Tera Ana Taeka te Baibara Ibukin Tangiram i Bon Iroum?
Ana kaeka te Baibara
E kaotia te Baibara bwa ko bon riai n tangiriko i bon iroum n ae bon tau. E nanonaki n te aeka n tangira aei tabeakinam i bon iroum, karineam i bon iroum, ao iangoan ae ko kakawaki. (Mataio 10:31) Ma n oneani mwin ae ko na moanibwaia tangiram i bon iroum, iai raoi aron te tangira ae riai.
Antai ae ti riai ni moanibwaia tangirana?
E riai ni moanibwaiaki i nanora tangiran te Atua. E angareirei te Baibara bwa aio te tua ae te kabanea ni kakannato: “Ko riai n tangira Iehova ae Atuam ma nanom ni kabane.”—Mareko 12:28-30; Te Tua-Kaua 6:5.
Aio te tua ae te kauoua ni kakannato: “Ko riai n tangira raom n aomata n aron tangiram i bon iroum.”—Mareko 12:31; Nakoaia Ibonga 19:18.
E ngae ngke e aki taekinaki n te Baibara te tua ae okoro ni kaineti ma tangiram i bon iroum, ma te tua ae “tangira raom n aomata n aron tangiram i bon iroum” e kaotaki iai bwa te tua ibukin tangiram i bon iroum ao karineam i bon iroum n te aro ae riai, bon te bae e taneiai te aba iai ao e manena.
Antai ae moanibwai tangirana iroun Iesu?
E kaota Iesu aroni kabaerantan tangiran te Atua iroura, tangiraia raora n aomata, ao tangirara i bon iroura, ao e reireinia taan rimwina bwa a na kakairi n ana katoto.—Ioane 13:34, 35.
E moanibwaia tangiran Iehova ae te Atua ao e kabanea maiuna ibukini katiaan Ana mwakuri. E taku: “I karaoa nanon te tua are e anganai te Tama, bwa a aonga n ataia kaain te aonnaba ae I tangira te Tama.”—Ioane 14:31.
E tangiriia aomata Iesu ao e kaota aei n arona ni karekei kainnanoia, ao e kukurei naba n anga maiuna ibukia.—Mataio 20:28.
E kaota tangirana i bon irouna n te aro ae riai ngke e karekea naba ana tai ni motirawa, n amwarake, ao ni kakimwareireia n itamwaomwao ma taan rimwina ao ana reirei ake a konabwai.—Mareko 6:31, 32; Ruka 5:29; Ioane 2:1, 2; 12:2.
Te koaua ae moanibwaian tangiraia aomata nakon tangiram i bon iroum e kauarerekea kukureim ao karineam i bon iroum?
Tiaki ngaia anne, ibukina bwa ti karikaki ni katotongan te Atua, ae aroarona ae kakawaki bon te tangira ae aki bangaomata. (Karikani Bwaai 1:27; 1 Ioane 4:8) Nanon aei bwa ti karikaki bwa ti na kaotiota tangiraia aomata. E raoiroi naba tangiram i bon iroum, ma ti kukurei riki ngkana ti moanibwaia tangiran te Atua nakoni bwaai ni kabane ao ni kaatuua iangoani karaoani bwaai ibukia aomata, bwa e kangai te Baibara: “E kakukurei riki te anga nakon te anganaki.”—Mwakuri 20:35.
A bati aomata ni boong aikai aika iangoia bwa e reke te kukurei ngkana ko moanibwaiko moa. Irouia “tangiram i bon iroum” e kakawaki riki nakon “tangiraia raom n aomata.” Ma e kakoauaaki mani baika riiriki ngkai bwa e korakora riki te marurung ao te kukurei irouia naake a kakairi n ana taeka n reirei te Baibara ae kangai: “Ke e tai ukera oini kabwaiana temanna ma temanna, ma e na ukera ae e na kabwaia iai raona.”—1 I-Korinto 10:24.