Nou tout bézwen soumaké pou bay nou fanmi sa i bézwen pou viv (Proverbes 30:8). Épi, « soumaké-a pouvé protéjé nou » (Ecclésiaste 7:12). Pitèt sa rèd pou zòt palé di soumaké ansanm, mé pa lésé zafè soumaké-a mété problèm an mitan zòt maryaj (Éphésiens 4:32). Mouché ké madanm divèt fè yé konpanyen konfyans é désidé ansanm kouman yé ké dépansé yé soumaké.

SA LABIB-A KA DI : « Si roun annan zòt lé fè roun kaz, ès i pa ké asiz anvan pou kalkilé konmyen soumaké sa ké kouté l’ é wè si i gen asé pou fini kaz-a ? » (Luc 14:28). Sa enpòrtan pou zòt pran tan désidé ansanm kisa zòt ké fè ké zòt soumaké (Amos 3:3). Chaché savé sa zòt bézwen ké kantité soumaké zòt pouvé mété pou sa (Proverbes 31:16). A pa paské zòt gen soumaké pou achté roun bagaj ki zòt divèt achté l’. Fè tousa zòt pouvé pou pa trapé dèt. A pou zòt dépansé sèlman soumaké zòt ganyen (Proverbes 21:5 ; 22:7).

SA OU POUVÉ FÈ :

• Lò lafen mwa-a rivé si i ka rété zòt roun ti soumaké, atò désidé ansanm sa zòt ké fè ké l’.

• Si zòt pa gen asé soumaké, désidé sa zòt ké fè pou dépansé mwens. Parèkzanp, pasé zòt alé achté manjé dèrò, fè zòt manjé zòt menm.

SA LABIB-A KA DI : « Nou ka fè tout bagaj roun fason ki drèt, pou Jéova, mé osi pou moun-yan » (2 Corinthiens 8:21). Pa séré pou ou mari ouben ou madanm sa ou ka touché ni sa ou ka dépansé.

Anvan ou pran roun gran désizyon ké soumaké-a, toujou chaché savé sa ou mari ouben ou madanm ka pansé (Proverbes 13:10). Si ou ka toujou pran tan palé di sa, ou ké toujou rété byen ké ou mari ouben ou madanm. Pa wè soumaké ou ka touché-a kou oupa soumaké, mé kou sa di fanmi-a (1 Timothée 5:8).

SA OU POUVÉ FÈ :

• Désidé ki kantité soumaké zòt chak pouvé dépansé san doumandé ròt-a.

• Pa antann roun problèm lévé pou palé di zafè soumaké.