Tumpa añetete vaeko opaete mbaembae Apoa. Jae jekuae avei oiko, ngaraa iyapɨ (Salmo 90:2). YandeRuko omee yandeve ñee ikavi vae oñeväe Bibliape (1 Timoteo 1:11). Tumpa oipota rupiko yaiko, jaeramo jaeñoko yamboeteta. Emongeta Apocalipsis 4:11.

Tumpa mbaetɨko yande rami jaeko oiko ɨvate, jaeramo meteiave oecha (Juan 1:18; Eclesiastés 5:2). Ërei, yandepuere yaikuaa Tumpa ñamae yave jembiapo retare. Echa, jae oyapo oipotagüe ɨvɨra ia jare mbaepotɨ reta oechauka vaerä yandeve yanderaɨu vae jare iyarakuaa katu. Ñamae ɨvate, ɨvɨ jare yasɨtata retare yave, yaecha imbaepuere yaeko. Emongeta Romanos 1:20.

Yaikuaa katutako Tumpa yamongeta Iñee yave. Jokope jei mbaepa ikavi jare ikaviä, kërai Jae tëtara reta ndive jare mbae oyapo yaguata kavi ani yaguata kaviä yave. Emongeta Salmo 103:7-10.

Jesús jei: “OreRu ara pe reï vae, toyemboeteuka nderee” (Mateo 6:9). Jeta oenɨi yandeApoa “Tumpa” ani “yandeYa”, ërei jae oime jee. Ambue ñeepe oyoavɨmi, guaranípe yae Jehová. Biblia jei: “¡Toikuaa reta, nde nderee Jehová vae, ndeñoko jae Tuichagüe yaete opaete ɨvɨre vae!” (Salmo 83:18, NM). *

 Jeta Bibliagüi oyeekɨ Tumpa jee, jare oyepoepɨ yandeYa, Tumpa ani yandeRu ndive. Ërei, Biblia oyekuatía yave Tumpa jee oime siete mil ye oasa. Jesús oiporu ñomai Tumpa jee oporomboe yave. Emongeta Hebreos 2:12.

Emae video ¿Oimepa Tumpa jee?

Opaete ɨvɨ rupi oime jeta mbaeporara, ¿oechaukapa kuae Tumpa mbaetɨ oyemoambeko yanderé? Amogüe reta jei Tumpagüiko ou yandeve mbaeporara ñanemojäa vaerä. Ërei, kuaeko mbaeapu. Emongeta Santiago 1:13.

Tumpa yanderaɨu ramo oeya yaiparavo vaerä mbae yayapota vae. Jare yayeroviata yaiparavo yayeókuai Tumpape yave (Josué 24:15). Ërei, jeta oiparavo oyapo ikaviä vae japichare, jaeramo oime jeta mbaeporara. Jókuae ombopɨatɨtɨ Jehová. Emongeta Génesis 6:5, 6.

Jehová oyemoambeko yanderé jare oipota yaiko yerovia reve. Jaeramo, ɨmaäma oï omboai vaerä opaete mbaeporara jare ikaviä vae. Ërei, ñaäro ramboeve oväe jókuae ara, Tumpa omaeño vɨteri yaiporara. Yemboe 8 pe oñemoësaka kuaere. Emongeta 2 Pedro 2:9 jare 3:7, 13.

Oñemoambeko yanderé ramo, Jehová oipota yayemboya jese yandeyerure rupi (Salmo 65:2; 145:18). Jae ikɨ̈reɨ iñɨ̈ro vaerä. Jare oecha kavi ñañemomɨ̈rata yayapo vaerä jae oipota vae, yepetëi amo ámope yayavɨmi. Jaeramo, yandepuere yayemboya jese yepetëi yandeyoa. Emongeta Salmo 103:12-14 jare Santiago 4:8.

Jehová oipota rupi yaiko, jaeramo jupiko yaaɨu opaete vaegüi (Marcos 12:30). Yaechaukako yaaɨu yayemboe jese jare yayapo jae jei vae yave, körai yayemboya katuta jese. Emongeta 1 Timoteo 2:4 jare 1 Juan 5:3.