1 Kɔlɛ́ntinu lɛ́ 16:1-24
16 Din ɔ, bo ná dó xo nǔníná lɛ́ kplé nú mɛ mímɛ́ lɛ́ ɔ, mi sixú xwedó wě ɖěɖěe un ɖe xá agun e ɖo Galáti lɛ́ é.
2 Ðo azǎn nukɔntɔn aklúnɔzángbla lɛ́ bǐ tɔn jí ɔ, mi mɛ ɖokpó ɖokpó ní nɔ ɖe nǔɖé ɖó vo sɔgbe xá nǔ e mi ɖó é, bónú mi ní ma wá ɖo nǔníná xo kplé wɛ hwenu e un ná wá é ó.
3 Hwenu e un ná wá dɔ̌n é ɔ, un ná ɖɔ bɔ súnnu e mi yí gbe ná ɖo wěmasɛ́dómɛ mitɔn lɛ́ mɛ lɛ́ é ná hɛn nǔ e mi ná kpó xomɛnyínyɔ́ kpó lɛ́ é yi Jeluzalɛ́mu.
4 É ɖo mɔ̌ có, nú un mɔ ɖɔ é jɛxá ɖɔ nyi lɔ ní yi dɔ̌n ɔ, yě ná xwedó mì yi.
5 Amɔ̌, un ná wá gɔ̌n mitɔn hwenu e un ná gbɔn Masedwáni dín gúdo é, ɖó un ɖo linlin wɛ bo ná gbɔn Masedwáni dín;
6 bɔ vlafo ɔ, un ná nɔ kpɔ́ xá mi nú hwenu ɖé, alǒ tlɛ nɔ kpɔ́ xá mi nú avivɔhwenu ɔ bǐ, énɛ́ ɔ, ényí un xwe fí ɖěbǔ ɔ, mi ná nyi mì jɛ fí ɖé.
7 Un jló ná mɔ mi kpowun, hwenu e un ná ɖo fínɛ́ gbɔn dín wɛ é ǎ, ɖó un ɖo nukún ɖó wɛ, bo ná nɔ kpɔ́ xá mi nú hwenu ɖé, ényí Jexóva jló ɔ nɛ́.
8 Amɔ̌, un ná nɔ Efɛ́zi fí, káká jɛ Pantekótuxwe ɔ hwenu,
9 ɖó sinsɛnzɔ́wiwa sín hɔn ɖaxó ɖé wɛ è hun nú mì, amɔ̌, gbeklánxámɛtɔ́ lɛ́ sukpɔ́.
10 Din ɔ, ényí Timɔtée wá hǔn, mi tɛ́n kpɔ́n, bónú nǔ ɖěbǔ ní ma dó xɛsi i, hwenu e é ná ɖo tɛ́ntin mitɔn é ó, ɖó Jexóva sín azɔ̌ wa wɛ é ɖe nyiɖɔhun.
11 Énɛ́ wú ɔ, mɛ ɖěbǔ ní ma dó vɛ̌ n’i ó. É wá xweyǐgbe hǔn, mi nyi i ɖo fífá mɛ, bónú é ní dó sixú wá gɔ̌n ce, ɖó nyi kpó nɔví lɛ́ kpó ɖo te kpɔ́n ɛ.
12 Din ɔ, nɔví mǐtɔn Apolósu ɔ, un byɔ́ ɛ vɛ́návɛ́ná ɖɔ é kpó nɔví lɛ́ kpó ní wá gɔ̌n mitɔn. É ɖo linlin wɛ bo ná wá gɔ̌n mitɔn din ǎ, amɔ̌, é ná wá hwenu e ali tɔn ná hun n’i é.
13 Mi nɔ wunzɛn, mi lí dǒ ɖo nǔɖiɖi mɛ, mi wa nǔ súnnu ɖɔhun,* mi ɖó hlɔ̌nhlɔ́n.
14 Mi ní nɔ wa nǔ bǐ kpó wǎnyíyí kpó.
15 Din ɔ, nɔví lɛ́ mi, un jló ná byɔ́ nǔ élɔ́ mi: Mi tuun ɖɔ xwédo Sitefanási tɔn wɛ húzú nǔɖitɔ́ jɛ nukɔn* ɖo Akáyi, lobɔ yě sɔ́ yěɖée jó, bo ná d’alɔ mɛ mímɛ́ lɛ́.
16 Mi ní nɔ ɖo miɖée hwíhwɛ́ dó mɛ mɔ̌hun lɛ́ kpó azɔ̌watɔ́gbɛ́ e nɔ w’azɔ̌ syɛ́nsyɛ́n lɛ́ é bǐ kpó glɔ́ wɛ.
17 Xomɛ nɔ hun mì ɖɔ Sitefanási, Fɔtunatúsi kpó Akayikúsi kpó ɖo fí, ɖó fí élɔ́ e mi ma ɖe ǎ é ɔ, yě sú do tɔn.
18 Ðó yě fá kɔ nú nyi kpó mi kpó.* Énɛ́ wú ɔ, mɛ mɔ̌hun lɛ́ ní nɔ xɔ akwɛ́ nú mi.
19 Agun e ɖo Azíi lɛ́ é dó gbe sɛ́dó mi. Akilási kpó Plisílu kpó, gɔ́ nú agun e nɔ kplé ɖo xwé yětɔn gbe é dó gbe sɛ́dó mi kpó ayi bǐ kpó ɖo Aklúnɔ mɛ.
20 Nɔví lɛ́ bǐ dó gbe sɛ́dó mi. Mi kí nɔví nɔví sín si nú miɖée, dó dó gbe miɖée lɛ́.
21 Nyɛ Pɔ́lu lɔ dó gbe sɛ́dó mi, alɔ nyiɖésúnɔ tɔn wɛ un sɔ́ dó wlán ná.
22 Mɛ ɖěbǔ e ma yí wǎn nú Aklúnɔ ǎ é ɔ, heelú mɛ ɔ. Aklúnɔ mǐtɔn è, wǎ!
23 Fɛ́nú Aklúnɔ Jezu tɔn ní nɔ kpɔ́ xá mi.
24 Wǎnyíyí ce ní nɔ kpɔ́ xá mi mɛ e ɖo bǔ xá Klísu Jezu lɛ́ é bǐ.
Tínmɛ e ɖo do lɛ́ é
^ Alǒ “mi kpankɔ́n.”
^ Blǔju tɔn, “wɛ nyí sínsɛ́n nukɔntɔn lɛ́.”
^ Blǔju tɔn, “nú gbigbɔ ce kpó mitɔn kpó.”
