2 I-Korinto 9:1-15
9 Ni kaineti ngkanne ma te mwakuri n ibuobuoki ibukia te koraki aika itiaki,*+ e aki kainnanoaki ae N na koroboki nakoimi,
2 bwa I atai nanomi ni kan ibuobuoki are I kamoamoaingkami iai nakoia Kristian ake i Maketonia, n taekinna bwa ai teuana ngkai aia ririki n tauraoi n ibuobuoki taari mai Akaia, ao a kaungaaki angia kaaini Maketonia n ingaingan nanomi.
3 Ma I kanakoatiia taari, bwa e kaawa n akea uaan ara kamoamoa ibukimi ni kaineti ma aei, ao kam aonga n tauraoi raoi, n aron are I aki toki n taekinna ibukimi.
4 Bwa ngkana a irai kaaini Maketonia ao a kuneingkami n aki tauraoi, ao ti na kamaamaeaki ngaira ma ngkami ibukin onimakinami iroura.
5 Mangaia ae I taku bwa e riai kaungaaia taari bwa a na moantaai ni kawaringkami ao ni moantaai ni katauraoa ami bwaintituaraoi are e a kamani baireaki iroumi, bwa e aonga n tauraoi bwa te bwaintituaraoi, ao tiaki te bwai ae aonikaiaki n anaaki.
6 Bwa ni kaineti ma aei, ao ane e unika ae karako, e na taia naba ae karako, ao ane e unika ae bati, e na taia naba ae bati.+
7 Ke e karaoa ae e kataua i nanona temanna ma temanna, tiaki n aron ae akea nanona* iai ke e tebonaki nako iai,+ bwa te Atua e tangira ane e anga ma kukurein nanona.+
8 Bwa e kona naba te Atua ni kabatiaa ana akoi ae rianako nakoimi ni bwaai nako, bwa a na tau mwaitin ami bwai n taai nako ibukini kainnanomi, ma a na kabatiaaki naba nakoimi baika kam kainnanoi ibukini karaoani mwakuri aika raraoi ni kabane.+
9 (N aron are koreaki ni kangai: “E bati* n anganga, ao e anganga nakoia akana maiu ni kainnano. E teimatoa ana raoiroi n aki toki.”+
10 Ao Teuare kabatiai koraa ni katauraoi nakon te tia ununiki ao te kariki ibukin te amwarake, e na katauraoi ao ni kamwaiti koraa nakoimi bwa kam na uniki ao e na karikirakei uaan ami raoiroi.)*
11 Kam anganaki kakabwaia n aekaia nako bwa kam aonga n tituaraoi n anganga n aaro nako, ao rinanon ara mwakuri e a kairiia aomata te tituaraoi aei bwa a na kaitaua te Atua,
12 ibukina bwa karaoan te mwakuri n ibuobuoki aei nakoia aomata e aki tii karekei baika kainnanoaki irouia te koraki aika itiaki,*+ ma e kauekei naba taeka ni kakaitau aika rangi ni bati nakon te Atua.
13 A neboa te Atua ibukina bwa te ibuobuoki are kam anga e kaotaki iai bwa kam ira nanon te baere kam taekinna i mataia aomata, ni kaineti ma te rongorongo ae raoiroi ibukini Kristo ao ibukin naba ae kam tituaraoi n angabwai nakoia ao nakoia aomata ni kabane.+
14 Ao a kakorakoraia n tataro ni bubutii ibukimi, ni kaotia naba bwa e korakora nanoia ni kan iraorao ma ngkami ibukin ana akoi ae rianako te Atua ae moanibaan te raoiroi, are reke iroumi.
15 Ke e katituaraoaki te Atua ibukin ana bwaintituaraoi ae akea boona ao akea n ai arona.
