2 I-Korinto 1:1-24
1 Ngai ae Bauro ae ana abotoro Kristo Iesu n ana kantaninga te Atua, ma tarira ae Timoteo,+ I koroboki nakoia kaain ana ekaretia te Atua i Korinto, n ikotaki naba ma te koraki aika itiaki* ni kabane ake a mena i Akaia ni kabutaa:+
2 Ke e mena iroumi te akoi ae rianako ma te rau mairoun te Atua ae Tamara, ao te Uea ae Iesu Kristo.
3 E na karaoiroaki te Atua ae Atuan ao Taman ara Uea ae Iesu Kristo,+ ae te Tama ae nananoanga+ ao te Atua ae anga te kabebetenano+ n aekana nako,
4 ae e kabebeteira* ni kataakira* nako,+ bwa ti aonga ni kona ni kabebeteia+ akana kataaki n aeka ni kataaki* nako, ni kabebeteara are ti karekea mairoun te Atua.+
5 Bwa n aron ae e kabatiaaki marakira ibukin te Kristo,+ ao ai arona naba bwa ti karekea kabebeteara ae bati rinanon te Kristo.
6 Ma ngkana ti kaaitara ma kataaki,* ao ti kataaki ibukini kabebeteami ao kamaiuami. Ao ngkana ti kabebeteaki, ao ti kabebeteaki ibukini kabebeteami are mwamwakuri ni buokingkami bwa kam na nanomwaaka ni maraki ake ti maraki naba iai.
7 Ao e nene ara kantaninga ibukimi, ngkai ti ataia bwa kam ibuokanibwai ma ngaira n taiani maraki, ao ai arona naba, bwa kam na ibuokanibwai ma ngaira naba n te kabebeteaki.+
8 Bwa ti tangiringkami taari bwa kam na ataa taekan te rawawata are riki nakoira n te aono n Atia.*+ Ti taonaki n te rawawata ae rangi n riao ae riaoni korakorara, n te aro are ti a nanououa bwa ti na maiu ke ti na aki.+
9 Ni koauana, ti kanamakinna bwa kaanga e a motikaki taekara nakon te kamateaki. E riki aei bwa ti aonga n aki onimakinira i bon iroura, ma ti na onimakina te Atua+ ae kakautiia maate.
10 E kamaiuira man te rawawata ae kamamate aei, ao ti kantaningaia bwa e na boni manga kamaiuira riki.+
11 Kam kona naba ni buokira n ami kakorakora n tataro ni bubutii ibukira,+ bwa a aonga ni bati aika a na kakaitau ibukin akoara ae reke iroura ngke a kaekaaki aia tataro aomata aika bati.*+
12 Aio te bwai ae ti kamoamoa iai, ao a itiaki mataniwin nanora ngkai ti taekina aei, bwa ti a tia ni maiu i buakoia aomata ao e a moamoa riki i buakomi, n te itiaki ao n te nano ni koaua are mairoun te Atua ao tiaki n te wanawana are mai aon te aba,+ ma ti onimakina ana akoi ae rianako te Atua.
13 Bwa ti bon aki korei nakoimi baika kam aki atai, ma tii ake kam kona ni wareki* ao n ota iai, ao I kantaningaingkami bwa kam na teimatoa n ota raoi ni baikai,*
14 n aron naba are a a tia n ota iai tabeman i buakomi bwa ami bwai ni kamoamoa ngaira, n aromi naba ae kam na riki bwa ara bwai ni kamoamoa n ana bong ara Uea ae Iesu.
15 Mangaia ae ibukin te aki nanokokoraki aei, ao I iangoia bwa N na kawaringkami moa, bwa kam aonga ni manga kukurei riki,*
16 bwa I iangoia bwa N na kawaringkami i aoni kawaiu nako Maketonia, ao ni manga okiringkami mai Maketonia, ao N na bakaborauaki iroumi nako Iutaia.+
17 Mangaia ae ngke e reke au iango anne, ao te koaua bwa I kakeaa bongana? Ke baika I iangoi bwa N na karaoi, I karaoi ma kantaningaani kakukureian te rabwata, n te aro are N na kangai “Eng, eng” ao imwina, “Tiaki, tiaki”?
18 Ma e kona n onimakinaki te Atua, bwa te baere ti taekinna nakoimi bon tiaki “eng” ao imwina “tiaki.”
19 Bwa Natin te Atua are Iesu Kristo, are ti uarongorongoa taekana i buakomi, are ngai ma Tirouano* ao Timoteo,+ e aki riki bwa te “eng” ao imwina “tiaki,” ma te “eng” irouna bon te “eng.”
20 Bwa n aki ongeia bwa mwaitira ana berita te Atua, ma a bane n riki bwa te “eng” rinanon teuaei.+ Mangaia ae rinanon naba teuaei are e atongaki iai “Amen” nakon te Atua,+ bwa ti aonga n neboa te Atua iai.
21 Ma bon te Atua ae kamatoaingkami ma ngaira bwa ana bwai Kristo, ao e a tia ni kabirira.+
22 E a tia naba ni katokaa ana bwai ni kanikina i aora+ ao e anganira kakoauaan te bwai ae e na roko,* ae taekan te taamnei ae raoiroi+ i nanora.
23 I kaotia i matan te Atua bwa I tuai n roko i Korinto ibukina bwa I aki kani karawawataingkami, ngkana tiaki te koaua aei ao e na reke kaiu.
24 I aki taekinna bwa taan ueana ami onimaki+ ngaira, ma raao ni mwakuri ngaira ibukini kimwareireimi, bwa kam teimatoa ngkai ibukina bwa kam onimaki.
Taiani Kabwarabwara Mai Nano
^ Ke, “tabu.”
^ Ke, “n rawawatara.”
^ Ke, “n rawawata.”
^ Ke, “kaungaira.”
^ Ke, “rawawata.”
^ Nora Nanon Taeka.
^ Ke, “ibukin ubu aika bati aika tataro.”
^ Ke tao, “baike kam a kaman atai.”
^ Kuriiti, “ni karokoa te toki.”
^ Ke tao, “bwa kam aonga ni kakabwaiaaki uatai.”
^ E aranaki naba bwa Tira.
^ Ke, “te kabwakamwane (te mwane ni kakoaua); te bwai ni kakoaua ibukin te bwai ae e na roko.”
