A Jéova a ki maryé prémyé mouché-a ké prémyé madanm-an. Labib-a ka di ki apré i fè fanm-an, i « mennen l’ pou wonm-an ». Adan té kontan tèlman i di : « Gadé, men zo ki soti di mo zo é lachè ki soti di mo lachè » (Genèse 2:22, 23). Jouk jòdla, Jéova lé ki moun maryé gen tchò kontan.

Lò nou ka désidé maryé, défwa nou ka pansé ki tout bagaj ké roulé ron. Mé a pa pou nou tronpé nou kò : menm roun mouché ké roun madanm ki vréman kontan yé konpanyen ké jwenn tribilasyon (1 Corinthiens 7:28). Annan sa ti liv-a, ou ké jwenn prensip ki annan Labib-a. Si ou ka swiv yé, ou ké gen tchò kontan annan ou maryaj, é ou fanmi osi ké gen tchò kontan (Psaume 19:8-11).

SA LABIB-A KA DI : A mari-a ki sa chèf fanmi-a (Éphésiens 5:23).

Ou ki sa roun mari, Jéova lé ou pran swen di ou madanm ké tandrès (1 Pierre 3:7). Jéova fè l’ pou i idé ou, é i lé ou aji ké li ké rèspè ké lanmou (Genèse 2:18). Tèlman ou kontan li ou divèt fè bagaj i bézwen pasé anvan sa ou menm bézwen (Éphésiens 5:25-29).

Ou ki sa roun madanm, Jéova lé ou rèspèkté ou mari ké tout ou tchò. I lé ou idé l’ byen fè travay i bay li-a (1 Corinthiens 11:3 ; Éphésiens 5:33). A pou ou soutni l’ é a pou ou travay ké li ké tout ou tchò (Colossiens 3:18). Si ou ka fè konsa, ou mari ké Jéova ké trouvé ou pi jòlòt ankò (1 Pierre 3:1-6).

SA OU POUVÉ FÈ :

• Doumandé ou mari ouben ou madanm kouman ou pouvé sa roun miyò mari ouben roun miyò madanm. Byen kouté sa i ké di ou é fè tousa ou pouvé pou divini miyò.

• A pou ou gen pasyans. Zòt toulédé ké bézwen tan pou anprann fè tousa ki fo pou fè tchò zòt konpanyen kontan.

SA LABIB-A KA DI : Mété bézwen ou mari ouben ou madanm douvan (Philippiens 2:3, 4). Ou mari ouben ou madanm divèt gen bokou valò pou ou, é sonjé ki Jéova lé so fidèl-ya « dous ké tout moun » (2 Timothée 2:24). « Lò roun moun ka palé san réfléchi a kousidiré i ka bay kout sab, mé paròl roun moun saj ka géri. » Atò, byen réfléchi anvan ou di roun bagaj (Proverbes 12:18). Lèspri Jéova ké idé ou byen palé ké lanmou (Galates 5:22, 23 ; Colossiens 4:6).

SA OU POUVÉ FÈ :

• Anvan ou palé ké ou mari ouben ou madanm asou roun bagaj enpòrtan, a pou ou priyè Bondjé. Doumandé li idé ou rété kalm épi asèpté ki ou mari ouben ou madanm gen sopa lidé.

• Byen réfléchi asou sa ou ké di-a é asou fason ou ké di l’.

SA LABIB-A KA DI : Dipi ou maryé, ou ka fè « rounsèl lachè » ké ou mari ouben ou madanm (Matthieu 19:5). Mé kanmenm, zòt toujou sa dé moun ki pa toujou ka wè bagaj-ya menm fason-an. A pou sa zòt divèt anprann tonbé dakò asou fason zòt ka santi bagaj-ya annan zòt tchò é asou fason zòt ka wè yé (Philippiens 2:2). Sa enpòrtan pou zòt mété zòt kò ansanm pou pran bon désizyon. Labib-a ka di : « Lò nou ka doumandé konsèy, nou ka rivé fè sa nou prévwè fè » (Proverbes 20:18). Lò zòt ka pran désizyon enpòrtan ansanm, a pou zòt lésé prensip ki annan Labib-a gidé zòt (Proverbes 8:32, 33).

SA OU POUVÉ FÈ :

• A pa pou ou di ou mari ouben ou madanm sèlman sa ou ka pansé : a pou ou di li sa ou gen ofon ou tchò.

• Anvan ou fè roun bagaj, pran tan doumandé ou mari ouben ou madanm sa i ka pansé di sa ou lé fè.