Yemboe 4
¿Kiapa Jesucristo?
1. ¿Ketɨgüipa ou Jesús?
¿Maerapa kia reta oipotatëi oyemboya Jesúsre? (MATEO 11:29; MARCOS 10:13-16)
Tenonde ete, Jehová oyapo Jesús. Ndei ou ɨvɨpe mbove, Jesús jaemako metei ángel imbaepuere vae ɨvatepe (Juan 8:23). Jae omborɨ Tu oyapo vaerä opaete mbaembae. Bibliape oyeenɨi Taɨ “jae vaeño vae”, Tumpaiño oyapo vae (Juan 1:14). Oyeenɨi vi “Ñee” Jesús, Jehová jeere imiari ramo. Emongeta Proverbios 8:22, 23, 30 jare Hebreos 1:2.
2. ¿Maerapa ou Jesús ɨvɨpe?
Tumpa ombou Taɨ ɨvɨpe oyakavo rupi jekove ɨvategüi kuñatai judía María jete japɨpepe. Jaeramo Jesús jae Tumpa Taɨ, mbaetɨko kuimbae taɨ (Lucas 1:30-35). Jae ou ɨvɨpe oyapo vaerä mboapɨ mbae: 1) omboe añetete vae Tumpare, 2) oechauka yandepuere yayapo Tumpa oipota vae yepetëi yaiporara, jae oyapo rami, jare 3) omee jekove sɨmbi vae yandeyora vaerä manogüi. Emongeta Mateo 20:28.
3. ¿Maerapa oata yandeyora manogüi?
Oyembojepɨ yepi oyeyora vaerä kia nunga manogüi (Éxodo 21:29, 30). Tumpa mbaetɨko yandeapo ñamano jare yandendechi vaerä. ¿Këraipa yaikuaa? Echa, Tumpa jei Adánpe, kuimbae tenondegua vae, oyeapɨsakaä iñeere yave omanotako. Jaeramo, Adán oyeapɨsaka avei yave ngaraatëi omano (Génesis 2:16, 17; 5:5). Tumpa Iñeepe jei mano “oike” ɨvɨpe Adán rupi. Echa, Adán omboasa taɨ reta jare tayɨ retape mbaeyoa, jae jeko peguako opaete ñamano. Jaeramo oata yandeve yanderepɨ vae yayeyora vaerä mano ipogüi. Emongeta Romanos 5:12 jare 6:23.
Ërei, ¿kiapa ipuereta omee mbaerepɨ yandeyora vaerä manogüi? Ñamano yave yamboepɨ yandeyoaiñore. Iyoa vae ngaraa ipuere omboepɨ ïru reta iyoare. Emongeta Salmo 49:7-9.
4. ¿Maerapa omano Jesús?
Jesús jekombae, mbaetɨ etei iyoa. Jaeramo, omano omboepɨ vaerä yandeyoa, mbaetɨ iyoare. Tumpa oechauka yanderaɨu yaeko ombou Taɨ omano vaerä yanderé. Jesús oechaukavi yanderaɨu oyeapɨsaka Tu rupi jare omee jekove yandeyoare rupi. Emongeta Juan 3:16 jare Romanos 5:18, 19.
Emae video ¿Maerapa omano Jesús?
5. ¿Mbaepa oyapo oï Jesús añave?
Oime ɨvɨpe yave, Jesús omongüera imbaerasɨ vae, omoingoveye omano vae jare omborɨ oiporara vae. Jökorai oechauka oyapota vae kuri oyeapɨsaka vae retare (Mateo 15:30, 31; Juan 5:28). Jesús omano yave Tumpa omoingoveye ojoye vaerä arape (1 Pedro 3:18). Jokope oäro Tumpa oñono vaerä Mburuvicha Guasurä (Hebreos 10:12, 13). Añave Jesús omogobiernama oï ɨvatepe, jare jemimboe reta omoërakua kuae ñee ikavi vae opaete ɨvɨ rupi. Emongeta Daniel 7:13, 14 jare Mateo 24:14.
Ɨmaäma, Jesús oiporuta imbaepuere Mburuvicha Guasu rami opa omokañɨ vaerä pochɨ vae reta, jökorai opata opaete mbaeporara. Jayave, opaete güɨrovia Jesúsre jare oyapo jae oporomboe vae, yogüɨrekota yerovia reve paraíso ɨvɨpe. Emongeta Salmo 37:9-11.
