Mɛɛ Gbɛtsɔɔmɔ Okɛbaatsu Nii?
Kɛ́ wɔbaaná miishɛɛ loo wɔnáŋ miishɛɛ yɛ shihilɛ mli lɛ, edamɔ jeŋba he gbɛtsɔɔmɔi ni wɔbaahala akɛ wɔkɛbaatsu nii lɛ nɔ titri. Ni Yehowa Nyɔŋmɔ le enɛ. Enɛ hewɔ esumɔɔ ni wɔhi shi yɛ egbɛtsɔɔmɔi lɛ anaa lɛ.
Yehowa miisumɔ ni wɔná toiŋjɔlɛ kɛ miishɛɛ.
“Mi Yehowa, miji o-Nyɔŋmɔ lɛ, mɔ ni tsɔɔ bo nii koni oná he sɛɛ lɛ, mɔ ni tsɔɔ bo gbɛ yɛ gbɛ ni esa akɛ onyiɛ nɔ lɛ nɔ lɛ. Miná kulɛ oboɔ mikitãi lɛ toi jogbaŋŋ! Kulɛ otoiŋjɔlɛ lɛ baafee tamɔ faa ni ojalɛ nifeemɔ lɛ hu baafee tamɔ ŋshɔkei.” —Yesaia 48:17, 18.
Nyɔŋmɔ ji wɔ-Bɔlɔ, no hewɔ lɛ ele gbɛ ni hi fe fɛɛ ni esa akɛ wɔkɔ yɛ shihilɛ mli. Eesumɔ ni wɔhi shi yɛ egbɛtsɔɔmɔ naa ejaakɛ ele akɛ no ji nɔ ni hi kɛhã wɔ. Kɛ́ wɔye Nyɔŋmɔ kitãi lɛ anɔ lɛ, wɔyeŋ wɔtsui ejaakɛ wɔle akɛ bɔ fɛɛ bɔ ni fee lɛ, nɔ ko kpakpa baajɛ mli kɛba. Wɔbaakpɛ yiŋ kpakpai be fɛɛ be, ni no baahã wɔná toiŋjɔlɛ kɛ miishɛɛ.
Yehowa ekɛŋ wɔ ni wɔfee nɔ ko ni wɔnyɛŋ wɔfee.
“Kitã nɛɛ ni miwoɔ bo ŋmɛnɛ gbi nɛɛ, ejeee nɔ ko ni wa tsɔ kɛhã bo, ni ejeee nɔ ko ni onine nyɛŋ ashɛ nɔ hu.”—5 Mose 30:11.
Kɛ́ wɔmiitao wɔhi shi yɛ Nyɔŋmɔ he jeŋba he gbɛtsɔɔmɔi lɛ anaa lɛ, ekolɛ ebaabi ni wɔtsake bɔ ni wɔjwɛŋɔ wɔhãa kɛ bɔ ni wɔfeɔ wɔnii wɔhãa lɛ. Shi no etsɔɔɔ akɛ Yehowa miitao ni wɔfee fe bɔ ni wɔbaanyɛ. Lɛ ji wɔ-Bɔlɔ, no hewɔ lɛ ele nɔ ni wɔbaanyɛ wɔfee, kɛ nɔ ni wɔnyɛŋ wɔfee. Be ni wɔkaseɔ Yehowa he nii ni wɔbaleɔ lɛ jogbaŋŋ lɛ, wɔbaana akɛ “ekitãi lɛ anɔyeli waaa.”—1 Yohane 5:3.
Yehowa ewo shi akɛ ebaawa mɛi ni halaa akɛ amɛbaahi shi yɛ egbɛtsɔɔmɔi lɛ anaa lɛ.
“Mi, Yehowa, o-Nyɔŋmɔ lɛ, mihiɛ oninejurɔ mli, mi mɔ ni kɛɔ bo akɛ, ‘Kaashe gbeyei. Maye mabua bo’ lɛ.’”—Yesaia 41:13.
Wɔbaanyɛ wɔhi shi yɛ Nyɔŋmɔ jeŋba he gbɛtsɔɔmɔi lɛ anaa ejaakɛ ebaawa wɔ. Ebaanyɛ etsɔ e-Wiemɔ ni ji Biblia lɛ nɔ ewa wɔ; Biblia lɛ baawo wɔ hewalɛ, ni ebaahã wɔná hiɛnɔkamɔ.
Mɛi akpekpei abɔ ni yɔɔ jeŋ fɛɛ lɛ ena akɛ gbɛtsɔɔmɔi ni yɔɔ Biblia lɛ mli ni amɛhiɔ shi yɛ naa lɛ ehã amɛshihilɛ ehi. Bo hu obaanyɛ okase ŋaawoi kpakpai ni yɔɔ Biblia lɛ mli lɛ. Obaanyɛ okɛ broshuɔ ni akwɛ Biblia lɛ mli afee ni ji, Oyi Aná Wala Kɛya Naanɔ! lɛ aje shishi; obaanyɛ oná eko yɛ jw.org lɛ nɔ ni owooo he nyɔmɔ. Nikasemɔi ni yɔɔ mli lɛ asaneyitsei nɛ:
-
Mɛɛ Gbɛ Nɔ Biblia Lɛ Baanyɛ Awa Bo?
-
Biblia Lɛ Ewo Shi Akɛ Wɔsɛɛ Lɛ Nibii Baahi
-
Ani Saji Ni Yɔɔ Biblia Lɛ Mli Lɛ Ja?
Be ni opɛiɔ Nyɔŋmɔ wiemɔ ni ji Biblia lɛ mli lɛ, obaana akɛ emli ŋaawoi lɛ abe hoko; “amɛyɛ daa, bianɛ kɛ agbɛnɛ hu, kɛmiiya naanɔ.” (Lala 111:8) Gbɛ ni hi fe fɛɛ ni wɔbaanyɛ wɔkɔ yɛ shihilɛ mli ji ni wɔbaahi shi yɛ jeŋba he gbɛtsɔɔmɔi ni yɔɔ Biblia lɛ mli lɛ anaa. Shi Nyɔŋmɔ enyɛŋ wɔnɔ ni wɔfee nakai. (5 Mose 30:19, 20; Yoshua 24:15) Esa akɛ wɔteŋ mɔ fɛɛ mɔ akpɛ eyiŋ kɛ́ ebaahi shi yɛ naa loo ehiŋ shi yɛ naa.
