Biblia lɛ tsĩ tatuu tã shi kome pɛ yɛ 3 Mose 19:28 lɛ, ni jɛmɛ kɛɔ akɛ: “Nyɛkafea tatuu yɛ nyɛhewolo nɔ.” Nyɔŋmɔ kɛ mla nɛɛ hã Israel maŋ lɛ bɔ ni afee ni esoro amɛ yɛ maji krokomɛi ni bɔle amɛ ni ŋmalaa amɛnyɔŋmɔi lɛ agbɛ́i loo amɛfeɔ amɛnyɔŋmɔi lɛ ahe tatuu yɛ amɛhewolo nɔ lɛ ahe. (5 Mose 14:2) Eyɛ mli akɛ Kristofoi bɛ Mla ni akɛhã Israelbii lɛ shishi moŋ, shi esa akɛ wɔkɛ hiɛdɔɔ asusu shishitoo mla ni yɔɔ mla nɛɛ mli lɛ he.

Ani esa akɛ Kristofonyo atatuu ehe?

 Biblia mli ŋmalɛi ni nyiɛ sɛɛ nɛɛ baaye abua bo ni osusu sane nɛɛ he jogbaŋŋ:

•   Esa akɛ ‘yei kɛ hiɛ ni gboɔ nɔ awula amɛhe.’ (1 Timoteo 2:9) Shishitoo mla nɛɛ kɔɔ hii kɛ yei fɛɛ ahe. Esa akɛ wɔsusu bɔ ni mɛi krokomɛi nuɔ he amɛhãa lɛ he ni wɔkagbala mɛi ajwɛŋmɔ kɛba wɔnɔ fe nine.

•   Mɛi komɛi sumɔɔ ni ale amɛ loo amɛhã ale akɛ amɛbɛ mɔ ko shishi, ni mɛi komɛi hu sumɔɔ ni amɛtatuu amɛhe kɛtsɔɔ akɛ amɛyɛ hegbɛ ni amɛkɛ amɛgbɔmɔtsei feɔ nɔ fɛɛ nɔ ni amɛsumɔɔ. Shi Biblia lɛ woɔ Kristofoi hewalɛ akɛ: “Nyɛkɛ nyɛgbɔmɔtsei lɛ ahãa akɛ afɔle ni hiɛ kã, ni yɔɔ krɔŋkrɔŋ, ni Nyɔŋmɔ náa he miishɛɛ, ni kɛ́ nyɛfee nakai lɛ, no baatsɔɔ akɛ nyɛmiitsɔ nyɛjwɛŋmɔ nɔ nyɛkɛ sɔɔmɔ krɔŋŋ miihã.” (Romabii 12:1) Okɛ ‘ojwɛŋmɔ’ atsu nii kɛpɛi nɔ hewɔ ni otaoɔ otatuu ohe lɛ mli. Kɛ́ hesaamɔ ko ni eba nɔ loo kuu ko ni otaoɔ okɛ ohe adɔmɔ hewɔ osumɔɔ ni otatuu ohe lɛ, no lɛ, kaimɔ akɛ, obaanyɛ otsake ojwɛŋmɔ sɛɛ mli, shi onyɛŋ ogbe tatuu lɛ yɛ ohewolo nɔ kɔkɔɔkɔ. Kɛ́ opɛi osusumɔi lɛ amli jogbaŋŋ lɛ, ebaaye ebua bo ni okɛ hiɛshikamɔ akpɛ yiŋ.—Abɛi 4:7.

• “Mɔdɛŋbɔlɔ gbɛjianɔtoi baaye omanye kɛ̃, shi mɛi fɛɛ ni yeɔ amɛhe oyai lɛ, amɛbaaye ohia kɛ̃.” (Abɛi 21:5) Bei pii lɛ, mɛi yeɔ amɛhe oyai ni amɛtatuɔ amɛhe, shi yiŋ ni tamɔ nɛkɛ ni amɛkɛ oyaiyeli kpɛɔ lɛ baanyɛ asa amɛhe be kplaŋŋ yɛ naanyobɔi kɛ nitsumɔi amli. Agbɛnɛ hu, tatuujiemɔ jara baanyɛ awa waa ni eshãa mɔ hu. Niiamlitaomɔ kɛ mɛi babaoo ni yaa koni ajie tatuu yɛ amɛhe lɛ etsɔɔ akɛ, mɛi pii shwaa amɛhe waa akɛ amɛtatuu amɛhe.