Oimema membɨrɨpɨ yave mbaetɨma oyovake echa oimema moambeko reta menda retape. Ipuereko pepɨakañɨ peecha yave mbovɨ tiempo pemboasa peyangareko pesambiaɨraɨre jare kërai yae pemokangɨ vae. Mbaetɨ peke kavi yave ipuereko peyarasɨño peyoupe. Jáeramo mókoi reve peñemomiaritako këraitara pepuere pemae pesambiaɨre jare peyangareko pemendare. Jáeramo, ¿këraitapa ipuere pemborɨ arakuaa Tumpa Iñee omee vae?

TUMPA IÑEE JEI VAE: “Mboroaɨu jae ko yaiporara vae, yandepɨakavi vae [...], mbaetɨ yaipota mbae yandeyeupeguaräño, mbaetɨ yandearasɨ” (1 Corintios 13:4, 5). Ipuereko ndemembɨrɨpɨma yave jetatama reyangareko jese. Javoi neme oechata mbaetɨma remae jese, jáeramo agüɨyetako neäkañɨ reyapo mbae ikavi vae neme peguarä. Mbɨaguasu jare mbɨakatu reve, ndepuere reechauka reipota ndemborɨ vaerä oyangareko pesambiaɨraɨre.

“Pe kuimbae reta, peiko perembireko ndive pearakuaa reve kavi” (1 Pedro 3:7). Oimema ndesambiaɨrɨpɨma yave añave reeikuaatako nderembireko jetama oyangarekota jese, jókuaeramo aramoi ikangɨ yae jare ipɨatɨtɨ echa jetama mbae oyapo ramo. Jokuaeramo ipuere ipɨarai ndeve, ërei nde agüɨyetako ndearasɨ ikotɨ. Echa, “iyarasɨ raivimbae, ikavi yae ko jëia yae vae güi” (Proverbios 16:32). Jáeramo reikuaa kavitako mbaera oipota remee vaerä chupe (Proverbios 14:29).

NDEPUERE REYAPO VAE:

• Reikoma sambiaɨ tuurä yave: Emborɨ nderembireko reyangareko vaerä pɨ̈tu rupi ave ndesambiaɨre. Jáeramo reekɨtako tiempo ïru mbae reta reyapo vae güi reï katu vaerä nderembireko jare ndesambiaɨ ndive

• Reikoma sambiaɨ ichɨrä yave: Neme oipota ndemborɨ peyangareko pesambiaɨre yave emaeño tandemborɨ. Yepetëi mbaetɨ oyapo kavi nde reyapo rami emborɨ kërai oyapo vaerä

TUMPA IÑEE JEI VAE: “Jare oyogüɨreko metei ramiño” (Génesis 2:24). Yepetëi penoima pesambiaɨ yave jekuaeñoko peiko “metei ramiño”. Pemomɨ̈rata aveitako pemenda jökorai yave peiko kavita.

Neme ndemborɨ yave emee avei yasoropai ñee kavi rupi jökorai reyapo yave “moa rami ko” (Proverbios 12:18). Echauka avei nderembireko pe reaɨu yae jare remboete opaete jae oyapo vaere (Proverbios 31:10, 28).

“Agüɨye kia toeka chupe jaekavita vaeño, jaeño jaekavita ïru pe vae” (1 Corintios 10:24). Eyapo avei mbae ikavi vae nemenda ïrupe jare emae kërai jae oyapo mbae peiko kavi vaerä. Jáeramo penoitako tiempo peñemomiari jare peyeapɨsaka vaerä peyeupe peikuaa vaerä kërai peyangareko peretere jare agüɨye vaerä peyeyopia peyeupe. Tumpa Iñee jei vae: “Agüɨye peyeopia oyougüi, ërei mókoi reve pemiari kavi peyeopia mbovɨ ara pegua” (1 Corintios 7:3-5). Jáeramo pepɨagüive peñemomiari añete rupi kavi. Jayave pemomɨ̈ratata pe menda.

NDEPUERE REYAPO VAE:

• Penoi aveitako metei tiempo peve guarä

• Pechauka peyeupe peyeyoaɨu vae pemee yave oipotagüe regalomi

TUMPA IÑEE JEI VAE: “Nemichi güive reikuaa Tumpa Iñee re. Jókuae reta ndemboarakuaata yemboasa re” (2 Timoteo 3:15). Peñemomiari kavitako këraitara pemboe pe michia. Jare peikuaatako michia reta jeta ipuerema oyemboe ichɨ jɨe güive ma. Echa ipuerema oendu jare oikuaa neñee jare nderemosiente reï vae jae omosiente vi. Reipokuaa remongeta chupe jae oa rupive yave yepetëi mbaetɨ oikuaa, jókuae ikavitako omomora omongeta vaerä okuakuaama yave.

Aguɨye eyepɨayemongeta nemembɨ michieteko oikuaa vaerä Tumpa regua. Eyerure Jehovápe nemichia róvai (Deuteronomio 11:19). Reyuvanga jae ndive yave remongetatako Tumpa oyapogüe vaere (Salmo 78:3, 4). Okuakuaa rupi jae oikuaata kërai yae reaɨu Jehová pe vae jayave jae oaɨuta vi.

NDEPUERE REYAPO VAE:

• Reyeruretako arakuaare ndepuere vaerä remboe nemichia

• Remboe ñee reta re yave emboaɨkuere chupe jayave nemichia ɨmambae oikuaata