Dabi. Wɔsafo lɛ epɛiii sinii, woji loo lalai pɔtɛɛ komɛi amli koni etsɔɔ nɔ ni esa akɛ wɔsafoŋbii lɛ akpoo. Mɛni hewɔ?

  Biblia lɛ woɔ aŋkroaŋkroi fɛɛ hewalɛ koni amɛtsɔse “amɛhenumɔ nii lɛ” ni ele ekpakpa kɛ efɔŋ mlikpamɔ.​—Hebribii 5:14.

  Ŋmalɛi lɛ kɛ shishitoo mlai ni Kristofonyo ko baanyɛ adamɔ nɔ kɛhala hiɛtserɛjiemɔ mli lɛ haa. a Nɔ fɛɛ nɔ ni wɔfeɔ yɛ wɔshihilɛ mli lɛ, oti ni ma wɔhiɛ ji ní “wɔkwɛ akɛ esa Nuŋtsɔ lɛ hiɛ lo.”​—Efesobii 5:10.

  Biblia lɛ tsɔɔ akɛ wekuyitsei yɛ hegbɛ ko yɛ amɛweku lɛ nɔ, no hewɔ lɛ amɛbaanyɛ amɛtsĩ hiɛtserɛjiemɔi komɛi anaa yɛ amɛwekui lɛ amli. (1 Korintobii 11:3; Efesobii 6:​1-4) Yɛ weku lɛ sɛɛ lɛ, ahako mɔ ko hegbɛ akɛ etsɔɔ sinii, lalai, loo lalafolɔi kɛ sinifeelɔi pɔtɛɛ ni esaaa akɛ asafoŋbii lɛ kwɛɔ loo amɛboɔ toi.​—Galatabii 6:5.