Lò dé moun ka maryé yé ka divini roun fanmi. A vré, ou ké toujou kontan ké rèspèkté ou papa ké ou manman, mé aprézan, moun-an ki pi enpòrtan pou ou, a ou mari ouben ou madanm. Pitèt roun ran annan zòt fanmi pa ka rivé asèpté sa. Prensip ki annan Labib-a pouvé idé ou kontinyé gen bon rélasyon ké ou paran é an menm tan travay pou tout bagaj byen maché annan ou maryaj.

SA LABIB-A KA DI : « A pou to bay to papa ké to manman lònò » (Éphésiens 6:2). Ki ou gran ki ou piti, ou ké toujou divèt bay ou papa ké ou manman lònò ké rèspè. A pou ou asèpté ki ou mari ouben ou madanm li menm osi gen roun papa ké roun manman, é i divèt pran swen di yé. « Lanmou pa jalou », atò, ou pa divèt pè rélasyon ou mari ouben ou madanm gen ké so papa ouben ké so manman (1 Corinthiens 13:4 ; Galates 5:26).

SA OU POUVÉ FÈ :

• Pa di dé bagaj kou : « To fanmi toujou ka kritiké mo » ouben « To manman pa janmen kontan sa mo ka fè ».

• A pou ou éséyé wè bagaj-ya kou ou mari ouben ou madanm ka wè yé.

SA LABIB-A KA DI : « Wonm-an ké lésé so papa ké so manman, é i ké rété ké so madanm, é yé ké divini rounsèl lachè » (Genèse 2:24). Menm apré ou maryé, pitèt ou papa ké ou manman ké kontinyé pansé yé rèsponsab di ou é yé ké lé mélé yé kò annan zòt zafè plis ki sa yé divèt.

A ou ké ou mari ouben ou madanm ki pou mété zòt kò dakò asou limit zòt ké bay yé, é a pou èspliké yé sa jantiman. Ou pouvé di yé bagaj-ya kou yé fika san palé rèd bay yé (Proverbes 15:1). Si ou gen imilité, dousèr ké pasyans, ou ké gen roun bon rélasyon ké fanmi ou mari ouben ou madanm é zòt ké kontinyé « sipòrté zòt konpanyen ké lanmou » (Éphésiens 4:2).

SA OU POUVÉ FÈ :

• Si ou ka trouvé ki ou papa ké ou manman ka mélé yé kò tròp annan zòt lavi, a pou zòt toulédé palé di sa lò zòt ké byen trankil.

• Mété zòt kò dakò asou fason zòt ké réglé sa sitiasyon-an.