Mɛni Biblia Kɛɔ Yɛ Dãa He? Ani Kɛ́ Onu Dãa Lɛ, Ofee Esha?
Hetoo ni Biblia lɛ kɛhãa
Tɔ̃mɔ bɛ he akɛ okɛ hiɛshikamɔ baanu dãa fioo. Biblia lɛ wieɔ wain he akɛ eji nikeenii ni jɛ Nyɔŋmɔ ŋɔɔ, ni ebaanyɛ ehã wɔmii ashɛ wɔhe. (Lala 104:14, 15; Jajelɔ 3:13; 9:7) Biblia lɛ hu hãa anaa akɛ abaanyɛ akɛ dãa atsu nii akɛ tsofa.—1 Timoteo 5:23.
Be ni Yesu yɔɔ shikpɔŋ lɛ nɔ lɛ, enu dãa. (Mateo 26:29; Luka 7:34) Yɛ enaakpɛɛnii ko ni ehé gbɛ́i waa lɛ mli lɛ, Yesu hã nu tsɔ wain, ni ekɛfee ejurɔ yɛ yookpeemɔ henaabuamɔ ko shishi.—Yohane 2:1-10.
Oshara ni yɔɔ dãanumɔ babaoo he
Eyɛ mli akɛ Biblia lɛ wieɔ sɛɛnamɔ ni yɔɔ dãa he moŋ, shi ewieɔ eshiɔ dãanumɔ babaoo kɛ dãatɔɔ fɛɛ. No hewɔ lɛ, kɛ́ Kristofonyo ko kpɛ mli akɛ ebaanu dãa lɛ, esa akɛ ekɛ hiɛshikamɔ anu fioo kɛkɛ. (1 Timoteo 3:8; Tito 2:2, 3) Biblia lɛ hãa wɔ yiŋtoi babaoo hewɔ ni esaaa akɛ wɔnuɔ dãa babaoo.
Ehãaa anyɛ ajwɛŋ jogbaŋŋ, ni ehãa afeɔ nibii ni esaaa. (Abɛi 23:29-35) Mɔ ko ni etɔ dãa lɛ nyɛŋ aye Biblia famɔ nɛɛ nɔ, ekɛɔ akɛ: ‘Nyɛŋɔ nyɛgbɔmɔtsei lɛ nyɛdamɔ shi akɛ afɔle ní hiɛ kã ni he tse ní sa Nyɔŋmɔ hiɛ ní nyɛjamɔ lɛ afee mumɔŋ jamɔ.’—Romabii 12:1.
Dãanumɔ babaoo “fiteɔ mɔ jwɛŋmɔ” ni ehãaa mɔ anyɛ afee nɔ ni ja.—Hoshea 4:11; Efesobii 5:18.
Ebaanyɛ ehã oye ohia, ni ebaanyɛ ehã helai ni gbeɔ mɔ amɔ bo.—Abɛi 23:21, 31, 32.
Dãanumɔ babaoo kɛ dãatɔɔ esaaa Nyɔŋmɔ hiɛ.—Abɛi 23:20; Galatiabii 5:19-21.
Mɛni baatsɔɔ akɛ minu dãa fe nine?
Kɛ́ mɔ ko nu dãa bɔ ni hã egba lɛ diɛŋtsɛ loo mɛi krokomɛi anaa lɛ, belɛ enu dãa fe nine. Biblia lɛ tsɔɔ akɛ, jeee ja mɔ ko enu dãa bɔ ni enyɛɛɛ nɔ ko efee dani abaakɛɛ etɔ, moŋ lɛ kɛ́ mɔ lɛ nu dãa ni enifeemɔ tsake, enyɛɛɛ enyiɛ jogbaŋŋ, ebɔi naataamɔ, ewiemɔ tsake, loo enyɛɛɛ ewie jogbaŋŋ lɛ, belɛ etɔ dãa ji no. (Hiob 12:25; Lala 107:27; Abɛi 23:29, 30, 33) “Dãanumɔ babaoo” baanyɛ ahã mɛi ni sumɔɔɔ ni amɛtɔɔ dãa po ‘afee yeyeeye,’ ni amɛyeŋ amɛhe yɛ nibii gbohii ni jɛɔ mli kɛbaa lɛ ahe kɔkɔɔkɔ.—Luka 21:34, 35.
He ni atsiɔ kɛjeɔ dãanumɔ he kwraa
Biblia lɛ hãa aleɔ be hu ni esaaa akɛ anuɔ dãa kwraa:
Kɛ́ ebaagba mɛi anaa.—Romabii 14:21.
Kɛ́ maŋ lɛ mla eŋmɛɛɛ gbɛ akɛ anu dãa.—Romabii 13:1.
Kɛ́ mɔ ko nyɛɛɛ aye ehe nɔ yɛ dãanumɔ mli. Esa akɛ mɛi ni dãanumɔ babaoo kɛ dãatɔɔ ebatsɔ amɛsu lɛ abɔ mɔdɛŋ ni amɛkɛ hiɛdɔɔ atsu he nii.—Mateo 5:29, 30.
Ekolɛ Obaasumɔ Enɛ Hu
SUI KƐ NIFEEMƆI NI EKA MƆ HE
Dãa—Te Obaafee Tɛŋŋ Okwɛ Ni Okanu Fe Nine Loo Enumɔ Ka Ohe?
Nibii enumɔ ni baaye abua bo koni okanu dãa fe nine, loo enumɔ akaka ohe, kɛ́ ohao waa loo etɔ bo po.
BUU-MƆƆ
Eyeɔ Ebuaa Bo Ni Otsi Ohe Kɛje Naagbai Ahe
Kwɛmɔ bɔ ni nilee ni jɛ Nyɔŋmɔ ŋɔɔ lɛ eye ebua mɛi komɛi ni amɛtsi amɛhe kɛje naagbai komɛi ni he nitsumɔ wa lɛ ahe.
GBALASHIHILƐ KƐ WEKU
Nyɛkɛ Nyɛbii Lɛ Agbaa Dãa He Sane
Mɛɛ be esa akɛ fɔlɔi kɛ amɛbii asusu sane ni he hiaa nɛɛ he, ni te esa akɛ amɛfee lɛ tɛŋŋ?
