Mɛsɛ́dó 10:1-48
-
Nǔmimɔ Kɔnɛ́yi tɔn (1-8)
-
Piyɛ́ɛ mɔ kanlin e è slá wǔ ná lɛ́ é ɖo nǔmimɔ mɛ (9-16)
-
Piyɛ́ɛ yi ba Kɔnɛ́yi kpɔ́n (17-33)
-
Piyɛ́ɛ jlá wɛn ɖagbe ɔ mɛ e ma nyí Jwifu ǎ lɛ́ é (34-43)
-
‘Mawu nɔ ɖe mɛɖé ɖó vo ɖo mɛɖé mɛ ǎ’ (34, 35)
-
-
Mɛ e ma nyí Jwifu ǎ lɛ́ é mɔ gbigbɔ mímɛ́ yí, bɔ è lɛ́ bló batɛ́mu nú yě (44-48)
10 Nya ɖé ɖo Sezalée, bo nɔ nyí Kɔnɛ́yi; sɔ́jakanwekogán wɛ n’i ɖo ahwangbɛ́ e è nɔ ylɔ́ ɖɔ ahwangbɛ́* Italíi tɔn é mɛ.
2 Nya ɖé wɛ bo nɔ tɛ́ dó Mawu wú, bɔ é kpó mɛ e ɖo xwé tɔn gbe lɛ́ é bǐ kpó nɔ ɖó sísí e gɔ́ngɔ́n é nú Mawu. É nɔ ná nǔ wamamɔnɔ lɛ́ tawun, bo nɔ lɛ́ sa vo nú Mawu hwebǐnu.
3 Gbe ɖokpó ɖo gan atɔn mɛ hwelɛ́kɔ* mɔ̌ ɔ, é mɔ wɛnsagun Mawu tɔn ɖokpó céɖécéɖé ɖo nǔmimɔ ɖé mɛ, bɔ é wá gɔ̌n tɔn, bo ɖɔ n’i ɖɔ: “Kɔnɛ́yi!”
4 Xɛsi jɛ Kɔnɛ́yi jí, bɔ é kpɔ́n ɛ dáán, bo kanbyɔ́ ɛ ɖɔ: “Étɛ́ a ka jló ɖɔ má wa, Aklúnɔ?” É ɖɔ n’i ɖɔ: “Mawu nɔ ɖ’ayi ɖɛ towe lɛ́ kpó nǔ e a nɔ ná wamamɔnɔ lɛ́ é kpó wú, bo nɔ ɖo flínflín wɛ.
5 Énɛ́ wú ɔ, sɛ́ mɛ dó Jopée, bónú yě ní ylɔ́ nya e nɔ nyí Sinmɔ́ɔ, bɔ è nɔ ylɔ́ ɖɔ Piyɛ́ɛ é wá nú we.
6 Nya énɛ́ ɖo anyǔzɔ́watɔ́ e nɔ nyí Sinmɔ́ɔ, bɔ xwé tɔn ɖo xutó é gɔ́n.”
7 Ée wɛnsagun e ɖɔ xó n’i é yi tlóló é ɔ, é ylɔ́ mɛsɛntɔ́ tɔn lɛ́ we, kpó sɔ́ja e nɔ w’azɔ̌ n’i lɛ́ é ɖokpó kpó; sɔ́ja énɛ́ nɔ tɛ́ dó Mawu wú.
8 É ɖɔ nǔ e jɛ lɛ́ é bǐ nú yě, bo sɛ́ yě dó Jopée.
9 Ayǐhɔ́ngbe tɔn e yě ɖo ali jí, bo ɖo yiyi wɛ, bo ɖo toxo ɔ sɛkpɔ́ wɛ é ɔ, Piyɛ́ɛ xá xɔ ta* ɖo gan 12 hwemɛ tɔn* mɛ mɔ̌, bo ná xo ɖɛ.
10 Amɔ̌, xovɛ́ sin i tawun, b’ɛ jló ná ɖu nǔ. Hwenu e è ɖo nǔɖuɖu ɔ ɖa wɛ é ɔ, é ba éɖée kpo,
11 bo mɔ bɔ jǐnukúnsin hun, bɔ nǔɖé cí lɛ̌ɛnkanvɔ ɖaxó ɖé ɖɔhun ja ayǐkúngban jí, bɔ è hɛn tó tɔn ɛnɛ lɛ́;
12 kanlin afɔ ɛnɛnɔ lɛ́ alɔkpa alɔkpa bǐ, kanlin e nɔ sá lɛ́ é alɔkpa alɔkpa bǐ, kpó xɛ alɔkpa alɔkpa bǐ kpó ɖ’é mɛ.
13 Énɛ́ gúdo ɔ, gbe ɖé ɖɔ n’i ɖɔ: “Piyɛ́ɛ, sí te, hu, bo ɖu!”
14 Piyɛ́ɛ ka ɖɔ: “Gbeɖé kpɔ́n Aklúnɔ, ɖó un ɖu nǔ e sɛ́n gbɛ́ é kpó nǔ e nyí nǔblíblí é kpó ɖě kpɔ́n ǎ.”
15 Gbe ɔ lɛ́ ɖɔ xó n’i azɔn wegɔ́ ɔ bo ɖɔ: “Nǔ e Mawu ko slá wǔ ná lɛ́ é ɔ, ma sɔ́ ɖɔ ɖɔ sɛ́n gbɛ́ nǔ énɛ́ lɛ́ ɖě ó.”
16 Gbe ɔ lɛ́ ɖɔ xó n’i azɔn atɔngɔ́ ɔ, bɔ énɛ́ gúdo tlóló ɔ, è sɔ́ nǔ ɔ yi jǐxwé.
17 Nǔ e Sinmɔ́ɔ mɔ é kpo ɖo vo bú dó è wɛ, bɔ hwenɛ́nu pɛ́ɛ́ ɔ, súnnu ɖěɖěe Kɔnɛ́yi sɛ́ dó lɛ́ é kan fí e Sinmɔ́ɔ sín xwé ɖe é byɔ́, bɔ din ɔ, yě ɖo te ɖo hɔntogbó ɔ ta.
18 Yě sú xó, bo kanbyɔ́ ɖɔ Sinmɔ́ɔ e è nɔ ylɔ́ ɖɔ Piyɛ́ɛ é ɖo xwé ɔ gbe a jí.
19 Hwenu e Piyɛ́ɛ kpo ɖo tamɛ lin dó nǔmimɔ ɔ jí wɛ é ɔ, gbigbɔ ɔ ɖɔ: “Éɖíe! Súnnu atɔn ɖo kinkan we byɔ́ wɛ.
20 Énɛ́ wú ɔ, sí te, bo jɛ te sín xɔ ɔ ta, lobo xwedó yě, ma xo nǔ kpɔ́n ɖěbǔ ó, ɖó nyɛ wɛ sɛ́ yě dó.”
21 Énɛ́ ɔ, Piyɛ́ɛ jɛ te yi mɛ lɛ́ gɔ́n, bo ɖɔ: “Nyi mɛ e ba wɛ mi ɖe é ɖíe. Étɛ́ ka hɛn mi wá fí?”
22 Yě ɖɔ: “Mawu ɖe gbe nú Kɔnɛ́yi, sɔ́jakanwekogán, éé nyí nǔjlɔ́jlɔ́watɔ́ bo nɔ ɖó sísí e gɔ́ngɔ́n é nú Mawu, bɔ Jwifu lɛ́ bǐ nɔ ɖe kúnnu ɖagbe ná é gbɔn wɛnsagun mímɛ́ ɖé jí ɖɔ é ní ylɔ́ we, bónú a ní wá xwé tɔn gbe, lobonú é ná se nǔ e a ɖó, bo ná ɖɔ lɛ́ é.”
23 Énɛ́ ɔ, Piyɛ́ɛ ylɔ́ yě dó xwégbe, bo ɖó tɛnmɛ nú yě.
Ayǐhɔ́ngbe tɔn ɔ, é sɔ́ nǔ, bo xwedó yě, bɔ nɔví súnnu e ɖo Jopée é ɖé lɛ́ zɔn xá ɛ.
24 Yě jɛ Sezalée ayǐhɔ́ngbe tɔn. Kɔnɛ́yi ka ko ɖo nukún ɖó yě wɛ ɖ’ayǐ, bo ko ylɔ́ hɛ̌nnumɔ tɔn lɛ́ kpó xɔ́ntɔn tɔn vívɛ́ lɛ́ kpó kplé.
25 Hwenu e Piyɛ́ɛ ɖo xwé ɔ gbe byɔ́ wɛ é ɔ, Kɔnɛ́yi kpé è, bo jɛ kpo ɖo afɔ tɔn lɛ́ kɔn, lobo ɖe kɔ́* n’i.
26 Piyɛ́ɛ ka sɔ́ ɛ sí te, bo ɖɔ: “Sí te; gbɛtɔ́ kpowun wɛ nú nyi lɔ.”
27 Piyɛ́ɛ ɖo xó ɖɔ xá ɛ wɛ, bo byɔ́ xwé ɔ gbe, bo mɔ ɖɔ mɛ gěgé ko kplé.
28 É ɖɔ nú yě ɖɔ: “Mi tuun ganjí ɖɔ é kún sɔgbe xá sɛ́n ɖɔ Jwifu ɖé ní dó gbɛ̌ xá mɛ e nyí akɔ ɖěvo é, alǒ sɛkpɔ́ ɛ ó, é ɖo mɔ̌ có, Mawu ɖe xlɛ́ mì ɖɔ un kún ɖó ná ylɔ́ mɛ ɖěbǔ ɖɔ mɛ blíblí ó.
29 Énɛ́ wú ɔ, hwenu e a sɛ́ wɛn dó mì é ɔ, un xo nǔ kpɔ́n cóbó wá ǎ. Hǔn, bo ɖɔ nǔ e wú a sɛ́ wɛn dó mì é nú mì.”
30 Kɔnɛ́yi ka ɖɔ: “Azǎn ɛnɛ ɖíe lěhwenu ɔ, un ɖo ɖɛ xo wɛ ɖo xwé ce gbe, ɖo gan atɔn mɛ hwelɛ́kɔ mɔ̌,* bɔ tlóló ɔ, nya ɖé wá cí te nukɔn ce, bɔ awu e é dó é nɔ kɔ́n.
31 Nya ɔ ɖɔ: ‘Kɔnɛ́yi, Mawu se ɖɛ towe, bo ɖ’ayi nǔ e a nɔ ná wamamɔnɔ lɛ́ é wú.
32 Énɛ́ wú ɔ, sɛ́ mɛ dó Sinmɔ́ɔ e è nɔ ylɔ́ ɖɔ Piyɛ́ɛ é gbé mɛ ɖo Jopée. Nya énɛ́ ɖo Sinmɔ́ɔ e nyí anyǔzɔ́watɔ́ bɔ xwé tɔn ɖo xutó é gɔ́n.’
33 Énɛ́ wú ɔ, un sɛ́ mɛ dó gbě towe mɛ tlóló, bɔ é nyɔ́ tawun ɖɔ a wá fí. Din ɔ, mǐ bǐ ɖo Mawu nukɔn, bo ná se nǔ e Jexóva ɖe gbe ɖɔ hwi ní ɖɔ lɛ́ é bǐ.”
34 Énɛ́ ɔ, Piyɛ́ɛ yí xó, bo ɖɔ: “Din ɔ, un mɔ nukúnnú jɛ mɛ nǔgbó nǔgbó ɖɔ Mawu kún nɔ ɖe mɛɖé ɖó vo ɖo mɛɖé mɛ ó,
35 loɔ, ɖo akɔta lɛ́ bǐ mɛ ɔ, mɛ e nɔ ɖó sísí e gɔ́ngɔ́n é n’i, bo nɔ lɛ́ wa nǔ e sɔgbe é sín nǔ nɔ nyɔ́ nukún tɔn mɛ.
36 É ɖɔ xó sɛ́dó Izlayɛ́li ví lɛ́, bo dó wɛn ɖagbe ɖé yě; énɛ́ wɛ nyí ɖɔ yě ná nɔ fífá mɛ xá ɛ gbɔn Jezu Klísu jí. Jezu ɔ wɛ nyí Aklúnɔ nú mɛ bǐ.
37 Mi tuun nǔ e xó mɛ lɛ́ ɖɔ bɛ́sín Galilée gbɔn Judée gbé ɔ bǐ jí ɖo batɛ́mu e Jaan jlá é gúdo é.
38 Yě ɖɔ xó dó Jezu Nazalɛ́tinu ɔ wú. Mawu sɔ́ ɛ gbɔn gbigbɔ mímɛ́ gblamɛ, bo ná ɛ hlɔ̌nhlɔ́n. Mɔ̌ mɛ ɔ, é nɔ ɖo yiyi wɛ, bo nɔ ɖo nǔ ɖagbe lɛ́ wa wɛ, lobo nɔ ɖo azɔn gbɔ nú mɛ ɖěɖěe gbídí kɔ ná wɛ Awǒvi ɖe lɛ́ é bǐ wɛ, ɖó Mawu ɖo kpɔ́ xá ɛ.
39 Mǐ nyí kúnnuɖetɔ́ nǔ e é wa ɖo Jwifu lɛ́ sín to mɛ, kpó Jeluzalɛ́mu kpó lɛ́ é bǐ tɔn; amɔ̌, yě xwe è nyi atín* wú dó hu i.
40 Mawu fɔ́n ɛ sín kú azǎn tɔn atɔngɔ́ ɔ gbe, bo yí gbe bɔ é sɔ́ éɖée xlɛ́ gbɛtɔ́ lɛ́,*
41 é ka nyí gbɛtɔ́ lɛ́ bǐ ǎ, loɔ, mǐ mɛ kúnnuɖetɔ́ e Mawu ko sɔ́ jɛ nukɔn lɛ́ é wɛ; mǐ kpó é kpó ɖu, bo nu ɖo fínfɔ́n sín kú tɔn gúdo.
42 Gɔ́ ná ɔ, é ɖe gbe nú mǐ ɖɔ mǐ ní ɖɔ Mawuxó nú gbɛtɔ́ lɛ́, bo ɖe kúnnu bǐ mlɛ́mlɛ́ ɖɔ é wɛ nyí mɛ e Mawu sɔ́ b’ɛ ná ɖɔ hwɛ xá mɛ e ɖo gbɛ lɛ́ é kpó mɛkúkú lɛ́ kpó é.
43 Gbeyíɖɔ lɛ́ bǐ ɖe kúnnu n’i, bo ɖɔ ɖɔ mɛ ɖěbǔ e ɖi nǔ n’i é ɔ, è ná sɔ́ hwɛ tɔn lɛ́ kɛ ɛ gbɔn nyǐkɔ tɔn gblamɛ.”
44 Piyɛ́ɛ kpo ɖo xó énɛ́ lɛ́ ɖɔ wɛ, bɔ gbigbɔ mímɛ́ jɛ te dó mɛ e ɖo xó tɔn se wɛ lɛ́ é bǐ jí.
45 Énɛ́ kpácá nǔɖitɔ́* ɖěɖěe è gbo ada ná, bɔ yě zɔn xá Piyɛ́ɛ lɛ́ é, ɖó è gba gbigbɔ mímɛ́ kɔn nyi mɛ e ɖo akɔta ɖě lɛ́ mɛ lɛ́ é lɔmɔ̌ jí vɔ̌nu.
46 Ðó yě se bɔ mɛ énɛ́ lɛ́ ɖo xó ɖɔ dó gbe ɖěvo lɛ́ mɛ wɛ, bo ɖo susu kpa nú Mawu wɛ. Piyɛ́ɛ ka yí xó, bo ɖɔ:
47 “Mɛ élɔ́ lɛ́ e mɔ gbigbɔ mímɛ́ yí mǐ ɖɔhun é ɔ, mɛɖé ka sixú gbɛ́ ɖɔ è ní ma sɔ́ sin dó bló batɛ́mu nú yě ó a?”
48 Énɛ́ ɔ, é ɖe gbe ɖɔ è ní bló batɛ́mu nú yě ɖo Jezu Klísu nyíkɔ mɛ. Énɛ́ gúdo ɔ, yě byɔ́ ɛ ɖɔ é ní nɔ émí gɔ́n nú azǎn yɔywɛ ɖé.
Tínmɛ e ɖo do lɛ́ é
^ Ahwankpá Hlɔ̌ma tɔn e mɛ sɔ́ja 600 ɖe é sín ahwangbɛ́ ɖé wɛ.
^ Blǔju tɔn, “ɖo ganxixo tɛ́nnɛgɔ́ ɔ mɛ.”
^ Xɔ e mɛ lɛ́ nɔ gbá hwenɛ́nu lɛ́ é sín ta nɔ ɖo faɖaɖa, bɔ mɛ lɛ́ nɔ nɔ fínɛ́ bo nɔ wa nǔ gěgé.
^ Blǔju tɔn, “ganxixo ayizɛ́ngɔ́ ɔ.”
^ Alǒ “wlí yɛ̌yi.”
^ Blǔju tɔn, “ganxixo tɛ́nnɛgɔ́ ɔ mɛ.”
^ Alǒ “kpo.”
^ Alǒ “bɔ gbɛtɔ́ lɛ́ mɔ ɛ.”
^ Alǒ “gbejínɔtɔ́.”
