Mɛsɛ́dó 4:1-37
4 Hwenu e Piyɛ́ɛ kpó Jaan kpó ɖo xó ɖɔ nú togun ɔ wɛ é ɔ, vɔ̌sánúxwlémawutɔ́ lɛ́, tɛ́nplicɔ́tɔ́ lɛ́ sín gǎn kpó Saduseɛn lɛ́ kpó wá xwetɔ́n ajijimɛ.
2 Akpɔ ɖó yě, ɖó mɛsɛ́dó lɛ́ ɖo nǔ kplɔ́n togun ɔ wɛ, bo nɔ jlá nyi wɛn ɖɔ è ko fɔ́n Jezu sín kú.*
3 Énɛ́ wú ɔ, yě wlí yě,* bɔ ɖó gbadanu ko su wútu ɔ, yě sú yě dó ganmɛ káká jɛ ayǐhɔ́ngbe tɔn.
4 É ɖo mɔ̌ có, mɛ ɖěɖěe ɖótó xó yětɔn lɛ́ é ɖi nǔ, bɔ ahwanvú* lɛ́ sín kɛ́n yi 5 000 mɔ̌.
5 Ayǐhɔ́ngbe tɔn ɔ, Jwifu lɛ́ sín nukɔntɔ́ lɛ́, tomɛxó lɛ́ kpó sɛ́nkplɔ́nmɛtɔ́ lɛ́ kpó kplé ɖó kpɔ́ ɖo Jeluzalɛ́mu;
6 Anási vɔ̌sánúxwlémawutɔ́gán ɔ, Kayífu, Jaan, Alɛsándlu kpó vɔ̌sánúxwlémawutɔ́gán ɔ sín hɛ̌nnumɔ lɛ́ bǐ kpó lɔ gɔ́ nú yě.
7 Yě sɔ́ Piyɛ́ɛ kpó Jaan kpó ɖó te ɖo tɛ́ntin yětɔn bo jɛ kinkanbyɔ́ yě jí ɖɔ: “Acɛ tɛ́ mi ka ɖó bo wa nǔ énɛ́, alǒ mɛ̌ nyíkɔ mɛ mi ka wa ɖe?”
8 Énɛ́ ɔ, gbigbɔ mímɛ́ wá Piyɛ́ɛ jí, b’ɛ ɖɔ nú yě ɖɔ:
“Nukɔntɔ́ lɛ́ kpó tomɛxó lɛ́ kpó è mi,
9 mi ɖo xó mǐtɔn gbéjé kpɔ́n wɛ égbé din, ɖó ɖagbe e mǐ wa nú afɔkponɔ ɖé é wú, bo lɛ́ jló ná tuun mɛ e bló bɔ nya énɛ́ jɛ ganjí é, kabǐ?
10 Mi mɛ bǐ kpó togun Izlayɛ́li tɔn ɔ bǐ kpó ní bo tuun ɖɔ Jezu Klísu Nazalɛ́tinu e mi xwe nyi atín wú, bɔ Mawu ka fɔ́n ɛ sín kú é nyíkɔ mɛ wɛ nya élɔ́ ɖo te ɖo fí ɖo nukɔn mitɔn, bo ɖo ganjí.
11 Jezu énɛ́ wɛ nyí ‘awǐnnya e mi mɛ xɔmɛtɔ́ lɛ́ xo nyi kɛ́n, bɔ é ka wá húzú awǐnnya zwe jí tɔn tají ɔ é.’
12 Gɔ́ ná ɔ, hwlɛngán sixú gbɔn mɛ ɖěvo ɖěbǔ jí bo wá ǎ, ɖó è sɔ́ ná mɛ ɖěvo sín nyǐkɔ mǐ ɖo hwe glɔ́, bɔ mǐ ná mɔ hwlɛngán gbɔn jǐ tɔn ǎ.”
13 Ée yě mɔ akɔ́nkpinkpan* Piyɛ́ɛ kpó Jaan kpó tɔn, bo ɖó ayi wú ɖɔ yě kún se wěma ó* bo lɛ́ nyí gbɛtɔ́ kpaa lɛ́ é ɔ, é kpácá yě tawun. Yě wá ɖó ayi wú ɖɔ yě mɛ we lɛ́ zɔn xá Jezu.
14 Ée yě ɖo nya e azɔn gbɔ ná é kpɔ́n wɛ b’ɛ ɖo te ɖo ahwanvú we lɛ́ kpá é ɔ, yě mɔ xó tí ná ɖɔ d’é wú ǎ.
15 Énɛ́ wú ɔ, yě ɖe gbe nú yě mɛ atɔn lɛ́ ɖɔ yě ní tɔ́n sín Hwɛɖɔxɔsá ɖaxó Jwifu lɛ́ tɔn ɔ, bɔ yě jɛ wě ɖe ɖó kpɔ́ jí;
16 yě nɔ ɖɔ: “Étɛ́ mǐ ka ná wa nú mɛ élɔ́ lɛ́? Ðó yě bló nǔjíwǔ nukúnɖéjí ɖé, bɔ mɛ e nɔ nɔ Jeluzalɛ́mu lɛ́ é bǐ mɔ gannaganna, lobɔ mǐ sixú gbɛ́ ǎ.
17 Bónú xó énɛ́ ní ma sɔ́ gba kpé d’é jí ó ɔ, mi nú mǐ ní ván nukún dó yě, bo ɖɔ nú yě ɖɔ yě ní ma sɔ́ ɖɔ xó nú mɛ ɖěbǔ ɖo nyǐkɔ énɛ́ mɛ ó.”
18 Énɛ́ ɔ, yě ylɔ́ ahwanvú we lɛ́, bo dó sɛ́n nú yě ɖɔ yě ní ma sɔ́ ɖɔ xó ɖěbǔ alǒ kplɔ́n nǔ mɛ ɖo nyǐkɔ Jezu tɔn mɛ ɖě ó.
19 Piyɛ́ɛ kpó Jaan kpó ka yí gbe nú yě ɖɔ: “Ényí é sɔgbe ɖo Mawu nukúnmɛ ɖɔ è ní se tónú nú mi bo gɔn tónú se nú Mawu hǔn, miɖésúnɔ ní yi da kpɔ́n.
20 Amɔ̌, mǐdɛɛ lɛ́ ɔ, mǐ sixú gɔn xó ɖɔ dó nǔ e mǐ mɔ bo se lɛ́ é wú ǎ.”
21 Énɛ́ wú ɔ, ée yě ván nukún dó ahwanvú we lɛ́ d’é jí gúdo é ɔ, yě ɖe yě nyi te, ɖó yě mɔ nǔ e wú yě ná zɔn dó dó dɔn tó nú yě é ɖě ǎ, bo ka lɛ́ ɖo xɛsi ɖi nú togun ɔ wɛ, ɖó nǔ e jɛ é zɔ́n bɔ togun ɔ bǐ ɖo susu kpa nú Mawu wɛ.
22 Ðó nya e è bló nǔjíwǔ bo gbɔ azɔn ná é sín xwe ko zɛ 40 wú.
23 Ée è ɖe Piyɛ́ɛ kpó Jaan kpó nyi te gúdo é ɔ, yě yi ahwanvú ɖě lɛ́ gɔ́n, bo ɖó nǔ e vɔ̌sánúxwlémawutɔ́gán lɛ́ kpó tomɛxó lɛ́ kpó ɖɔ é sín gbe nú yě.
24 Ée yě se mɔ̌ é ɔ, yě bǐ nɔ bǔ bo xo ɖɛ sɛ́dó Mawu lobo ɖɔ:
“Aklúnɔ Nǔbǐwúkpétɔ́, hwi wɛ nyí Mɛ e bló jǐxwé, ayǐkúngban kpó xu kpó, gɔ́ nú nǔ e ɖo fí vovo énɛ́ lɛ́ bǐ é,
25 hwi wɛ zán gbigbɔ mímɛ́ bo ɖɔ gbɔn tɔ́gbó mǐtɔn Davídi, mɛsɛntɔ́ towe jí ɖɔ: ‘Étɛ́wú akɔta lɛ́ ka ɖo adǎn jí, bɔ togun lɛ́ ɖo tamɛ lin dó nǔ vɔ̌tɔ́ lɛ́ jí wɛ?
26 Axɔ́sú ayǐkúngban jí tɔn lɛ́ sɔ́ ahwannú, bɔ acɛkpatɔ́ lɛ́ kplé ɖó kpɔ́ bo húzú kpan nukɔn Jexóva kpó mɛ e é sɔ́ é* kpó.’
27 Nǔgbó ɔ, Elódu kpó Pɔ́nsu Pilátu kpó, gɔ́ nú mɛ e ɖo akɔta ɖě lɛ́ mɛ lɛ́ é kpó togun Izlayɛ́li tɔn ɔ kpó kplé ɖó kpɔ́ ɖo toxo élɔ́ mɛ bo húzú kpan nukɔn mɛsɛntɔ́ mímɛ́ towe Jezu e a sɔ́ é,
28 bo ná dó wa nǔ e a ko ɖɔ ɖ’ayǐ é. Nǔ énɛ́ lɛ́ jɛ ɖó hlɔ̌nhlɔ́n* towe kpó jlǒ towe kpó wú.
29 Din ɔ, Jexóva, ɖǒ ayi adǎngblɔ́nnúmɛ yětɔn lɛ́ wú, bo d’alɔ mǐ mɛ mɛsɛntɔ́ towe lɛ́ bónú mǐ ná kpo ɖo xó towe ɖɔ wɛ kpó adɔgbígbó kpó;
30 lɛ̌vɔ́ kpo ɖo hlɔ̌nhlɔ́n towe zán dó gbɔ azɔn nú mɛ wɛ, bo lɛ́ kpo ɖo nǔjíwǔ kpó nǔdabaɖa lɛ́ kpó bló wɛ ɖo mɛsɛntɔ́ mímɛ́ towe Jezu nyíkɔ mɛ.”
31 Ée yě sa vo nú* Mawu fó é ɔ, fí e yě kplé ɖó kpɔ́ ɖe é dán wǔ, bɔ gbigbɔ mímɛ́ wá yě bǐ jí, lobɔ yě nɔ ɖo xó Mawu tɔn ɖɔ wɛ kpó adɔgbígbó kpó.
32 Gɔ́ ná ɔ, yě mɛ tobutóbú e ɖi nǔ lɛ́ é nɔ ɖó linlin* ɖokpó ɔ kpó ayi ɖokpó ɔ kpó, bɔ mɛ ɖokpó vɔ́vɔ́ tlɛ nɔ lin ɖɔ nǔ e émí ɖó lɛ́ é nyí émítɔn ǎ, é nyɔ́ wa ɔ, yě nɔ má nǔ e yě ɖó lɛ́ é bǐ xá yěɖée lɛ́.
33 Mɛsɛ́dó lɛ́ kpo ɖo kúnnu ɖe wɛ dó fínfɔ́n sín kú Aklúnɔ Jezu tɔn wú kpó nukɔnyiyi ɖaxó kpó, bɔ fɛ́nú Mawu tɔn ɖo kpɔ́ xá yě bǐ bo túnflá.
34 Nǔgbó ɔ, nǔ hwedó mɛ ɖě ɖo yě mɛ ǎ, ɖó yě mɛ e ɖó gle alǒ xwé lɛ́ é bǐ nɔ sɔ́ sa bo nɔ hɛn akwɛ́ tɔn wá,
35 lobo nɔ sɔ́ jó nú mɛsɛ́dó lɛ́ bɔ yědɛɛ lɛ́ nɔ má nú mɛ ɖokpó ɖokpó sɔgbe xá hudó mɛ ɔ tɔn.
36 Énɛ́ ɔ, Jozɛ́fu e mɛsɛ́dó lɛ́ nɔ lɛ́ ylɔ́ ɖɔ Baanabási (tínmɛ tɔn wɛ nyí “Gbɔdónúmɛtɔ́”), bo nyí Levíi ví bo jɔ ɖo Cíplu é,
37 ɖó ayǐkúngban ɖokpó bo sa, lobo sɔ́ akwɛ́ ɔ wá, bo sɔ́ nú mɛsɛ́dó lɛ́.
Tínmɛ e ɖo do lɛ́ é
^ Alǒ “bo nɔ zán kpɔ́ndéwú Jezu tɔn dó jlá nyi wɛn ɖɔ è ná fɔ́n mɛ sín kú.”
^ Alǒ “ɖ’alɔ yě jí.”
^ Blǔju tɔn, “súnnu.”
^ Alǒ “adɔgbígbó.”
^ Énɛ́ wɛ nyí ɖɔ, yě yi wěmaxɔmɛ sinsɛngán lɛ́ tɔn ǎ; yě nyí aguduwíi ɖɔ wɛ è ɖe ǎ.
^ Alǒ “Klísu.”
^ Blǔju tɔn, “alɔ.”
^ Alǒ “xo ɖɛ vívɛ́ sɛ́dó.”
^ Alǒ “lǐndɔ̌n.” Kpɔ́n Xógbe ɖé lɛ́ sín tínmɛ.
