Jehová oyapo yandeɨpɨ reta yave oeyako tu reta ipope oyangareko vaerä imichiare (Colosenses 3:20). Tu reta ipope oï omboe vaerä imichia oaɨu vaerä Jehová jare arakuaa katu rupi oiko vaerä (2 Timoteo 1:5; 3:15). Jare remaetako mbae güɨnoi ipɨape vae. Ikavi ete ko reechauka ndereko rupi jae ipuere vaerä omomoe. Ndepuere vaerä remboe nemichia reta Tumpa Iñeere nde räriko renoita ndepɨape (Salmo 40:8).

TUMPA IÑEE JEI VAE: “Opaete toïndaivi oyeapɨsaka vaerä, agüɨye mbae tei rai voi” (Santiago 1:19). Peipotatëiko peraɨ reta imiari pe ndive okɨɨyembae reve. Jökorai vaerä peechaukata peipota peendu kavi iñeere jare añetete imiari oï vaere. Echa jaeko oipota pe peï chupe guarä jókope. Peiko pɨakatu reve yave ipuereta imiari kavi peve (Santiago 3:18). Peraɨ reta oecha pearasɨ voi ani peikura avei yave jae reta ngaraa imiari peve añete rupi kavi. Jáeramo pepɨaguasutako jare pere aveitako chupe peaɨu vae (Mateo 3:17; 1 Corintios 8:1).

NDEPUERE REYAPO VAE:

• Emboɨke nderembiapo reta reyeapɨsaka vaerä nderaɨ reta oipota oyemongeta nde ndive yave

• Peñemomiari avei jae reta ndive, ani oime yemboavai yaveiño

TUMPA IÑEE JEI VAE: “Kuimbae iñee reta, ɨ tɨpɨ yae vae rami ko” (Proverbios 16:20). Ámope taɨrusu vae reta mbaetɨ jei opaete ipɨape güɨnoi vae, jáeramo peendu kavitako iñeere peikuaa vaerä kërai jae añetete oñemosiente vae. Ámope kunumi jare kuñatai reta omondoete jei vae ani jeiño oipota oyemongeta ramo. “Arakuaambae ko [...] ndei mbae oendu kavi rupive iñee omoë voi vae” (Proverbios 18:13). Jáeramo agüɨyetako ndearasɨ voi (Proverbios 19:11).

NDEPUERE REYAPO VAE:

• Nderaɨ reta imiari ndeve yave emaeño opa toyemongeta ndeve yepetëi mbaetɨ jaekavi ndeve jei oï vae

• Eyemomaendúa këraipa reñemosiente jare mbaepa ikavi ete ndeve renoise iyaveigua yave

TUMPA IÑEE JEI VAE: “Cheraɨ, eendu nderu iporomboe, agüɨye eröɨro ndesɨ iporomboarakuaa” (Proverbios 1:8). Jehová omee mbaepuere tu jare ichɨ taɨ retare oyangareko kavi vaerä. Mókoi reveko pemboeta pemichia omboete vaerä ïru reta pe jare iñeerendu vaerä (Efesios 6:1-3). Jae reta oikuaa kaviko tu reta mbaetɨ oyovake iyemongetape yave (1 Corintios 1:10). Jáeramo mbaetɨ peyemongeta yovake yave agüɨyetako peyoaka pemichia rovake, echa jökorai peyapo yave ipuereko ngaraa pemboete.

NDEPUERE REYAPO VAE:

• Peñemomiari kavi këraitara pemboarakuaa jare pembosɨmbi pemichia

• Ipuereko reyemongeta oyoavɨ nemenda ïru güi kërai pemboarakuaa pemichia, jayave eñeñono jae jendape

TUMPA IÑEE JEI VAE: “Emboe kavi michia ndei güive voi” (Proverbios 22:6). Reipota oë kavi ndeve remboarakuaa nemichia yave, agüɨye eeyaiño. Peñemomiari kavitako kërai pemboeta jare kërai pembosɨmbita (Salmo 127:4; Proverbios 29:17). Pembosɨmbi yave mbaetɨ oipota jei peinupaiño, oipotako jei pemborɨta oyapo vaerä peiporu chupe vae (Proverbios 28:7). Pemboetaviko oaɨu vaerä Tumpa Iñee jare jësaka kavi vaerä yemboarakuaa reta oï pɨpe vae (Salmo 1:2). Jökorai güɨnoita ipɨa ikɨambae (Hebreos 5:14).

NDEPUERE REYAPO VAE:

• Remborɨtako nderaɨ reta oecha kia añete vae rami Jehovápe güɨrovia katu jese vaerä

• Remborɨtako oikuaa jare ombóguai vaerä kia reta jekokavimbae jare mbae ikaviä vae, Internet ani redes socialespe ñogüɨnoi vae. Remboetaviko kërai jae agüɨyetako omaeño kia opoko jetere