Miweku lɛ jɛ Tonga, yɛ Pasifik Wuoyi-Anaigbɛ, ŋshɔkpɔi aaafee 170 yɔɔ jɛmɛ. No mli lɛ, wɔbɛ nɔ ko tsɔ, lait kɛ lɔle bɛ jɛmɛ. Shi wɔyɛ paipi ni hãa wɔ nu kpakpa, kɛ wuɔi fioo yɛ wɔshĩa lɛ. Kɛ́ ahã skul gbɛ lɛ, mikɛ minyɛmimɛi hii enyɔ lɛ yawaa wɔpapa kɛtsuɔ nii yɛ wɔŋmɔ lɛ mli; wɔdu akwadu, yɛlɛ, kooko kɛ duade. Mipapa hɔ̃ɔ ŋmɔshi nibii nɛɛ kɛfataa shika fioo ni enáa yɛ nitsumɔi bibii komɛi ni etsuɔ lɛ mli lɛ he, ni ekɛkwɛɔ wɔweku lɛ. Ŋshɔkpɔ nɛɛ nɔ bii lɛ yɛ bulɛ ni mli kwɔ kɛhã Biblia lɛ, ni nakai nɔŋŋ eji yɛ mipapa gbɛfaŋ, no hewɔ lɛ, wɔyaa sɔlemɔ daa. Shi loloolo lɛ, wɔnu he akɛ nɔ pɛ ni baanyɛ ahã wɔná shihilɛ kpakpa ji ni wɔfã kɛya maji ni yɔɔ nii waa lɛ eko nɔ.

 Be ni miye afii 16 lɛ, mitsɛkwɛ ko to gbɛjianɔ koni wɔweku lɛ afã kɛya California, yɛ U.S.A. Enɛ ji tsakemɔ ko ni wa waa ni ebi ni wɔfee, ejaakɛ esoro bɔ ni wɔhiɔ shi wɔhãa kwraa yɛ jɛmɛ bii lɛ anɔ lɛ he! Eyɛ mli akɛ wɔná shika fe tsutsu lɛ moŋ, shi shihilɛ ni yɔɔ akutso mli ni wɔhi lɛ ehiii kwraa, ejaakɛ awuiyeli kɛ tsofai ni akɛtsuɔ nii yɛ gbɛ ni ejaaa nɔ ebu yɛ jɛmɛ. Bei pii kɛ́ je na lɛ wɔnuɔ ni aatswa tu, ni wɔkutsoŋbii lɛ ateŋ mɛi pii sheɔ awuiyelɔi akui lɛ gbeyei. Mɛi babaoo hiɛɔ tui kɛbuɔ amɛhe loo koni amɛtswa kɛ́ naataamɔi ba. Bianɛ po lɛ, tuŋtɛ lɛ eko yɛ mitsitsi mli yɛ naataamɔi nɛɛ eko hewɔ.

 Be ni miyaa sɛkɛndre skul lɛ, no mli lɛ misumɔɔ ni mafee minii tamɔ skulbii krokomɛi lɛ. Fiofio lɛ mikɛ mihe wo henaabuamɔi ni yɔɔ hoo, daanumɔ shɛii, basabasafeemɔi, kɛ tsofai ni akɛtsuɔ nii yɛ gbɛ ni esaaa nɔ lɛ amli. Sɛɛ mli lɛ, mibɔi kokein fuu, ni eka mihe. Mibɔi juu koni maná shika kɛhe tsofai nɛɛ. Eyɛ mli akɛ miweku lɛ mli bii lɛ kɛ sɔlemɔyaa shwɛɛɛ kwraa moŋ, shi amɛteŋ mɔ ko kwraa wooo mi ŋaa ni baahã mate shi mawo tipɛŋfoi anɔnyɛɛ ni hãa mifeɔ nibii gbohii lɛ. Polisi mɔ mi shii abɔ yɛ yiwalɛ nibii ni mifeɔ lɛ hewɔ. Mishihilɛ bɔi fitemɔ kwraa agbɛnɛ! Naagbee lɛ, awo mi tsuŋ.

 Gbi ko yɛ afi 1997 be ni miyɔɔ tsuŋwoohe lɛ, mɔ ko ni lɛ hu awo lɛ tsuŋ lɛ na akɛ mihiɛ Biblia. No mli lɛ, aaye Blonya; eji be ni Tongabii babaoo buɔ akɛ eyɛ krɔŋkrɔŋ waa. Ebi mi kɛji mile nɔ ni Biblia lɛ wieɔ yɛ Kristo fɔmɔ lɛ he, shi minyɛɛɛ mahã lɛ hetoo ejaakɛ mileee. Ekɛ mi kane Yesu fɔmɔ he sane yɛ Biblia mli, ni mina akɛ nibii babaoo ni afeɔ yɛ Blonya beiaŋ lɛ bɛ Biblia lɛ mli. (Mateo 2:1-12; Luka 2:5-14) Minaa kpɛ mihe waa, ni mibi mihe akɛ, mɛɛ nɔ kroko hu yɔɔ Biblia lɛ mli ni mileee. No mli lɛ, nuu nɛɛ yaa kpeei ni Yehowa Odasefoi lɛ feɔ yɛ tsuŋwoohe lɛ eko, no hewɔ lɛ mikpɛ miyiŋ akɛ mikɛ lɛ baaya. Nakai beiaŋ lɛ, amɛmiikase Biblia mli wolo ni ji Kpojiemɔ lɛ. Eyɛ mli akɛ minuuu nibii ni asusu he lɛ pii ashishi moŋ, shi miyɔse akɛ nɔ fɛɛ nɔ ni atsɔɔ lɛ jɛ Biblia lɛ mli.

 Be ni Odasefoi lɛ bi mi kɛ́ masumɔ ni amɛkɛ mi akase Biblia lɛ, mikɛ miishɛɛ kpɛlɛ nɔ. Mibaná mile Biblia mli shiwoo akɛ wɔsɛɛ lɛ, shikpɔŋ lɛ baatsɔ paradeiso, ni no ji klɛŋklɛŋ kwraa ni minu sane nɛɛ. (Yesaia 35:5-8) Mibana faŋŋ hu akɛ dani masa Nyɔŋmɔ hiɛ lɛ, esa akɛ mafee tsakemɔi wuji komɛi yɛ mishihilɛ mli. Miyɔse akɛ Yehowa Nyɔŋmɔ eŋmɛŋ gbɛ ni mɔ ko afee nibii fɔji ni mifeɔ lɛ eko yɛ paradeiso ni ewo shi akɛ ebaaba lɛ mli. (1 Korintobii 6:9, 10) No hewɔ lɛ, mikpɛ mli akɛ maye mimlifu nɔ, makpa zigareti shɛremɔ, makpa dãa tɔɔ, ni mikɛ tsofai tsuŋ nii yɛ gbɛ ni esaaa nɔ dɔŋŋ.

 Yɛ afi 1999 mli be ni eshwɛ fioo ni abaajie mi lɛ, tsuŋwoohe nɔkwɛlɔi lɛ kɛ mi tee tsuŋwoo he kroko. Miye fe afi ni minyɛɛɛ mikɛ Odasefoi ashãra. Shi mitswa mifai shi akɛ maya nɔ mafee tsakemɔi. Yɛ afi 2000 lɛ mli lɛ nɔyeli lɛ fo hegbɛ ni akɛhã mi akɛ manyɛ mahi United States lɛ mli, ni ashwie mi kɛtee Tonga.

 Be ni miyashɛ Tonga lɛ, oya nɔŋŋ ni mitao Yehowa Odasefoi lɛ asɛɛgbɛ ni amɛkɛ mi tsa Biblia mli nikasemɔ lɛ nɔ. Minya nikasemɔ lɛ he waa, ni be ni miyɔse akɛ, bɔ ni amɛkɛ ŋmalɛi fĩɔ nibii ni amɛtsɔɔ mi lɛ asɛɛ lɛ, nakai pɛpɛɛpɛ ji bɔ ni Odasefoi ni yɔɔ United States lɛ hu feɔ lɛ, ehã mihe jɔ̃ mihe waa.

 Ale mipapa waa yɛ he ni wɔyɔɔ lɛ, ejaakɛ eyɛ gbɛnaa wulu ko yɛ sɔlemɔ ni eyaa lɛ mli. No hewɔ lɛ, shishijee lɛ, miweku lɛ naaa he miishɛɛ akɛ mikɛ Yehowa Odasefoi lɛ miibɔ. Shi sɛɛ mli be ni mifɔlɔi na akɛ Biblia shishitoo mlai ni mikaseɔ lɛ ehã miikpa misui gbohii lɛ, amɛná miishɛɛ waa.

 Nɔ kome ni bawa kɛhã mi akɛ makpa ji, dãa ko ni atsɛɔ lɛ kava ni anuɔ waa yɛ wɔmaŋ lɛ mli lɛ. Tongabii fiteɔ ŋmɛlɛtswai pii daa otsi kɛnuɔ dãa nɛɛ, eji dãa ni akɛ shitɔ shishifai feɔ, ni hãa mɔ he jɔɔ ni ewɔɔ waa. No hewɔ lɛ, ni miku misɛɛ kɛba wɔmaŋ lɛ mli lɛ, daa gbɛkɛ lɛ miyaa he ko ni ahɔ̃ɔ kava yɛ, ni minuɔ kava nɛɛ aahu kɛyashiɔ mileee nɔ ni yaa nɔ dɔŋŋ. Nanemɛi ni mikɛbɔ lɛ hu fata he ni eba lɛ nakai, ejaakɛ amɛnyaaa Biblia mli anɔkwalei lɛ ahe. Sɛɛ mli lɛ, aye abua mi ni mina akɛ Nyɔŋmɔ bɛ nibii gbohii ni mifeɔ lɛ ahe miishɛɛ kwraa. Mifee tsakemɔi yɛ mishihilɛ mli bɔ ni afee ni Nyɔŋmɔ ajɔɔ mi ni ená mihe miishɛɛ.

 Mibɔi Yehowa odasefoi akpeei lɛ fɛɛ yaa. Shãramɔ ni mikɛ mɛi ni amɛ hu amɛmiibɔ mɔdɛŋ ni amɛsa Nyɔŋmɔ hiɛ lɛ shãra lɛ ye ebua mi ni mikpa nibii gbohii nɛɛ. Yɛ afi 2002 lɛ, abaptisi mi akɛ Yehowa Odasefonyo.

 Miná Nyɔŋmɔ tsuishitoo lɛ he sɛɛ waa, ejaakɛ Biblia lɛ kɛɔ akɛ: ‘Yehowa toɔ etsui shi ehãa nyɛ, ejaakɛ esumɔɔɔ akɛ akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui.’ (2 Petro 3:9) Kulɛ, ekpãtã jeŋ fɔŋ nɛɛ hiɛ jeeŋmɔ, shi eto etsui shi koni gbɔmɛi tamɔ mi atsake ni amɛkɛ lɛ abɔ naanyo. Efeɔ mi akɛ eesumɔ ni ekɛ mi atsu nii kɛye abua mɛi krokomɛi ni amɛ hu amɛtsake.

 Yehowa ye ebua mi ni minyɛ mifee tsakemɔi koni mishihilɛ akafite kwraa. Amrɔ nɛɛ mijuuu mɛi ashika ni mikɛyahe nibii ni baanyɛ akpãtã miwala hiɛ lɛ dɔŋŋ. Moŋ lɛ, miyeɔ mibuaa mikutsoŋbii lɛ koni amɛ hu amɛbatsɔmɔ Yehowa nanemɛi. Atsɛɔ miŋá ni misumɔɔ lɛ Tea, miná lɛ kɛjɛ Yehowa Odasefoi lɛ ni mikɛbɔ lɛ ateŋ. Wɔfɔ binuu kome, ni wɔkɛ lɛ fɛɛ yɛ miishɛɛ akɛ weku. Wɔkɛ lɛ fɛɛ tsɔɔ mɛi hiɛnɔkamɔ ni Biblia lɛ kɛhãa lɛ, no ji wɔsɛɛ lɛ, abaahi shi kɛya naanɔ yɛ toiŋjɔlɛ mli yɛ paradeiso.