Ko Yahuwah humi dewgal aranal ngal, o fawii mawɓe ɓen dankagol ɓiɓɓe maɓɓe ɓen (Koloosi 3:20). Ko onon haani ne’ugol ɓiɓɓe mon ɓen fii no ɓe yiɗira Yahuwah e fii no ɓe wonira feewuɓe si ɓe njanɗi (2 Timotee 1:5 ; 3:15). Hiɗon haani anndude ko woni ka nder ɓerɗe ɓiɓɓe mon. Kono ko misal mon ngal ɓurata hittude e maɓɓe. On waaway jannude ɓiɓɓe mon ɓen daaluyee Yahuwah on si on waɗii ɗun ka ɓernde mon (Zabuura 40:8, TMN).

KO DEFTERE ALLAH NDEN WI’I KON : « Yaawu heɗaade, nenna si yewta » (Yaaquuba 1:19). Sago mon ko yo ɓiɓɓe mon ɓen yewtu on hara ɓe hulataa on. Hiɓe haani anndude hiɗon faalaa ɓe jentaade si ɓe yewtude on. Waɗee fii no ɓe yewtira on hara hay fus ɓe suuɗataa on (Yaaquuba 3:18). Si on wonii ɲaaɗuɓe, ɓiɓɓe mon ɓen yewtataa on ko woni ka ɓernde maɓɓe fow. Waɗee doy ɓiɓɓe mon ɓen, yewtidon e maɓɓe soono woo hollon ɓe giggol mon ngol (Matta 3:17 ; 1 Korenti 8:1).

KO HAANUƊON KON WAƊUDE :

• Hettee fewndo ka ɓiɓɓe mon ɓen faalaa on yewtude ɗon

• Yewtidee e ɓiɓɓe mon ɓen, hara hinaa saa’i satteendi tun

KO DEFTERE ALLAH NDEN WI’I KON : « Kala holluɗo faamu e nder alhaali heɓay kutu » (Tindi 16:20, TMN). Wonnde si ɓiɓɓe mon ɓen haalanii on goɗɗun, ndaaree ko honɗun woni sabu mun, on saa’i on faamay ko ɓe miijii kon. No woowi ka paykoy feƴƴintina piiji ko ɓe wowlata kon maa ɓe haala piiji ko ɓe miijaaki. « Si goɗɗo jaabike e nder alhaali ɗoo yo o anndude ko feƴƴi, haray ko feetere e hersa » (Tindi 18:13, TMN). Wota on yaawu monagol (Tindi 19:11, TMN).

KO HAANUƊON KON WAƊUDE :

• Wonaa yo on taƴu haala paykoy mon koy maa ɲaaɗanon ɓe, ko ɓe woni e wowlude woo

• Annditee ko wa’unoɗon wa maɓɓe e ko ɓurannoo on hittande kon

KO DEFTERE ALLAH NDEN WI’I KON : « Jento, ɓiɗɗo an, waaju baaba maa ngun, e wota a selu yamiroore neene maa nden » (Tindi 1:8, TMN). Yahuwah fawii baaba on e neene on ne’ugol ɓiɓɓe ɓen. Hiɗon haani ne’ugol ɓiɓɓe mon ɓen fii no ɓe teddinira on e fii no ɓe ɗoftoroo on (Efeesi 6:1-3). Paykoy koy annday si mawɓe maɓɓe ɓen alaa e « kongol gootol ». (1 Korenti 1:10.) Si pottal alaa hakkunde mon, wota on anndin ɓiɓɓe mon ɓen ɓayri ɗun waɗay paykoy koy ɗuyta teddungal fii mon.

KO HAANUƊON KON WAƊUDE :

• Yewtee e fotton e huunde wootere fii ne’ugol paykoy mon koy

• Si tawii on fottaali e huunde wootere fii ne’ugol ɓiɓɓe mon, etee anndon miijo ɓeyngu mon maa moodi mon

KO DEFTERE ALLAH NDEN WI’I KON : « [Ne’iree] paykun e laawol feewugol fii makko » (Tindi 22:6, TMN). Fii heɓugol kutu ne’ugol ɓiɓɓe mon ɓen, ardirtaa nii tun. Ɗaɓɓee feere fii ne’ugol ɓiɓɓe mon ɓen wano donkingol ɓe si ɓe waɗi ko boni (Zabuura 127:4, TMN ; Tindi 29:17, TMN). Donkingol ɓiɓɓe mon ɓen wonaa yaggingol ɓe tun, kono ko hollugol ɓe fii honɗun ɓe woniraa e donkineede (Tindi 28:7, TMN). Jannee ɓe kadi, no ɓe yiɗira daaluyee Yahuwah on e no ɓe anndira tugaale Deftere Allah nden (Zabuura 1:2, TMN). Ɗun wallay ɓe no ɓe heɓira fonndo moƴƴo (Yahuudiyankeeɓe 5:14).

KO HAANUƊON KON WAƊUDE :

• Wallee ɓiɓɓe mon ɓen no ɓe anndira Allah ɓe hooloo mo

• Wallee ɓe fii no ɓe anndira e fii wota ɓe ndaaru piiji bonɗi ɓe reenoo, wano ka Enternet. Wallee ɓe no ɓe anndira honno ɓe reenortoo e jeenooɓe