2 I-Korinto 6:1-18
6 Ngkai ti uaia ni mwakuri ma te Atua,+ ti a manga butiingkami bwa kam na butimwaea ana akoi ae rianako, bwa e kaawa ni matebuaka.+
2 Bwa e taku: “I ongo iroum n tain akoan te aba, ao I buokiko n te bong ni kamaiu.”+ Noria! Boni ngkai te tai ae angaraoi riki ibukin akoan te aba. Noria! Boni ngkai te bong ni kamaiu.
3 Ti aki karaoa te bwai teuana ae e na bwaka iai temanna, bwa e kaawa n tiribureaki ara mwakuri ni minita.+
4 Ma ti kaotiotira bwa ana tabonibai+ te Atua ngaira n aanga nako, ngkai ti nanomwaaka ni baika bati, n taiani karawawataaki, n taiani kainnano, n taiani kangaanga,+
5 n te ororeaki, n te kakarabuutinaki,+ n te kakakiriweaki, n taiani bekutata, n te aki mamatu n te tairiki, n taai ake akea iai te amwarake,+
6 n te itiaki, n te atatai, n te taotaonakinnano,+ n te akoi,+ n te taamnei ae raoiroi, n te tangira ae aki mwamwanaa te aba,+
7 n te taetaenikawai ae koaua, ni mwaakan te Atua,+ ao n tauakini bwaai ni buaka ibukin te raoiroi+ ni baira ae te angaatai* ao ae te angamaing,*
8 rinanon te karineaki ao te aki karineaki, rinanon te uaraoaki ao te kamoamoaaki. Ti taraaki bwa taani kewea te aba ngaira ma bon taan atonga ae koaua.
9 Ti taraaki bwa aomata aika ti aki ataaki ma ti bon ataaki. Ti taraaki bwa ti nangi mate* ma noria! ti boni maiu.+ Ti taraaki bwa ti katuuaaeaki* ma ti bon aki kabureaki nakon te mate.+
10 Ti taraaki bwa ti nanokawaki ma ti boni kimwareirei n taai nako. Ti taraaki bwa ti maiu ni kainnano ma ti boni kabatiai kaubwaia aomata aika bati. Ti taraaki bwa akea ara bwai ma bon iai bwaai ni kabane+ iroura.
11 Ti aki wimakiki n taetae nakoimi ngkami aika I-Korinto, ao e kamwawawaaki nanora.
12 Ti aki tiatiana* kaotiotan tangirami iroura,+ ma kam tiatiana kaotiotan tangirara iroumi.
13 Mangaia ae ibukini kaekaan anne—I taetae nakoimi kaanga nakoia natiu,—kam na kamwaawawai naba nanomi.*+
14 Kam na tai reitaki* ma ake a aki onimaki+ bwa bon te reitaki buaka anne. Bwa te iraorao raa iraoraon te raoiroi ma te buakaka?+ Ke tera ae a ibuokanibwai iai te oota ma te rotongitong?+
15 Ao tera ae e katiteuanaaki iai Kristo ma Beriara?*+ Ke tera ae e ibuokanibwai iai ane e onimaki* ma ane e aki onimaki?+
16 Ao tera ae e irekereke iai ana tembora te Atua ma bouannanti?+ Bwa ana tembora te Atua ae maiu+ ngaira, n aron are e taekinna te Atua ni kangai: “N na mamaeka i buakoia+ ma n nakonako i buakoia, ao N na riki bwa Atuaia, ao a na riki bwa au aomata.”+
17 “E taku Iehova,* ‘Mangaia ae kam na otinako mai buakoia, ao kaokoroingkami, ao katoka ringakin te bwai ae kamwara,’”+ “‘ao N na butimwaeingkami.’”+
18 “‘Ao N na riki bwa tamami,+ ao kam na riki bwa natiu mwaane ma natiu aine,’+ bon ana taeka Iehova* ae Moan te Mwaaka.”
Taiani Kabwarabwara Mai Nano
^ Tao ibukini kamanoan ane e buakanaki.
^ Tao ibukin niniakin ane e buakanaki.
^ Ke, “Ti iangoaki bwa ti tau ni mate.”
^ Ke, “reireinaki ni kaetietaki.”
^ Ke, “karibwaa.”
^ Ke, “ngkami naba kam na kamwaawawaingkami.”
^ Kuriiti, “Tai katoabuakako ngkana ko amoa te amo.”
^ Ke, “te aomata ae kakaonimaki.”
^ Man te taetae n Ebera ae nanona, “Akea Uaana,” ae kaineti ma Tatan.
^ Nora Buk. A5.
^ Nora Buk. A5.
