Pemendama yave peikomako metei ramiño. Yepetëi mbaetɨ reaɨu poi nderu reta, añave nemendamako remotenondeta. Aramoi ïru reta mbaetɨ oecha jökorai. Ërei peyapo Tumpa Iñee jei vae pemborɨta peiko vaerä pɨaguive reve perëtara reta ndive jare pemomɨ̈rata pemenda.

TUMPA IÑEE JEI VAE: “Emboete nderu jare ndesɨ” (Efesios 6:2). Yepetëi rekuakuaama, jekuaeñoko remboeteta nderu reta. Jaeramiñovi, nemenda ïru oimetako güɨnoi metei ara omae vaerä tu retare. “Mboroaɨu [...] mbaetɨ ko ñemoägüɨro”, jáeramo nemenda ïru omae katu avei tu retare yave agüɨye eyemongeta ndemboɨkemako oï (1 Corintios 13:4; Gálatas 5:26).

NDEPUERE REYAPO VAE:

• Agüɨye ere: “Nerëtara oyemongeta pochɨ avei chekotɨ” ani “Mbaetɨi amboyerovia ndesɨ”

• Reñeñonotako nemenda ïru rami reikuaa vaerä kërai jae oñemosiente vae

TUMPA IÑEE JEI VAE: “Kuimbae oeya tu jare ichɨ, oyogüɨreko vaerä jembireko ndive, jare oyogüɨreko metei ramiño” (Génesis 2:24). Ipuereko pemendama yave peru reta güɨrovia vɨteri reyapo vaerä jae reta jei vae, jáeramo jekuaeño oñemoinge peyapo vae pe.

Pepope oï peñemomiari kavi vaerä jae reta ndive mbae pemaeñota oyapo vaerä. Peñemomiari kavi yave ngaraa oime ñeeasɨ katu (Proverbios 15:1). Peñemomichi, pepɨakavi jare pepɨaguasu yave pepuereta peyereraja kavi perëtara reta ndive jare jekuaeñota peiko “pepɨaguasu oyoupe peyoaɨu reve” (Efesios 4:2).

NDEPUERE REYAPO VAE:

• Nderëtara reta jekuaeño oipota peyapo jei reta vae yave, eyemongeta nemenda ïru ndive ipɨakatu oï yave

• Peñemomiaritako metei ramiño oime yave kuae yemboavai