SHII enyiɛ okwɛɔ ohiɛ yɛ ashwishwɛ mli? Wɔteŋ mɛi babaoo kwɛɔ wɔhiɛ yɛ ashwishwɛ mli daa gbi—ekolɛ wɔfeɔ enɛ shii abɔ daa gbi. Mɛni hewɔ? Ejaakɛ bɔ ni wɔji yɛ kponɔgbɛ lɛ he hiaa wɔ waa.

Abaanyɛ akɛ Biblia lɛ kanemɔ ato ashwishwɛ mlikwɛmɔ he. (Yakobo 1:23-25) Shɛɛ sane ni aŋma yɛ Nyɔŋmɔ Wiemɔ lɛ mli lɛ yɛ hewalɛ aahu akɛ, ebaanyɛ eha wɔna nɔ̃ gbɔmɛi ni wɔji diɛŋtsɛ. “Egbuɔ kɛboteɔ mli kɛyashi beyinɔ ni egbalaa susuma kɛ mumɔ lɛ” amli. (Hebribii 4:12) Kɛ́ wɔɔwie he yɛ gbɛ kroko nɔ lɛ, ehaa wɔnaa srɔtofeemɔ ni kã bɔ ni wɔji yɛ kponɔgbɛ kɛ bɔ ni wɔji diɛŋtsɛ yɛ wɔmligbɛ lɛ teŋ. Ehaa wɔnaa hei ni esa akɛ wɔfee tsakemɔi yɛ, taakɛ ashwishwɛ feɔ lɛ.

Jeee hei ni esa akɛ wɔfee tsakemɔi yɛ lɛ pɛ Biblia lɛ haa wɔnaa, shi eyeɔ ebuaa wɔ hu koni wɔle bɔ ni wɔɔfee wɔfee tsakemɔi nɛɛ. Bɔfo Paulo ŋma akɛ: “Ŋmalɛ fɛɛ ŋmalɛ lɛ ejɛ Nyɔŋmɔ Mumɔ lɛ mli, ni ehe yɛ sɛɛnamɔ ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ.” (2 Timoteo 3:16, 17, Ga Biblia Hee) Kadimɔ akɛ yɛ sɛɛnamɔi ejwɛ ni atsĩ tã yɛ ŋmalɛ nɛɛ mli lɛ ateŋ lɛ, emli etɛ—ni ji hiɛkamɔ, mɔsaamɔ, kɛ tsɔsemɔ—baabi ni wɔfee tsakemɔi yɛ wɔsui kɛ nifeemɔi amli. Kɛ́ ehe miihia ni wɔkwɛ ashwishwɛ mli daa kɛkwɛ akɛ bɔ ni wɔji yɛ kponɔgbɛ lɛ sa lo lɛ, no lɛ ehe miihia waa ni wɔkane Nyɔŋmɔ Wiemɔ ni ji Biblia lɛ daa!

Beni Yehowa Nyɔŋmɔ hala Yoshua ni enyiɛ Israel maŋ lɛ hiɛ lɛ, ekɛɛ lɛ akɛ: “Kaaha nɛkɛ mla wolo nɛɛ mli wiemɔi lɛ miikpa yɛ odaaŋ, shi jwɛŋmɔ he nyɔɔŋ kɛ shwane, koni ojwɛŋ nɔ ni ofee tamɔ bɔ ni aŋma yɛ mli lɛ pɛpɛɛpɛ; ejaakɛ no aaaha ofee nɔbatsɛ kɛ hiɛshikalɔ.” (Yoshua 1:8) Hɛɛ, kɛ́ Yoshua baaye omanye lɛ, ehe miihia ni ekane Nyɔŋmɔ Wiemɔ lɛ “nyɔɔŋ kɛ shwane,” ni tsɔɔ akɛ esa akɛ ekane daa.

Lalai Awolo lɛ klɛŋklɛŋ yitso lɛ hu wie sɛɛnamɔ ni yɔɔ Biblia lɛ ni aaakane daa lɛ he akɛ: “Ajɔɔ gbɔmɔ ni enyiɛɛɛ mɛi fɔji ajina mli, ni edamɔɔɔ eshafeelɔi agbɛ nɔ, ni etaaa hefɛoyelɔi ataramɔhe, shi moŋ Yehowa mla lɛ he emii shɛɔ yɛ, ni emla lɛ he nɔŋŋ ejwɛŋɔ shwane kɛ nyɔɔŋ! Etamɔ tso ni atɛo yɛ faai atoi, ni woɔ eyibii yɛ ebe lɛ mli, ni eyibaai kpooŋ, ni nɔ fɛɛ nɔ ni efeɔ lɛ shwereɔ.” (Lala 1:1-3) Ekã shi faŋŋ akɛ wɔbaasumɔ ni wɔfee wɔnii tamɔ gbɔmɔ ni awie ehe yɛ ŋmalɛ nɛɛ mli lɛ.

Mɛi babaoo kɛfee amɛsu akɛ amɛbaakane Biblia lɛ daa gbi. Beni abi Kristofonyo ko nɔ hewɔ ni ekaneɔ Biblia lɛ daa gbi lɛ, ekɛɛ akɛ: “Kɛ́ misɔleɔ mihaa Nyɔŋmɔ shii abɔ daa gbi  ni mikpaa gbɛ akɛ ebaabo mi toi lɛ, no lɛ esa akɛ mi hu mabo Nyɔŋmɔ toi kɛtsɔ e-Wiemɔ lɛ ni makane daa gbi lɛ nɔ, aloo jeee nakai? Kɛji wɔmiisumɔ ni wɔtsɔmɔ enanemɛi kpakpai lɛ, no lɛ esa akɛ wɔha lɛ hu ekɛ wɔ awie, aloo jeee nakai?” Esane ja. Kɛ́ wɔkane Biblia lɛ, ebafeɔ tamɔ nɔ ni Nyɔŋmɔ miiwie ni wɔmiibo lɛ toi, ni no haa wɔnaa esusumɔi yɛ saji ahe.

Ekolɛ oto gbɛjianɔ kɛha Biblia lɛ kanemɔ daa. Ani onyɛ okane Biblia tso muu lɛ fɛɛ? Eji gbɛ ko ni hi jogbaŋŋ ni obaanyɛ otsɔ nɔ ole Biblia lɛ mli saji jogbaŋŋ. Shi, mɛi komɛi eto gbɛjianɔ shii abɔ akɛ amɛbaakane Biblia tso muu lɛ fɛɛ, shi eyayeee omanye. Ani bo hu okɛ niiashikpamɔ ni tamɔ nɛkɛ ekpe dã? Mɛni obaanyɛ ofee koni onyɛ oshɛ oti ni okɛma ohiɛ akɛ obaakane Biblia tso muu lɛ fɛɛ lɛ he? Mɛni hewɔ okaaa ŋaawoi enyɔ nɛɛ okwɛɛɛ?

Okɛ Biblia kanemɔ afata odaa gbi nifeemɔi ahe. Halamɔ be pɔtɛɛ ko yɛ gbi lɛ mli ni baahi kɛha bo ni okɛkane Biblia lɛ. Agbɛnɛ hu, halamɔ be kroko yɛ gbi lɛ mli ofɔ̃ shi. Kɛ́ yɛ yiŋtoo ko hewɔ lɛ onyɛɛɛ okane Biblia lɛ yɛ be pɔtɛɛ ni hi kɛha bo ni oto lɛ mli lɛ, okɛ be kroko ni ohala kɛfɔ̃ shi lɛ atsu nii koni ekaba lɛ akɛ gbi ko baaho ni okaneko Nyɔŋmɔ Wiemɔ lɛ. Kɛ́ ofee nakai lɛ no baatsɔɔ akɛ ookase blema Beroiabii lɛ anɔkwɛmɔnɔ lɛ. Awie amɛhe akɛ: ‘Amɛ lɛ amɛjie amɛyitsoŋ amɛmɔ wiemɔ lɛ mli, ni daa gbi lɛ amɛkpaa ŋmalɛi lɛ amli amɛkwɛɔ akɛ nibii nɛɛ yɛ mli nakai lo.’—Bɔfoi lɛ Asaji 17:11.

Okɛ oti pɔtɛɛ ko ama ohiɛ. Ákɛ nɔkwɛmɔnɔ lɛ, kɛ́ okane Biblia lɛ yitsei etɛ kɛmɔ enumɔ daa gbi lɛ, obaanyɛ okane Biblia tso muu lɛ fɛɛ yɛ afi kome pɛ mli. Akrabatsa ni yɔɔ baafai ni nyiɛ sɛɛ lɛ amli lɛ tsɔɔ bɔ ni ooofee enɛ oha. Mɛni hewɔ okɛfeee oti ni ma ohiɛ akɛ obaaka enɛ okwɛ? Ŋmalamɔ gbii ni oto oyiŋ akɛ okɛbaakane Biblia lɛ mli yitsei akui ni akɛha lɛ yɛ saneyitso ni ji “Gbi” lɛ shishi. No sɛɛ lɛ, kɛ́ okane yitsei akui ni akɛha lɛ eko fɛɛ eko ogbe naa lɛ, dikimɔ adeka ni yɔɔ he lɛ mli. Kɛ́ ofee nakai lɛ, ebaaye ebua bo ni ona he ni oshɛ.

Kɛ́ okane Biblia tso muu lɛ fɛɛ ogbe naa lɛ, ani esa akɛ okpa kanemɔ? Dabi, obaanyɛ okɛ gbɛjianɔtoo nɛɛ nɔŋŋ atsu nii kɛkane Biblia tso muu lɛ fɛɛ daa afi, ni afi fɛɛ afi lɛ obaanyɛ oje shishi kɛjɛ he kroko. Aloo kɛ oosumɔ ni oto otsui shi kwraa kɛkane Biblia tso muu lɛ fɛɛ lɛ, obaanyɛ okɛ gbii enyɔ loo etɛ akane yitsei akui ni akɛha lɛ eko fɛɛ eko.

Be fɛɛ be ni obaakane Biblia lɛ, obaana nibii hei ni kɔɔ ohe—nibii ni osusuko amɛhe pɛŋ. Mɛni hewɔ? ‘Je nɛŋ su lɛ miitsake,’ ni wɔshihilɛi kɛ nibii ni ebɔle wɔhe lɛ hu tsakeɔ daa. (1 Korintobii 7:31) No hewɔ lɛ, tswaa ofai shi waa akɛ, obaakwɛ Nyɔŋmɔ Wiemɔ ni ji Biblia lɛ mli daa gbi tamɔ akwɛɔ ashwishwɛ mli lɛ. Kɛ́ ofee nakai lɛ, obaanyɛ oná nɔmimaa akɛ ooha Nyɔŋmɔ kɛ bo miiwie daa gbi.—Lala 16:8.—w09 08/01-E.