1 Kɔlɛ́ntinu lɛ́ 3:1-23
3 Énɛ́ wú ɔ, nɔví lɛ́ mi, un kpé wú bo ɖɔ xó nú mi lěe è ná ɖɔ nú mɛ e gbigbɔ nɔ xlɛ́ ali lɛ́ é gbɔn é ɖɔhun ǎ, loɔ, un ɖɔ xó nú mi lěe è ná ɖɔ nú mɛ e linlin gbɛtɔ́ tɔn nɔ xlɛ́ ali lɛ́ é gbɔn é ɖɔhun, yɔkpɔ́vú ɖo Klísu mɛ lɛ́ ɖɔhun.
2 Anɔ̌sin wɛ un ná mi, é nyí nǔɖuɖu syɛ́nsyɛ́n ǎ, ɖó mi ko ɖó gǎn sɔmɔ̌ ǎ wútu. Nǔgbó ɔ, din ɖésú ɔ, mi ɖó gǎn sɔmɔ̌ ǎ,
3 ɖó linlin gbɛtɔ́ tɔn wɛ kpo ɖo ali xlɛ́ mi wɛ. Ðó wǔhwinhwan kpó jlɛɖiɖɔ kpó ɖo tɛ́ntin mitɔn wútu ɔ, énɛ́ xlɛ́ ɖɔ linlin gbɛtɔ́ tɔn wɛ nɔ xlɛ́ ali mi, bɔ mi nɔ wa nǔ mɛ e ɖo gbɛ ɔ mɛ lɛ́ é ɖɔhun nɛ́ ǎ cé?
4 Ðó hwenu e mɛɖé nɔ ɖɔ: “Un nyí Pɔ́lu tɔn,” bɔ mɛ ɖěvo nɔ ɖɔ: “Un nyí Apolósu tɔn,” é ɔ, nǔ wa wɛ mi ɖe gbɛtɔ́ kpaa lɛ́ ɖɔhun nɛ́ ǎ cé?
5 Étɛ́ Apolósu ka nyí tawun? Ɛɛn, étɛ́ nyɛ Pɔ́lu ka nyí? Mɛsɛntɔ́ kpowun wɛ mǐ nyí bɔ mi húzú nǔɖitɔ́ gbɔn gbla mǐtɔn mɛ. Nǔ e Aklúnɔ zɔ́n mǐ mɛ ɖokpó ɖokpó é wɛ mǐ wa.
6 Nyɛ tun atín ɔ, bɔ Apolósu hú sin ná, amɔ̌, Mawu wɛ bló bɔ é su.
7 Énɛ́ wú ɔ, mɛ e tun atín ɔ é kpó mɛ e hú sin ná é kpó nyí nǔtí ǎ, loɔ, Mawu e nɔ bló bɔ é nɔ su é wɛ susu jɛxá.
8 Mɛ e tun atín ɔ é kpó mɛ e hú sin ná é kpó bǐ wɛ w’azɔ̌ ɖó kpɔ́,* amɔ̌, è ná dó ajɔ mɛ ɖokpó ɖokpó sɔgbe xá azɔ̌ éɖésúnɔ tɔn.
9 Ðó azɔ̌watɔ́gbɛ́ Mawu tɔn lɛ́ wɛ mǐ nyí. Midɛɛ lɛ́ ɔ, gle Mawu tɔn e é ɖo lilɛ wɛ é wɛ mi nyí, bo lɛ́ nyí xɔ Mawu tɔn.
10 Sɔgbe xá fɛ́nú e Mawu ná mì é ɔ, un dó xɔ ɖé do, xɔmɛtɔ́gán e alɔ se kpɛ́n ná é* ɖɔhun, amɔ̌, mɛ ɖěvo wɛ ɖo xɔ mɛ nyi dodónú énɛ́ jí wɛ. Mɛ ɖokpó ɖokpó ní bo ka nɔ hɛn ayi dó lěe mɛ xɔ nyi dodónú ɔ jí gbɔn wɛ é ɖe é wú.
11 Ðó mɛ ɖěbǔ sixú dó xɔ ɖěvo do dó ɖyɔ́ dodónú e ko ɖo ayǐ é ǎ, dodónú énɛ́ wɛ nyí Jezu Klísu.
12 Ényí mɛɖé zán siká, kpatágan, awǐnnya xɔ akwɛ́ lɛ́, atín, sɛ, alǒ nǔywɛ́ dó w’azɔ̌ nyi dodónú ɔ jí ɔ,
13 azɔ̌ e mɛ ɖokpó ɖokpó wa é ná jɛ wě gbe e gbe è ná gbéjé nǔ lɛ́ kpɔ́n é, ɖó myɔ ná ɖe nǔ lɛ́ bǐ xlɛ́, bɔ è ná tuun azɔ̌ alɔkpa e mɛ ɖokpó ɖokpó wa é.
14 Ényí azɔ̌ e mɛɖé wa nyi dodónú ɔ jí é kpo ɖo te ɔ, è ná d’ajɔ ɛ;
15 ényí azɔ̌ e mɛɖé wa é fyɔ́ ɔ, nǔ gěgé ná gú i, amɔ̌, è ná hwlɛ́n éɖésúnɔ ɔ gán; é ɖo mɔ̌ có, é ná cí mɛ e xo myɔ zlɛ́ é ɖɔhun.
16 Mi tuun ɖɔ tɛ́npli Mawu tɔn wɛ mi nyí bɔ gbigbɔ Mawu tɔn ɖo mi mɛ ǎ cé?
17 Ényí mɛɖé sú kún dó nú tɛ́npli Mawu tɔn ɔ, Mawu ná sú kún dó nú mɛ ɔ; ɖó tɛ́npli Mawu tɔn ɔ, nǔ mímɛ́ wɛ, bɔ mi wɛ ka nyí tɛ́npli énɛ́.
18 Mɛɖé ní ma blɛ́ éɖée ó: Ényí mɛɖé ɖo mi mɛ bo lin ɖɔ émí nyí nǔnywɛ́tɔ́ ɖo gbɛ* élɔ́ mɛ hǔn, ní húzú xlonɔ bá mɔ tɛn dó sixú húzú nǔnywɛ́tɔ́.
19 Ðó nǔnywɛ́ gbɛ élɔ́ tɔn ɔ, xlonɔnú wɛ é nyí ɖo Mawu nukɔn, ɖó è ko wlán ɖɔ: “Nǔnywɛ́tɔ́ lɛ́ ɔ, sísɛ́ yěɖésúnɔ tɔn wɛ é nɔ dó wlí yě ná.”
20 È lɛ́ wlán ɖɔ: “Jexóva tuun ɖɔ linlin nǔnywɛ́tɔ́ lɛ́ tɔn ɔ, nǔ yǎyá wɛ.”
21 Énɛ́ wú ɔ, mɛ ɖěbǔ ní ma yí nugo ɖó gbɛtɔ́ wútu ó; ɖó nǔ bǐ wɛ nyí mitɔn,
22 Pɔ́lu wɛ aa, Apolósu wɛ aa, Sefási* wɛ aa, wɛ̌kɛ́ ɔ wɛ aa, gbɛ wɛ aa, kú wɛ aa, nǔ e tíin din lɛ́ é wɛ aa, alǒ nǔ e ná wá tíin lɛ́ é wɛ aa, nǔ bǐ wɛ nyí mitɔn;
23 midɛɛ lɛ́ ka nyí Klísu tɔn; bɔ Klísu nyí Mawu tɔn.
Tínmɛ e ɖo do lɛ́ é
^ Alǒ “ɖó linlin ɖokpó ɔ.”
^ Alǒ “azɔ̌gán nǔnywɛ́tɔ́.”
^ Kpɔ́n Xógbe ɖé lɛ́ sín tínmɛ.
^ È nɔ lɛ́ ylɔ́ ɛ ɖɔ Piyɛ́ɛ.
