Wano no janngirɗon non e nder ndee deftere, Deftere Allah nden no heewi tugaale ko wallata on onon e ɓeynguure mon nden. Yahuwah no faalaa yo on heɓu weltaare ka ɓeynguure mon. Si on waɗii rewugol mo ko adii kon e nder ngurndan mon ɗan, himo fodi ɗii « piiji fow ɓeydanoyte on ». (Matta 6:33.) Himo faalaa yo on wonu giɗo makko. Wakkilee fii no woniron giɗo Allah. Ko ɗun ɓuri hittande mo kala e men (Matta 22:37, 38).

KO DEFTERE ALLAH NDEN WI’I KON : « Mi wonanay on Baaba, onon wonanon mi ɓiɓɓe worɓe e ɓiɓɓe rewɓe. Ko Joomiraaɗo Jom Bawgal on daali ɗun » (2 Korenti 6:18). Allah no faalaa yo on wonu giɗo makko. Toragol mo ko ko moƴƴi fii wonugol njaatigiijo makko. Yahuwah no faalaa yo on duumo « e toragol » mo. (1 Tesalonii 5:17.) Yahuwah no hawji nanugol ko miijiɗon e ko aanini on (Filipii 4:6). Si on torike Allah onon e ɓeynguure mon nden, ɓe annday hiɗon hoolii Allah.

Kono onon kadi, hiɗon haani jentaade Allah. Fii waɗugol ɗun, hiɗon haani janngude Deftere Allah nden e defte cewɗe ɓaagitiiɗe Deftere Allah nden (Zabuura 1:1, 2, TMN). Miijitee moƴƴa e nder ko wonɗon e janngude kon (Zabuura 77:11, 12, TMN). Siɗon faalaa jentaade Allah, hiɗon haani kadi yahugol ka pottital Almasiiyaaɓe ɓen (Zabuura 122:1-4, TMN).

Si on yewtii yimɓe goo fii Yahuwah, on ɓurtay kelɗingol giggol mon ngol fii makko. Si on jokkii waɗugol ɗun, ɗun wallay on no ɓadoroɗon mo (Matta 28:19, 20).

KO HAANUƊON KON WAƊUDE :

• Waɗee saa’i ɲannde woo fii janngugol Deftere Allah nden e toragol mo

• Onon e ɓeynguure mon nden, no haani waɗude faale Allah on ado faaleeji mon ɗin

KO DEFTERE ALLAH NDEN WI’I KON : « Ɓadee Alla, ɗun o ɓadoto on » (Yaaquuba 4:8). Hiɗon haani ɗaɓɓude ɲalaande e saa’i e nder yontere nden fii no jokkiron rewugol Allah ka ɓeynguure mon (Fuɗɗoode nden 18:19). Kono hiɗon haani waɗude ko ɓuri ɗun. E kala ko waɗoton e nder ngurndan mon ɗan annditee Allah. Ɲiiɓinee giggol ɓeynguure mon nden fii Allah, yewton ɓe fii makko « siɗon jooɗi ka suudu e siɗon yahude ka hoore laawol, siɗon waalaade e si on immike ». (Yaɲɲannde sariyaaji ɗin 6:6, 7, TMN.) Etee wa’on wa Yaasuwa wi’unooɗo : « Kono min e wonuɓe ka suudu an ɓen, ko Yahuwah men rewata » (Yaasuwa 24:15, TMN).

KO HAANUƊON KON WAƊUDE :

• Waɗee porogaraam fii jannugol ɓeynguure mon nden e wallugol mo kala e ko aanini ɗun