1. Matrimónio

La hénte oreko diferénte opinión pe matrimóniore ha oikotevẽvare hikuái ovyʼa añete hag̃ua.

HEʼISÉVA: Ñandejára voi ningo omoñepyrũ vaʼekue pe matrimónio, upéicharõ haʼe oikuaa porãvéta mbaʼépa oikotevẽ peteĩ paréha ovyʼa hag̃ua (Marcos 10:​6-9). Ména ha tembireko oñekonsentra rangue la haʼekuéra oikotevẽvarente ha oñepyrũramo oñekonsentra la hembiayhu oikotevẽvare, katuete mokõivéva ovyʼáta. Peteĩ ména ohayhúva hembirekópe ohechaukáta upéva otrata porãramo chupe ha oñangarekóramo hese. Ha peteĩ tembireko orrespetáva iménape ohechaukáta upéva oñeʼẽ lájape chupe ha umi mbaʼe ojapóva rupive.

UMI KONSÉHO BÍBLICO OIKOITE: Peteĩ matrimónio oikóva Vietnámpe, opensa kuri núnka ndovyʼamoʼãiha hikuái imatrimóniope. Pe karai hérava Quang ijarhél ha ipyʼahatã vaʼekue. Haʼe heʼi: “Chéve nacheinteresái vaʼekue mbaʼéichapa oñeñandu che rembireko, ha heta vése aapoʼi chupe”. Hembireko hérava Thi katu ojedivorsiase chugui. Haʼe heʼi: “Che apensa núnka ndaikatumoʼãiha ajerovia che ménare ni arrespeta chupe”.

Kon el tiémpo ko matrimónio oaprende la Biblia omboʼéva ha mbaʼéichapa oaplika vaʼerã avei la heʼíva Efesios 5:33. ¿Mbaʼépa ohupyty hikuái mediánte upéva? Quang heʼi: “Ko téxto chepytyvõ ahechakuaa hag̃ua cheamavleve vaʼerãha, ha che rembireko oñandu vaʼerãha che ahayhu ha añangarekoha hese. Upévare che nambofaltái chupe mbaʼeve, ameʼẽ chupe umi mbaʼe haʼe oikotevẽva ha aipytyvõ chupe oñeñandu porã hag̃ua. Ajapo guive koʼã mbaʼe haʼe cherayhuve ha cherrespetave”. Ha hembireko heʼi: “Amáske ajapo la heʼíva Efesios 5:33 ha ahechauka arrespetaha che ménape, añandu haʼe cherayhuveha, oñangarekoha cherehe ha roiko pyʼaguapýpe”.

 2. Mbaʼéichapa jatrata umi ótrope

La hénte otrata vai jepi umi ipínta diferéntevape, umi haʼévape omosexuál, umi orekóvape ipire kolór diferénte, umi orekóvape ótro rrelihión, térã oúva ótro paísgui.

HEʼISÉVA: La Biblia ndeʼíri ndajachaʼéi vaʼerãha umi héntere haʼe rupi ótro paisgua, ipire kolór diferénte haguére térã haʼe haguére omosexuál. Upéva rangue, ñanemokyreʼỹ jarrespeta hag̃ua opaichagua persónape, tahaʼe haʼéva ipínta, ipire kolór, ipaís, térã iplátapa o imboriahu (Hechos 10:34). Nañandegustáiramo jepe la ogueroviáva ñande rapicha térã umi mbaʼe ojapóva, lomímonte jatrata porã ha jarrespeta vaʼerã chupe (Mateo 7:12).

UMI KONSÉHO BÍBLICO OIKOITE: Daniélpe oñemboʼe vaʼekue entéro umi hénte oúva Ásiagui ouha operhudika hag̃uáicha ipaís. Upévare haʼe ndochaʼeiete vaʼekue umi asiáticore, ha pyʼỹinte ojaʼo ha oapoʼi vaʼekue chupekuéra umi ótro rovake. Daniel heʼi: “Che apensa vaʼekue péicha ajapóvo adefendeha hína la che país. Ha chéve g̃uarã ni vymi voi ndaivaíri la apensáva ha ajapóva hesekuéra”.

Kon el tiémpo Daniel oaprende mbaʼépa la Biblia omboʼe. Haʼe heʼi: “Akambiaite vaʼerã kuri apensa lája. Koʼág̃a ahecha vaʼerã la héntepe Ñandejára ohechaháicha chupekuéra, ha noimportái moõguipa ou hikuái”. ¿Ha mbaʼépa opensa koʼág̃a Daniel oikuaávo por primera ves peteĩ persónape? Haʼe omombeʼu: “Koʼág̃a ndarahavéima enkuénta mbaʼe paisguápa pe persóna. Che ahayhu opaichagua persónape ha areko heta amígo diferénte paisgua”.

 3. Pláta

Heta hénte oñehaʼã irríko hag̃ua, openságui péicha ovyʼavetaha ha natekotevẽiha ojepyʼapy ifutúrore.

HEʼISÉVA: Ñande ñaikotevẽ la pláta, péro upéva nogarantisái ñandéve javyʼataha ni natekotevẽveimaha jajepyʼapy ñande futúrore (Proverbios 18:11; 23:​4, 5). Upéva rangue, jasegi vaʼerã umi konsého oĩva la Bíbliape, upéicharõ añoite ikatúta javyʼa añete koʼág̃ama voi ha avei amo gotyove (1 Timoteo 6:​17-19).

UMI KONSÉHO BÍBLICO OIKOITE: Peteĩ kuimbaʼe oikóva Indonésiape hérava Cardo ipláta hetase vaʼekue, ha okonsegi voi katu upéva. Haʼe omombeʼu: “Che areko vaʼekue opa mbaʼe la hénte siémpre oipotáva. Por ehémplo, aviaha, areko heta mbaʼe hepyetereíva, ha heta áuto ha óga”. Péro amo ipahápe Cardo opyta mbaʼeveʼỹre. Haʼe heʼi: “Tuichaiterei ningo ajehodemi, la pláta arekomíva guive ha hetaite áñore añehaʼã vaʼekue akonsegi hag̃ua, ojepeʼapaite chehegui peteĩ tesapirĩmente. Hetaite áñore ningo ambaʼapo cherríko hag̃ua, ha koʼág̃a katu apyta che po che akã ári, ndarekói mbaʼeve ha añandu ndavaleiha mbaʼeverã”.

Cardo oñepyrũ oaplika umi konsého oĩva la Bíbliape oñeʼẽva pe plátare. Haʼe ndoikovéima ojeity traváhope ipláta heta hag̃ua, upéva rangue odesidi oikotaha sensillomínte. Haʼe heʼi: “Koʼág̃a ae ikatu haʼe cherrikoha, pórke aime porã Ñandejárandi. Káda pyhare ake trankílo porã ha avyʼa che pyʼaite guive”.

 4. Umi rrelasión sexuál

La hénte oreko diferénte opinión heʼívo arakaʼépa peteĩ persóna ikatu oreko rrelasión sexuál ha mávandipa.

HEʼISÉVA: La Biblia ndeʼíri oĩ vaiha jareko umi deséo sexuál, péro heʼi avei mbaʼépa ndovaléi jajapo. Pe palávra “tekovai” ojepuru jepi oñeñeʼẽ hag̃ua pe ñemoakãratĩre, prostitusión, rrelasión sexuál orekóva umi nomendáiva, omosexualida ha umi orekóva rrelasión sexuál umi animál ndive (1 Corintios 6:​9, 10). Umi rrelasión sexuál haʼe peteĩ rregálo Ñandejára omeʼẽva sólamente peteĩ kuimbaʼe ha kuña omendávape (Proverbios 5:​18, 19).

UMI KONSÉHO BÍBLICO OIKOITE: Peteĩ kuña oikóva Austráliape hérava Kylie heʼi: “Chesoltérarõ guare, apensa vaʼekue arekóramo rrelasión sexuál avyʼataha, pórke péicha añeñandúta segúra ha añandúta oĩha cherayhúva. Péro amo ipahápe ndaupeichaiete voi, ni michĩmi nañeñandúi segúra ha añandu namereseiha avave cherayhu”.

Tiémpo rire, Kylie oaprende mbaʼépa la Biblia omboʼe umi rrelasión sexuál rehe, ha oaplika umíva. Haʼe omombeʼu: “Ahechakuaa ke ajapóramo umi mbaʼe Ñandejára heʼíva, ajeiha heta sufrimiéntogui. Koʼág̃a che amendáma, ha asegi ajapo la Jehová ojeruréva, upéva añetehápe chemoñeñandu segúra ha añandu avei che ména cherayhuha. Asegi rupi umi konsého omeʼẽva la Biblia ajei heta akã rasýgui”.