Hi poristhiti polloi: Julia arxeant polloita tednam apunn mottem asam oxem taka dista. Tachim mummy-daddy ani ixtt tem barik asa mhunn taka sangtat. Torui astana tem apleakuch mhunntta, ‘Hanvem anik barik zaunk zai.’

Halinch, Julian aplem vozon anik 2 kilo unnem korunk thodde dis upaxi ravonk chintlam.

Juliachea zagear tum aslear tum kitem korta aslem?

Tum koxem dista tea vixim chint’ta korop chukichem nhoi. Bible-ant khubxea bailanchea ani dadleanchea rupa vixim tokhnnai kelea. Udharonnak Sarah, Rachel, Abigail, Joseph, ani David. Bible sangta, Abishag mhunnttloli bail “ekdom sundor” asli.—1 Raza 1:4.

Zaitim tornnattim dis-rat fokot apunn koxim distat heach vixim chintat. Oxem kel’lean ti trasant poddonk xoktat. Udharonnak:

• Ek xodh kel’lea pormonnem, 58 ttok’ke cheddvamnim apunn mottim asa mhunn sanglem, punn khorem mhunnttlear tantuntlim fokot 17 ttok’ke cheddvam mottim aslim.

• Anik ek xodh dakhoita, 45 ttok’ke bailo somzotaleo apunn motteo asat mhunn, punn khorem mhunnttlear teo chodduch barik asleo.

• Barik zaunk thoddim tornnattim anorexia mhunnttat toslea mansik duensak sampoddleant, zantunt tim bhuken ravon aplo jiv dokheant ghalunk xoktat.

 Zor tuka anorexia duens asa vo khaunche-pieunche vixim anik koslem-i duens asa zalear modot ghe. Tumi tumchea mummy-daddy lagim vo tumi zancher visvas dovorta toslea munxa lagim ulounk zata. Bible sangta, “Ixtt sogllea vellar mog korta, punn, oddchonniche gorje khatir bhav zolmota.”—Mhonn’nneo 17:17.

Khorench, eka munxachi sobitkai tachea bhitorlea sobhavacher tharloli asa. Udharonnak, David razacho put Absalanva vixim chintat. Bible sangta,

“Absalanva itlo sobit anink konn naslo. Tokli tem pai porian, taka koslich kodd nasli.”—2 Samuel 14:25.

Punn, ho tornnatto gorvan bhorlolo, vhoddponn zhoddpi, visvasghatki munis aslo. Taka lagon Bible, taka samko loznaslolo, ovisvaxi ani khuni mhunn dakhoita.

Bible amkam he sol’le dita,

‘Tumi novi munxam zaiat.’—Koloskarank 3:9, 10.

“Bhailea vostunchi tumchi xringarnni zaum noie . . . , Tumchi xringarnni zaum-di bhitorli, kallzachi, bigoddna tosli.”—1 Pedru 3:3, 4.

Sobit disonk zai mhunn chintop vaitt nhoi punn chodd gorjechem mhunnttlear novim munxam zavop. Hacho orth, amcho sobhav ani gunn bore asop gorjechem. Baili sobitkai nhoi punn bore gunn sodanch ugddasak urtat. Phylicia mhunnttlolem ek cheddu sangta, “sobitkai munxachi nodor oddun gheta punn lok sodanch tuzo sobhav ani tuje bore gunn ugddasak dovorta.”

Tum koxem dista tem polloun tum khub favtti niraxi zata kai?

Sobit disonk zai mhunn surgery korunk, vo upaxi ravon barik zaunk, tunvem kednam-i chintlam kai?

Sobit disonk tujean kitem-i bodlunk zatalem zalear tum kitem bodolta aslem? (Tuka bodlunk zai tem mark kor.)

• TUJI LAMBAI

• VOZON

• KENS

• ANGACHI SHAPE

• RUP

• RONG

Tunvem poilea don prosnacho zobab hoi, ani tisrea prosnak tin vo chodd utram vinchun kaddleant zalear motint dovor. Tujea rupant jim unnemponnam koxim tuka distat tim dusreank unnemponnam koxim disona zait. Tum tujea rupa vixim gorje poros chodd chint’ta korta astolem.—1 Samuel 16:7.