1 Kɔlɛ́ntinu lɛ́ 11:1-34
11 Mi ní nɔ wa nǔ nyɛɖɔhun, lěe un nɔ wa nǔ Klísu ɖɔhun gbɔn é.
2 Un nɔ kpa mi, ɖó mi nɔ flín mì ɖo nǔ bǐ mɛ, bo nɔ lɛ́ tɛ́ dó nǔkplɔ́nmɛ* e un sɔ́ d’así nú mi lɛ́ é wú gbánwúngbánwún.
3 Amɔ̌, un jló ɖɔ mi ní tuun ɖɔ Klísu wɛ nyí ta nú súnnu bǐ, bɔ súnnu nyí ta nú nyɔ̌nu, lobɔ Mawu nyí ta nú Klísu.
4 Súnnu ɖěbǔ e cyɔ́n nǔ ta hwenu e é ɖo ɖɛ xo wɛ alǒ ɖo gbeyíɖɔzɔ́ wa wɛ é, dó winnyá mɛ e nyí ta n’i é;
5 amɔ̌, nyɔ̌nu ɖěbǔ e ma cyɔ́n nǔ ta hwenu e é ɖo ɖɛ xo wɛ alǒ ɖo gbeyíɖɔzɔ́ wa wɛ é ǎ é, dó winnyá mɛ e nyí ta n’i é, ɖó nyɔ̌nu e xwlɛ́ ta é ɖɔhun pɛ́ɛ́ wɛ é cí.
6 Ðó ényí nyɔ̌nu ɖé ma cyɔ́n nǔ ta ǎ ɔ, é ɖó ná kpa ɖa; amɔ̌, ényí ɖa kpikpa alǒ ta xwlɛ́xwlɛ́ nyí winnyánú nú nyɔ̌nu ɖé ɔ, é ɖó ná cyɔ́n nǔ ta.
7 Súnnu ɖó ná cyɔ́n nǔ ta ǎ, ɖó akpajlɛ́ Mawu tɔn kpó susu Mawu tɔn kpó wɛ é nyí; nyɔ̌nu ka nyí susu súnnu tɔn.
8 Ðó súnnu wɛ è ɖe sín nyɔ̌nu wú ǎ, loɔ, nyɔ̌nu wɛ è ɖe sín súnnu wú.
9 Gɔ́ ná ɔ, è bló súnnu nú nyɔ̌nu ǎ, loɔ, nyɔ̌nu wɛ è bló nú súnnu.
10 Énɛ́ wɛ zɔ́n bɔ nyɔ̌nu ɖó ná ɖó wuntun e xlɛ́ ɖɔ é ɖo mɛɖé sín acɛ glɔ́ é ɖé ɖo ta, ɖó wɛnsagun lɛ́ wútu.
11 É ɖo mɔ̌ có, ɖo ahwanvú Aklúnɔ tɔn lɛ́ tɛ́ntin ɔ, nyɔ̌nu ɖo vo nú súnnu ǎ, súnnu ka ɖo vo nú nyɔ̌nu ǎ.
12 Ðó lěe è ɖe nyɔ̌nu sín súnnu wú gbɔn é ɔ, mɔ̌ jɛ́n súnnu lɔ nɔ wá gbɔn nyɔ̌nu jí gbɔn é nɛ́; amɔ̌, Mawu gɔ́n wɛ nǔ lɛ́ bǐ gosín.
13 Miɖésúnɔ ní da kpɔ́n: É ka sɔgbe ɖɔ nyɔ̌nu ní ma cyɔ́n nǔ ta ó bo xo ɖɛ sɛ́dó Mawu a?
14 Ayǐhɔ́ngbɛ ɔ ɖésú kplɔ́n mi ɖɔ winnyánú wɛ é nyí ɖɔ súnnu ní ɖó ɖa gaga,
15 bɔ é ka nyí susu nú nyɔ̌nu ɖɔ é ní ɖó ɖa gaga ǎ cé? Ðó ɖa wɛ è ná nyɔ̌nu bónú é ná cyɔ́n ta tɔn.
16 É ɖo mɔ̌ có, ényí mɛ ɖěbǔ jló ná dɔn nǔ dó xó énɛ́ wú dó jɛ hun dó nǔwalɔ ɖěvo jí ɔ, mǐdɛɛ lɛ́ sɔ́ ɖó ɖěvo ǎ, agun Mawu tɔn lɛ́ lɔ ka sɔ́ ɖó ɖěvo ǎ.
17 Amɔ̌, ɖó un ɖo nǔ élɔ́ lɛ́ kplɔ́n mi wɛ wútu ɔ, un kpa mi ǎ, ɖó kplé mitɔn lɛ́ nɔ hɛn le wá ǎ, loɔ, nǔ nyanya wɛ yě nɔ hɛn wá.
18 Ðó jɛ nukɔn hwɛ̌ ɔ, un se ɖɔ ényí agun ɔ kplé ɔ, kínklán nɔ ɖo mi tɛ́ntin; un ka ɖi nǔ ná ɖó bǎ ɖé mɛ.
19 Ðó é ɖo wɛn ɖɔ è ná ɖó sinsɛngbɛ́ta lɛ́ ayǐ ɖo tɛ́ntin mitɔn, mɔ̌ mɛ ɔ, mi mɛ e sín nǔ nyɔ́ Mawu nukúnmɛ lɛ́ é ná jɛ wě.
20 Ényí mi kplé ɖó kpɔ́ ɔ, é nɔ nyí bo ná dó ɖu Aklúnɔ sín nǔɖuɖu ɔ ǎ.
21 Ðó ényí hwenu e mi ná ɖu Aklúnɔ sín nǔɖuɖu ɔ dó é su ɔ, mɛ ɖokpó ɖokpó nɔ ko ɖu éɖésúnɔ tɔn jɛ nukɔn; énɛ́ nɔ zɔ́n bɔ xovɛ́ nɔ sin mɛ ɖě, bɔ ahan ka ko nɔ mú mɛ ɖěvo.
22 Mi ɖó xwé bo ná ɖu nǔ lobo nu ahan ɖ’é gbe ǎ cé? Mi nɔ ké ya nú agun Mawu tɔn ɔ ǎ cé? Blǒbló wɛ mi ɖe, bɔ winnyá ná hu mɛ e ma ɖó nǔɖé ǎ lɛ́ é a? Étɛ́ un ka ná ɖɔ nú mi? Un ɖó ná kpa mi wɛ a? Un sixú kpa mi ɖó xó énɛ́ wú ǎ.
23 Ðó nǔ e Aklúnɔ kplɔ́n mì é wɛ nyi lɔ kplɔ́n mi, é wɛ nyí ɖɔ, zǎn e mɛ è ná sa Aklúnɔ Jezu é ɔ, é sɔ́ wɔ̌xúxú ɖokpó,
24 bɔ ée é dó kú nú Mawu gúdo é ɔ, é fɛ́n wɔ̌xúxú ɔ bo ɖɔ: “Élɔ́ nɔ te nú agbaza ce e è ná sɔ́ jó dó ta mitɔn mɛ é. Mi nɔ bló lě dó flín mì ná.”
25 Ée yě ɖu nǔ ɔ fó é ɔ, é lɛ́ wa nǔ ɖokpó ɔ nú kɔ́fu ɔ bo ɖɔ: “Kɔ́fu élɔ́ nɔ te nú akɔjijɛ yɔ̌yɔ́ e hun ce ná bló bɔ é ná bɛ́ azɔ̌ é. Mi nɔ bló lě hweɖébǔnu e mi ɖo nunu wɛ é dó flín mì ná.”
26 Ðó hweɖébǔnu e mi ɖu wɔ̌xúxú élɔ́ bo nu kɔ́fu élɔ́ é ɔ, Aklúnɔ sín kú jlá wɛ mi ɖe nɛ́, káká jɛ hwenu e é ná wá é.
27 Énɛ́ wú ɔ, mɛ ɖěbǔ e ma jɛxá ǎ, bo ɖu Aklúnɔ sín wɔ̌xúxú alǒ nu kɔ́fu tɔn é ɔ, hwɛ wɛ é nyí bɔ é ná hu dó Aklúnɔ sín agbaza kpó hun kpó.
28 Jɛ nukɔn hwɛ̌ ɔ, mɛ ɖokpó ɖokpó ní tó gbéjé éɖée kpɔ́n, bo ná dó kú d’é jí ɖɔ nǔ e wa wɛ émí ɖe é sɔgbe hwɛ̌, énɛ́ gúdo kɛ́ɖɛ́ jɛ́n é sixú ɖu wɔ̌xúxú ɔ bo nu kɔ́fu ɔ.
29 Ðó mɛ e ɖu bo nu, bo ma ka mɔ nukúnnú jɛ agbaza ɔ wú ǎ é ɔ, hwɛɖónúmɛ dɔn dó éɖée jí wɛ é ɖe.
30 Énɛ́ wɛ zɔ́n bɔ mɛ gěgé ɖo mi mɛ bo ba gǎn kpo, bo ɖo azɔn jɛ wɛ, lobɔ mɛ hǎbǔ kú.*
31 Amɔ̌, ényí mǐ mɔ nǔ jɛ nǔ e mǐɖésúnɔ nyí é wú ɔ, è ná ɖɔ hwɛ xá mǐ ǎ.
32 É ɖo mɔ̌ có, ényí è ɖɔ hwɛ xá mǐ ɔ, Jexóva wɛ ɖo nǔ gbɛ́ nú mǐ wɛ nɛ́, bónú è ní ma wá ɖó hwɛ nú mǐ xá gbɛ ɔ ó.
33 Énɛ́ wú ɔ, nɔví ce lɛ́ mi, ényí mi kplé ɖó kpɔ́ bo ná ɖu Aklúnɔ sín nǔɖuɖu ɔ hǔn, mi nɔ nɔ te kpɔ́n miɖée lɛ́.
34 Ényí xovɛ́ sin mɛɖé hǔn, mɛ ɔ ní ɖu nǔ ɖo xwégbe, énɛ́ ɔ, è ná ɖɔ hwɛ xá mi hwenu e mi ná kplé ɖó kpɔ́ é ǎ. Un ná ɖe ɖɛ xó e kpo lɛ́ é hwenu e un ná wá é.
