; 21:15, 16.
5. Tu reta ¿këraitapa pemborɨ pemichia oiko vaerä yerovia rupi?
Ndeparavɨkɨ reve remongaruta, rembotɨruta jare oimetako penoi kiape peiko vaerä (1 Timoteo 5:8). Ërei jokuaeñoäko, pemichia reta oiko vaerä yerovia rupi pemboe kavitako oikuaa jare oaɨu vaerä Tumpa (Efesios 6:4). Peechauka peaɨu yandeRu yave jae reta ikɨ̈reɨtavi oyapo vaerä körai. Pemboe Biblia jei rami yave pemichia ipɨakɨ̈reɨta jekokavi vaerä. Emongeta Deuteronomio 6:4-7 jare Proverbios 22:6.
Michia reta okuakuaa kavita pemokɨ̈reɨ jare pemoäta ngatu yave. Ikaviko pembosɨmbi osɨrɨ vaerä ikaviä vaegüi (Proverbios 22:15). Ërei, pembosɨmbi yave peyapotako mboroaɨu reve, agüɨyetako peyuvanga pemichia retare. Emongeta Colosenses 3:21.
Testigo de Jehová reta oyapo jeta ñeerɨru oyeekɨ vae Bibliagüi omborɨ vaerä tu reta jare michia retape. Emongeta Salmo 19:7, 11.
Ipuere vi ko ikavi ndeveguarä
NERËTARA IPUEREKO OIKO YEROVIA REVE
Peeka Tumpa peiko vaerä yerovia reve pemendape
Oime mókoi mbae ipuere omborɨ menda reta. ¿Mbaera jókuae?
NERËTARA IPUEREKO OIKO YEROVIA REVE
Kërai pepuere pemoikavi mboavai reta
Pemomɨ̈rata päve mbaeavi reta yave peiko kavita yerovia reve pemendape, ngaraa peikoiño arasɨ reve.
