PROSN 9
Sonvsarant Soglem Apxinch Zalem Mhunn Hanvem Manop Sarkem?
TUM KITEM KORIT?
Hi poristhiti polloi: Alex guspola. Dev asa ani tannech soglem rochlam mhunn to sodanch mantalo. Punn aiz tachea biology xikxokan, sonvsarant sogleo vostu apxinch zaleo ani vidneanan hea vixim purave dileat mhunn dhavo kelo. Alex atam chint’ta, ‘Vidnean xikpeam lagim, soglem apxinch zalam mhunn purave asat zalear, tea vixim prosn korunk hanv konn? Toxem korop pixeponn zatolem.’
Tum Alex-achea zagear aslear, sonvsar apxinch zala oxem pustokam sangtat dekhun, tum-ui tem sot mhunn manta aslo?
RAV ANI CHINT!
Hea vad-vivadacher lok khoinchea-i vatten uloitana apunn kitem manta tem rokddech sangtat punn toxem te kiteak lagon mantat tem tankam khobor asona.
-
Thodde lok sonvsar rochla mhunn mantat karonn tankam igorjent toxem xikoilam.
-
Thodde lok sonvsarant soglem apxinch zalam mhunn manta karonn tankam iskolant toxem xikoilam.
CHINTUNK SOV PROSN
Bible sangta: “Khoinchea-i ghorak tacho bandpi asa, punn soglleo vostu bandun haddleat to mhollear Dev.” (Hebrevank 3:4) Hem sot manunk kotthin kai?
Hem ghor apxinch zalem mhunn sangop pixeponn, toxench rochnnar nastana jivit apxinch ailem mhunn dhavo korop pixeponn
THODDE MHUNNTTAT: Ek vhoddlo spott zaun ho ak’kho vixv toiar zalo.
1. Ho spott konnem kelo ani kiteak lagon zalo?
2. Kitem manop sompem, kainch na thoim thaun soglem apxinch zalem vo sogleo vostu konnem tori keleo?
THODDE MHUNNTTAT: Munis zonvara thaun ailo.
3. Munis zonvara thaun, mhunnttlear makdda thaun ailo zalear, munxache ani zonvaranchea bud’dhi modem itlo ontor kiteak asa?
4. Lhanantlo-lhan jiv porian itlo ojapacho kiteak?
THODDE MHUNNTTAT: Soglem apxinch zalem mhunn purave asat.
5. Zo konn oso dhavo korta tannem svota hea vixim chovkoxi kelea kai?
6. Sogle budhvont munis sonvsar apxinch zalo mhunn sangtat taka lagon khubxe lok apunnui tem sot mhunn manun ghetat, hem tumi zannant?
“Eka ranantlean choltana tuka ek sobit ghor dislem zalear tum oxem mhunnttolo kai? ‘Avois! Kitlem sobit ghor. Zhaddam apxinch katron poddon, tanchim lakhddam ektthaim ieun hem ghor toiar zalem.’ Kednanch na! Oxem mhunnop pixeponn zatolem. Toxem zalear, hea vixvant asat teo sogleo vostu apxinch aileo mhunn ami kiteak manun gheunchem?”—Julia.
“Chintun polloi. Konnem-i tuka, eka inkachea factorint vhoddlo spott zalo ani ink vonttincher usllon ek sompurnn dictionary toiar zali mhunn sanglear, tum tem manun ghetolo?”—Gwen.
DEV ASA MHUNN KITEAK MANCHEM?
Bible amkam “bore bud’dhik ani somjikaiek” uzar kor mhunn sangta. (Mhonn’nneo 3:21) Hacho orth, Dev asa mhunn tumchi patienni, fokot sokol dila tea tin vostuncher attaploli asonk zaina.
-
BHAVNAM (Mhaka dista ek vhodd xokti asa)
-
DUSREANCHO PROBHAV (Hanv ek dhormik somazant jietam)
-
DOBHAV (Mhojea mummy-daddyn mhaka lhanponnim thaun Dev asa mhunn xikoilam, mhaka anik dusri vatt nasli)
Tachea bodlek, tum jem kitem manta tea vixim tujea lagim borim karonnam asonk zai.
“Xikxok, amchea kuddiche sandhe koxe kam kortat hem xikoitana, Dev asa mhunn mhozo visvas anik ghott zata. Amchea kuddicho dor ek sandho lhanantlem-lhan kam pasun ekdom bore bhaxen korta. Choddxea pavtt amkam hea vixim khobor porian asona. Khorench amchi kudd ek ojap!”—Teresa.
“Jednam hanv ek vhoddli building, tarum vo ghaddi polloitam, hanv chintam, ‘Hem konnem kelam?’ Ghaddi toiar korunk budhvont munxanchi goroz asa. Karonn ti bori choltoli zalear tache lhan-lhan bhag porian sarke cholonk zai. Ek ghaddi toiar korunk engineer-achi goroz asa zalear, munxankui ek rochnnar asonk zai.”—Richard.
“Jitlom hanv vidnean xiktam, sogleo vostu apxinch zaleo mhunn sot manun gheunk mhaka kotthin zata . . . Sogleo vostu apxinch zaleo hem manchea poros, Devan soglem rochlam mhunn manop mhaka xannemponn dista.”—Anthony.
NIALLUNK
Zaitea vorsam thaun sodh-vavr kelea uprantui vidneanikam modem azunui ek-mot na ki soglem apxinch koxem zalem. Vidneanik zankam ami hea vixoi-acher gineani mhunn mantat, tancheach modem hea vixim ek-mot na, tor ami tea vixim prosn vichartat zalear tem chukichem kai?
