Eng. Te Baibara ae te boki nikawai ae reke iai te wanawana, e katauraoa te kaeka nakon titiraki aika kakawaki ibukin te maiu, ao e kona ni buokiko bwa ko na kukurei ao ni kanakoraoa maium. Iangoi titiraki tabeua ake e kaekai.

1.   Iai te tia Karikiriki? E taku te Baibara bwa e “karikii bwaai ni kabane” te Atua. (Te Kaotioti 4:11) Ngkai ara tia Karikiriki te Atua, e atai baika ti kainnanoi bwa ti aonga ni kukurei ao n rauaki raoi ni maiura.

2.   E tabeakinai te Atua? N oneani mwin are ti na iangoa te Atua bwa e aki tabe ma aomata, e kangai te Baibara: “E bon aki raroa mairoura n tatabemanira nako.” (Mwakuri 17:27) E tabe ma baika a riki nakoim ao e kani buokiko bwa e na nakoraoi maium.—Itaia 48:17, 18; 1 Betero 5:7.

3.   N na kangaa ni kukurei riki man ataakin ae e buokai te Atua? Ti karikaki ma kainnanoan te Atua’ iroura, ae te bae ti bungiaki ma ngaia, ae te kan ota n nanon te maiu ao te kantaninga iai. (Mataio 5:3) E irekereke naba kainnanoan te Atua ma kan ataakin ara tia Karikiriki ao karekean te iraorao ma ngaia. E na butimwaea am kakorakora te Atua ibukini kan ataakina iroum bwa e kangai te Baibara: “Kaania te Atua, ao ane e na kaaningkami.”—Iakobo 4:8.

 A a tia mirion ma mirion n noria bwa karekean aia iraorao ma te Atua, e karikirakea nakoraoini maiuia ao e kaota nakoia aroia ni kukurei ni maiuia. E aki katoki kangaanga ni maium ataakin te Atua, ma e konaa wanawanana are i nanon te Baibara ni buokiko ni

•   Karekea te kakukurei riki n am utu.

•   Karekea nakoim te rau ma aomata.

•   Kekeiaki ma kangaanga aika kakaokoro n aron te rawawata, te tabeaianga ae korakora ibukin te mwane, ao te aoraki ae wenemaan.

 A bati Aaro aika kabongana te Baibara aika a aki kakairi n reirei ake iai. Ma ni kaitaraan anne, e na buokiko n ataa te Atua te Aro ae koaua, are e ongeaba ni baike e taekin raoi te Baibara.