Ruka 3:1-38
3 N ana ka-15 n tautaeka Kaitara* ae Tiberio, ngke e kowana Bontio Birato i Iutaia, ao te tia tautaeka* Erote*+ n te aono ni Kariraia, ao te tia tautaeka Biribo are tarina n aonon Iturea ma Terakoniti, ao Rutania e tautaeka n aonon Abirene,
2 n ana bong te mataniwi n ibonga* ae Annati ao Kaiaba+ naba, ao e roko ana taeka te Atua iroun Ioane+ are natin Tekaria n te rereua.+
3 Mangaia are e katabwanina te aba ae Ioretan ni kabutaa, n uarongorongoa taekan te bwabetito are tei ibukin te rairannano ibukini kabwaraani buure,+
4 n aron are koreaki n te boki ae ana taeka Itaia are te burabeti ae kangai: “Boni bwanaan temanna ae takarua n te rereua ni kangai: ‘Katauraoa kawain Iehova!* Kaetii+ kawaina imwaina.
5 A riai ni bane n taunaki mwarua, ao a na bane maunga ma tabuki ni kaboraoaki, ao a riai ni kaetaki kawai aika kiribwabwao, ao ni kaaoraoaki kawai aika kiribeubeu,
6 ao a na bane aomata n nora ana kakamaiu te Atua.’”*+
7 Mangaia are e taku Ioane nakoia aomata aika bati aika roko bwa a na bwabetitoaki irouna: “Ngkami aika bunia naeta aika baiba, antai ae tuangingkami bwa kam kona n rawea maiumi man te rekenikai+ ae i aoni kawaina n roko?
8 Mangaia ae kam na karikii uaa aika kakoauaa raoi rairan nanomi. Tai kangai i bon iroumi, ‘Bon tamara Aberaam.’ I tuangingkami bwa e kona te Atua ni karikiia natin Aberaam man atibu aikai.
9 Ni koauana, e a wene ngkai te tanai i wakaani kainnamwarake. Kaai nako ake a aki karikii uaa aika raraoi, a na koreaki n tewenakoaki n te ai.”+
10 Ao a titirakinna aomata aika bati ni kangai: “Tera ngkanne ae ti riai ni karaoia?”
11 E kaekaia ni kangai: “Ane uoua ana kunnikai,* e na anga teuana nakon ane akea ana kunnikai, ao e na karaoa naba aekakin anne, ane iai kanana.”+
12 A roko naba taan rikoa te taekiti bwa a na bwabetitoaki,+ ao a taku nakoina: “Te tia Reirei, tera ae ti riai ni karaoia?”
13 E taku nakoia: “Tai karakaa* te taekiti+ nakon are baireaki.”
14 A titirakinna naba tautia ni kangai: “Tera ae ti riai ni karaoia?” Ao e taku nakoia: “Tai babakanikawai nakon te aomata ke ni bukinna n te bukibuki ni kewe,+ ma kam na nanoraoi ni boomi.”
15 N taai akanne ao aomata a a boni kariariaa te Kristo ao a a bane n iangoa Ioane i nanoia ni kangai, “Tao ai kani ngaia te Kristo?”+
16 E anga te kaeka Ioane ni kangai nakoia ni kabane: “I bwabetitoingkami n te ran, ma e nang roko teuae korakora riki nakoiu, ae I aki tau ni kabwaraa kabaean+ ana kau. E na bwabetitoingkami n te taamnei ae raoiroi ao n te ai.+
17 E taua ana tiaabora i baina ibukini kaaurakean te uita, ao e na kaitiaka raoi bwian ana auti ni kaaki kun ni uita. E na urakin ana uita nakon te auti ni kaikobwai, ma e na kabueka kunin te uita n te ai ae aki kona ni mate.”
18 A bati naba ana reirei ni kaungaunga Ioane ake e anga, ao e teimatoa n tataekina te rongorongo ae raoiroi nakoia aomata.
19 Ma e boaaki Erote are te tia tautaeka n te aono arei iroun Ioane, ni kaineti ma Eroria are buun tarin Erote ao ni kaineti naba ma baike e karaoi Erote ni kabane aika bubuaka,
20 ao e a manga raoni riki ana mwakuri akanne ni kabane n aei: E kaina Ioane n te matawariki.+
21 Ao ngke a bwabetitoaki aomata ni kabane, ao e bwabetitoaki+ naba Iesu. Ngke e tabe n tataro ao e kaukaki karawa+
22 ao e ruonna te taamnei ae raoiroi ae kaoti n ai aron te taobe, ao e roko te bwanaa mai karawa ae kangai: “Bon Natiu ngkoe ae ko tangiraki, ae I kakatonga iroum.”+
23 Ana ririki Iesu+ ngke e moana ana mwakuri tao 30,+ ao e iangoaki bwanatin Ioteba,+ae natin Eri,
24 ae natini Mataata,ae natin Rewi,ae natini Mereki,ae natin Ianna,ae natin Ioteba,
25 ae natini Matatia,ae natin Amota,ae natin Naum,ae natin Eteri,ae natin Nakai,
26 ae natini Maata,ae natini Matatia,ae natin Temein,ae natin Ioteka,ae natin Iota,
27 ae natin Ioanan,ae natin Reta,ae natin Terubabera,+ae natin Tearetiera,+ae natin Neri,
28 ae natini Mereki,ae natin Ari,ae natini Kotam,ae natin Eremotam,ae natin Era,
29 ae natin Iesu,*ae natin Erietera,ae natin Iorim,ae natini Mataata,ae natin Rewi,
30 ae natin Timion,ae natin Iuta,ae natin Ioteba,ae natin Ionam,ae natin Eriakim,
31 ae natini Merea,ae natini Menna,ae natini Matata,ae natin Natan,+ae natin Tawita,+
32 ae natin Iete,+ae natin Obeta,+ae natini Boati,+ae natin Taremon,+ae natin Nation,+
33 ae natin Aminataba,ae natin Areni,*ae natin Etiron,ae natini Bereti,+ae natin Iuta,+
34 ae natin Iakoba,+ae natin Itaaka,+ae natin Aberaam,+ae natin Tera,+ae natin Naora,+
35 ae natin Teruka,+ae natin Reu,+ae natini Bereka,+ae natin Ebere,+ae natin Tiera,+
36 ae natini Kainan,ae natin Arebaketiata,+ae natin Tem,+ae natin Noa,+ae natin Rameka,+
37 ae natini Metutera,+ae natin Enoka,ae natin Iareta,+ae natini Maarareera,+ae natini Kainan,+
38 ae natin Enoti,+ae natin Teta,+ae natin Atam,+ae natin te Atua.
Taiani Kabwarabwara Mai Nano
^ Ae taekan Erote Antibati. Nora Nanon Taeka.
^ Nora Nanon Taeka.
^ Kuriiti, “te teterake,” ae te nati n uea ae tei n te aono anne ibukin te Embera n Rom.
^ Nora Nanon Taeka, “Mataniwi n ibonga.”
^ Ke, “ana anga ni kamaiu te Atua.”
^ Ke, “iai tataran ana kunnikai.”
^ Ke, “rikoa.”
^ “Iote,” ni koroboki nikawai tabeua.
^ “Ram,” n 1Ro. 2:9; Mt. 1:3, 4.
