SANE KO NÍ ODASEFONYO KO KƐ MƆ KO GBA
Ani Nyɔŋmɔ Nuɔ Wɔpiŋmɔi lɛ Ahe?
Sane ni nyiɛ sɛɛ nɛɛ ji nɔkwɛmɔnɔ ni tsɔɔ sane ko ní Yehowa Odasefonyo ko kɛ mɔ ko baagba. Ŋɔɔ lɛ akɛ Odasefonyo ko ni atsɛɔ lɛ Michelle lɛ eyasara yoo ko ni atsɛɔ lɛ Sophia yɛ eshĩa.
MƐNI HEWƆ EŊMƐ GBƐ NI ENƐ BA?
Michelle: Ŋmɛnɛ lɛ mikɛ dɛhiɛmɔ wolo nɛɛ miiha mɔ fɛɛ mɔ ni yɔɔ akutso nɛɛ mli lɛ. Eyitso ji Ani Obaasumɔ ní Ole Anɔkwale Lɛ? Naa onɔ̃.
Sophia: Ani enɛ kɔɔ jamɔ he?
Michelle: Hɛɛ. Kwɛmɔ sanebimɔi ekpaa ni yɔɔ wolo lɛ hiɛ lɛ. Te sanebimɔi nɛɛ ateŋ nɔ ni—
Sophia: Ehi, kɛwa jɛi. Kaafite obe ni okɛ mi wie.
Michelle: Mɛni hewɔ okɛɔ nakai?
Sophia: Anɔkwa sane ji akɛ, efeee mi akɛ miheɔ Nyɔŋmɔ nɔ miyeɔ po.
Michelle: Ojogbaŋŋ, mihiɛ esɔ bɔ ni ojɛ otsuiŋ owie anɔkwale lɛ. Kɛ́ mabi lɛ, Ani nakai eji kɛjɛ ogbekɛbiiashi tɔ̃ɔ?
Sophia: Dabida, beni mihiɛ fãa lɛ, miyaa sɔlemɔ. Shi mikpa yaa nɛɛ jeee ŋmɛnɛ.
Michelle: Nakai, ona! Shi ofainɛ, ŋmɛɛ mi gbɛ ni majie mihe shi matsɔɔ bo. Atsɛɔ mi Michelle.
Sophia: Mi hu atsɛɔ mi Sophia.
Michelle: Sophia, eŋɔɔ minaa akɛ mikɛ bo ekpe.
Sophia: Mi hu nakai nɔŋŋ.
Michelle: Sophia, mibaaa biɛ koni mikɛ nibii ni miheɔ miyeɔ lɛ abafĩ onɔ. Shi masumɔ male nɔ ko. Ani nɔ ko pɔtɛɛ ji nɔ ni ha ewa kɛha bo akɛ obaahe oye akɛ Nyɔŋmɔ yɛ lɛ?
Sophia: Hɛɛ. Mimami yaná lɔle oshara afii 17 sɔŋŋ ni eho nɛ.
Michelle: Edɔ mi waa akɛ nɔ ko tamɔ nɛkɛ ba. Ani epila?
Sophia: Hɛɛ, kɛjɛ no sɛɛ nɛɛ enyɛko enyiɛ.
Michelle: Mɛɛ mɔbɔ sane po nɛ. Sane nɛɛ egba onaa waa ona?
Sophia: Hɛɛ, egba minaa diɛŋtsɛ. No haa mishwieɔ miyiŋ akɛ kɛ́ Nyɔŋmɔ yɛ lɛ, mɛni hewɔ eŋmɛ gbɛ ni enɛ ba? Mɛni hewɔ Nyɔŋmɔ ŋmɛɔ gbɛ ni piŋmɔ tamɔ nɛkɛ baa wɔnɔ?
ANI TƆMƆ YƐ HE AKƐ ABAABI NƆ̃ HEWƆ NI EŊMƐƆ GBƐ LƐ?
Michelle: Shishinumɔ yɛ bɔ ni onuɔ he ohaa lɛ, kɛ saji ni obiɔ lɛ ahe. Kɛ́ wɔmiina amanehulu lɛ, wɔsumɔɔ koni wɔle nɔ̃ hewɔ ni ebaa lɛ nakai. Anɔkwa, hii kɛ yei anɔkwafoi ni hi shi yɛ Biblia beaŋ lɛ ekomɛi bi nɔ̃ hewɔ ni amɛkɛ amanehulu kpe lɛ!
Sophia: Lɛɛlɛŋ?
Michelle: Hɛɛ. Ani obaasumɔ ni mikɛ enɛ he nɔkwɛmɔnɔ atsɔɔ bo yɛ Biblia lɛ mli?
Sophia: Manya he waa.
Michelle: Kwɛmɔ nɔ ni gbalɔ anɔkwafo Habakuk bi Nyɔŋmɔ taakɛ aŋma yɛ Habakuk, yitso 1 kuku 2 kɛ 3 lɛ: “Yehowa, mɛɛ beyinɔ nɔŋŋ mabolɔ kɛyashi, ni oboŋ toi? Ni mabo matsɛo yɛ yiwalɛ hewɔ, ni ohereŋ miyiwala? Mɛɛ hewɔ ni ohaa minaa nishaianii?” Ani sanebimɔi nɛɛ tamɔ nɔ ni obiɔ lɛ?
Sophia: Nakai pɛpɛɛpɛ.
Michelle: Nyɔŋmɔ ewieee Habakuk hiɛ yɛ saji ni ebi lɛ hewɔ, ni ekɛɛɛ Habakuk hu akɛ ehemɔkɛyeli faaa.
Sophia: Naakpɛɛ sane.
YEHOWA NYAAA PIŊMƆI AHE
Michelle: Biblia lɛ tsɔɔ akɛ Nyɔŋmɔ naa wɔpiŋmɔi lɛ, ni esusuɔ he.
Sophia: Te otsɔɔ tɛŋŋ?
Michelle: Ha mikɛ enɛ he nɔkwɛmɔnɔ atsɔɔ bo yɛ 2 Mose 3:7 lɛ. Ani obaasumɔ ni okane nakai kuku lɛ?
Sophia: Masumɔ. Jɛmɛ kaneɔ akɛ: “Ni Yehowa kɛɛ: Naa mina amanehulu ni mimaŋ ni yɔɔ Mizraim lɛ naa lɛ, ni amɛbolɔmɔ ni amɛbolɔɔ yɛ amɛkpalalɔi lɛ ahiɛ lɛ minu, ejaakɛ mile amɛnidɔɔnii lɛ.”
Michelle: Oyiwaladɔŋŋ. Yɛ ŋmalɛ nɛɛ naa lɛ, kɛ́ Nyɔŋmɔ webii miipiŋ lɛ, ani enaa?
Sophia: Hɛɛ, efeɔ mi akɛ enaa.
Michelle: Ni jeee akɛ eena amɛpiŋmɔ lɛ kɛkɛ. Kwɛmɔ naagbee kuku lɛ ekoŋŋ. Nyɔŋmɔ kɛɛ akɛ: “Mile amɛnidɔɔnii lɛ.” Ani wiemɔi ni tamɔ nɛkɛ baanyɛ ajɛ Nyɔŋmɔ ko ni bɛ henumɔ, ni nɔ ko jeee ehe sane lɛ naa?
Sophia: Kɔkɔɔkɔ, enyɛŋ eba lɛ nakai.
Michelle: Eji anɔkwale akɛ, mɔ ko baanyɛ ana nɔ ko ni miiya nɔ, shi akɛ no baatsirɛ lɛ ni efee he nɔ ko, ni tsɔɔ akɛ enu shihilɛ ni yaa nɔ lɛ he lɛ, no hu hiɛ ehe kwraa.
Sophia: Eji anɔkwale.
Michelle: Akɛni enɛ yɔɔ wɔjwɛŋmɔŋ lolo hewɔ lɛ, ha wɔkane sane kroko ni kɔɔ beni Nyɔŋmɔ webii lɛ naa amanehulu lɛ he lɛ he. Aŋma yɛ Yesaia 63:9 lɛ. Nakai kuku lɛ klɛŋklɛŋ fã lɛ kɛɔ akɛ: “Amɛhaomɔi lɛ fɛɛ mli lɛ, lɛ hu ehao.” Ani obaanyɛ okɛɛ agbɛnɛ akɛ, amanehulu ni Nyɔŋmɔ webii lɛ na lɛ gba lɛ hu enaa?
Sophia: Hɛɛ, tamɔ nakai eji.
Michelle: Sophia, anɔkwa sane kome ji akɛ, Nyɔŋmɔ susuɔ wɔhe waa diɛŋtsɛ, ni kɛ́ ena akɛ wɔmiipiŋ lɛ enyaaa he kwraa. Kɛ́ wɔmiina nɔ̃ lɛ, lɛ hu enaa nɔ̃.
MƐNI HEWƆ ESƐƐ ETSƐ NƐKƐ?
Michelle: Dani mashi lɛ, nɔ kome hu yɛ ni masumɔ akɛ mikɛ bo asusu he.
Sophia: Yoo.
Michelle: Ha wɔsusu nɔ ni Biblia lɛ tsɔɔ wɔ yɛ Nyɔŋmɔ hewalɛ lɛ he wɔkwɛ. Ŋmalɛ ni yɔɔ mijwɛŋmɔŋ ji Yeremia 10:12 lɛ. Ani obaasumɔ ni okane lo?
Sophia: Hɛɛ. Jɛmɛ kɛɔ akɛ: “Lɛ efee shikpɔŋ lɛ yɛ ehewalɛ naa, lɛ nɔŋŋ eŋɔ je lɛ ema shi yɛ eŋaa naa, ni elɛɛ ŋwɛi mli yɛ enilee naa.”
Michelle: Oyiwaladɔŋŋ. Ha wɔkɛ be kuku ko asusu ŋmalɛ nɛɛ he. Ani hewalɛ babaoo he baahia Nyɔŋmɔ bɔni afee ni ekɛbɔ jeŋ kutruku nɛɛ kɛ nɔ fɛɛ nɔ ni yɔɔ mli lɛ?
Sophia: Hɛɛ, hewalɛ babaoo he baahia lɛ.
Michelle: No hewɔ lɛ, kɛ́ Nyɔŋmɔ ná hewalɛ kɛbɔ nibii fɛɛ ni ebɔle wɔ kɛkpe lɛ, ani esaaa akɛ wɔkpaa gbɛ akɛ eyɛ hewalɛ hu ni ekɛbaakudɔ nibii ni ebɔ lɛ?
Sophia: Nakai eji.
Michelle: Susumɔ omami sane lɛ he ekoŋŋ okwɛ. Mɛni hewɔ ni egbaa onaa akɛ eena amanehulu lɛ?
Sophia: Ejaakɛ misumɔɔ lɛ. Mimami ni.
Michelle: Ni kɛ́ oyɛ hewalɛ ni obaanyɛ okɛtsa lɛ lɛ, aso ofeŋ nakai?
Sophia: Aahu tsɔ.
Michelle: Susumɔ nɔ ni enɛ tsɔɔ lɛ he okwɛ. Biblia lɛ tsɔɔ akɛ Nyɔŋmɔ naa wɔpiŋmɔi lɛ, enuɔ he ehaa wɔ, ni eyɛ hewalɛ kpele hu. Bo lɛ, susumɔ bɔ ni ebaabi ni Nyɔŋmɔ aye ehe nɔ koni ekɛ kplakplafeemɔ akafee nii kɛfo wɔmanehului lɛ asɛɛ oya nɔŋŋ lɛ he okwɛ!
Sophia: Misusuko sane nɛɛ he yɛ nɛkɛ gbɛ nɔ pɛŋ.
Michelle: Ani eeenyɛ efee akɛ eyɛ yiŋtoi kpakpai komɛi ahewɔ ni efoko wɔnaagbai lɛ asɛɛ lɛ? *
Sophia: Hmm, efeɔ mi akɛ ebaafee nɔ ko yɛ he.
Michelle: Miinu akɛ otɛlifoŋ lɛ miigbɛɛ, no hewɔ lɛ masumɔ koni maku misɛɛ maba be kroko koni wɔsusu sane nɛɛ he lolo.
Sophia: Oyiwaladɔŋŋ. Manya he waa. *
Ani oyɛ Biblia mli sanebimɔ pɔtɛɛ ko ni miigba onaa? Ani oyiŋ etɛ̃ɛɛ bo yɛ Yehowa Odasefoi ahemɔkɛyelii kɛ jamɔŋ nifeemɔi ni amɛkɛ amɛhe woɔ mli lɛ ahe? Kɛ́ nakai lɛ, kaashashao shi akɛ obaabi Yehowa Odasefoi lɛ ateŋ mɔ ko. Ebaaŋɔɔ Odasefonyo lɛ naa akɛ ekɛ bo baasusu saji ni tamɔ nakai lɛ ahe.
^ kk. 61 Kɛha enɛ he saji krokomɛi lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ, yitso 11 lɛ.
^ kk. 64 Sane kroko ni abaasusu he sɛɛ mli yɛ saneyitso nɛɛ shishi lɛ ji nɔ̃ hewɔ ni Nyɔŋmɔ ŋmɛɔ piŋmɔ gbɛ.
Ekolɛ Obaasumɔ Enɛ Hu
BUU-MƆƆ
Mɛni Hewɔ Nyɔŋmɔ Ŋmɛɔ Piŋmɔ Gbɛ?
Biblia mli klɛŋklɛŋ wolo lɛ haa wɔnaa nɔ hewɔ ni Nyɔŋmɔ ŋmɛ gbɛ ni nibii gbohii yaa nɔ be mli ni eyɛ hewalɛ po ni ebaanyɛ ekɛfo sɛɛ lɛ.
