Te moan, karekea kabebeteam n te koaua ae kangai: E nori rawawata nako te Atua n te aonnaba ni boong aikai, ao e bairea te bae e na karaoaia ibukini katokana. (Taian Areru 72:13, 14) E beritanna n ana Taeka ae te Baibara bwa e na “anganingkami ngkami akana kam karawawataaki, te kabebeteaki.” N ningai? “Ngkana e a kaotaki te Uea ae Iesu mai karawa ma ana anera aika mwaaka . . . ngkana e a karokoaki te irantanga ni karekekai i aoia te koraki ake a aki ataa te Atua, ma ake a aki ira nanon te rongorongo ae raoiroi ae taekan ara Uea ae Iesu.” (2 I-Tetaronike 1:7, 8) E na kaotaki Iesu n te tai ae na roko n te baere e aranaki n te Baibara bwa “te buaka n te bong ae kakannato ae ana bong te Atua ae Moan te Mwaaka,” ae ataaki naba bwa Aremaketon.—Te Kaotioti 16:14, 16.

E na aki kabonganaia aomata te Atua n te buaka anne, ma e na kabongana Natina ae Iesu Kristo ao ana anera aika korakora bwa a na buakana te buakaka. Ao e na boni kamaunaaki te rawawata ni kabanea iroun te taanga ni buaka mai karawa anne.—Itaia 11:4; Te Kaotioti 19:11-16.

E bon aki bitaki ana iango te Atua n te buaka ni karokoa boong aikai. Ma e teimatoa n iangoa te buaka bwa bon te anga ae eti i aan te tua ibukini katokan te karawawata ma te buakaka n aekana nako. Ma e kakoauaaki n rongorongon rimoa bwa bon tii te Atua n rineia bwa n ningai tain te buaka ao antai ae e na buaka. N  aron ae ti ataia, e a tia ni bairea te buaka ibukini katokan te buakaka ao irantangaia ake a karawawataaki, ae te buaka n te tai ae e na roko are e na buaka iai Natina ae Iesu Kristo. E nanonaki iai bwa e bon aki kukurei te Atua ni buaka ni boong aikai ao n aki iangoia bwa e taraa n raoiroi irouna.

N te kabotau: Iangoia uoman taari mwaane ake a un ngke e kitania tamaia. A katoka unia ao n uaia n tareboonia tamaia. E taekinna teuare temanna bwa e moani karika te un teuare temanna, ma e taekinna are temanna bwa e karaoaki te iowawa nakoina. A tuanga tamaia ao ni kantaningaa ana boutoka. Ma imwin ongoraean anne iroun tamaia, e a tuangia bwa a na katoka unia ao n tataningaia bwa e kanakoraoa te baere riki n okina. A a tiku n tataninga. Ma n te tai ae aki maan a manga un naba. Ma ngke e a oki tamaia, e bon aki kukurei irouia ai ngaia are e a uaia ni katuuaaeia ibukina bwa a aki ongeaba irouna.

N aia buaka aomata ni boong aikai ao a bubutiia naba te Atua ibukin ana boutoka. Ma e bon aki kona te Atua n tei n te itera teuana ma teuana ni buaka aika riki ni boong aikai. Ma n oneani mwin anne, e kamataataa n ana Taeka ae te Baibara ni kangai: “Tai kabooa ana buakaka te aomata n te buakaka” ao “tai irantangaingkami.” (I-Rom 12:17, 19) Irarikin anne, e bon ataia ae a kona aomata n “tiku n rau” ni karokoa te baere e nang karaoia n Aremaketon. (Taian Areru 37:7) Ngkana a kabwaka natannaomata n tataningaa te baere e na karaoia te Atua ao ni buaka, e iangoia ngkanne bwa bon te mwakuri ni kainikatonga ae kaotaki iai te un ae korakora ao katokanikaian te iango ni kani buaka ae aki kukurei iai. Ma e nang kaota unna n Aremaketon ao ni katoka itabararaaia botannaomata ao ni “katoki buaka, ao tokina tabon aonaba.” (Taian Areru 46:9, BG; Itaia 34:2 ) Ni koauana, a na toki buaka ni kabane n te buaka ae Aremaketon.

Tokin te buaka bon teuana mai buakoni kakabwaia aika bati n Ana Tautaeka n Uea te Atua. E taekina te tautaeka aei Iesu n ana tataro ngke e kangai: “E bia roko am tautaeka n uea. E na kakororaoaki nanom i karawa ao n te aonnaba naba.” ( Mataio 6:10) E na aki tii kamaunai buaka n aekaia nako te Atua ma e na kamauna naba te buakaka ae karika te buaka. * (Taian Areru 37:9, 10, 14, 15) Anne bukina ae a ingainga iai taan rimwin Iesu ni kan nori kakabwaia man Ana Tautaeka n Uea te Atua.—2 Betero 3:13.

Ma maanra ara tai n tataningaa Ana Tautaeka n Uea te Atua are e nang katoki maraki aika korakora, karawawata ao te buakaka? A kaotaki man taian taetae ni burabeti n te Baibara bwa e a kakoroaki bukina ngkai ti a maeka “ni kabaneani boong” n tain tokin te waaki ae ngkai i aon te aba. (2 Timoteo 3:1-5) * N te tai ae waekoa ao e nang karokoa n tokina kabaneani boong Ana Tautaeka n Uea te Atua n te buaka ae Aremaketon.

E taekinaki mai mwaina bwa te koraki ake a na kamaunaaki n te buaka ae Aremaketon bon te koraki ake a rawa n “ira nanon te Euangkerio ae taekan ara Uea ae Iesu.” (2 I-Tetaronike 1:8) Ma uringnga are e bon aki kukurei te Atua ni maten temanna n ikotaki naba ma aika buakaka. (Etekiera 33:11) Ibukina bwa “e aki tangira kamaunaan temanna” n te kabanea ni buaka aei, e a taraia ngkai bwa te rongorongo ae raoiroi ibukin ara Uea ae Iesu ‘e na tataekinaki n te aonnaba ni kabutaa bwa te bwai ni kaotioti nakoia botannaomata ni kabaneia’ imwain rokon te toki. (2 Betero 3:8, 9; Mataio 24:14; 1 Timoteo 2:3, 4) Eng, nanon aei bwa te uarongorongo n te aonnaba ni kabutaa ae karaoaki irouia Ana Tia Kakoaua Iehova, e a reke iai aia tai aomata ni boong aikai n ataa te Atua, n ongeaba nakon te rongorongo ae raoiroi ibukin Iesu ao ni maeka ma n nora te bong are ai akea iai te buaka.