Biblu xlɛ́ ɖɔ Aamagedɔ́ni ɔ, ahwan ɖé wɛ bɔ acɛkpikpa e gbɔn gbɛ ɔ mɛ lɛ́ é bǐ kpó Mawu kpó ná fun, é nyí ahwan ɖé bɔ è ná fun ɖo ayǐkúngban ɔ sín xá kpɛví ɖé mɛ kpowun ǎ.

•   “Awǒvi lɛ́ sín nǔɖɔɖayǐ lɛ́ . . . ɖidó axɔ́sú e ɖo ayǐkúngban ɔ bǐ jí lɛ́ é gɔ́n, bo ná xo yě bǐ kplé nú ahwan e è ná fun ɖo Mawu Nǔbǐwúkpétɔ́ ɔ sín azǎn ɖaxó ɔ gbe é. . . . Nǔɖɔɖayǐ lɛ́ xo axɔ́sú lɛ́ kplé dó fí e è nɔ ylɔ́ ɖɔ Aamagedɔ́ni ɖo Ebléegbe mɛ é.”—Nǔɖexlɛ́mɛ 16:14, 16, nwt.

 Xókwín Aamagedɔ́ni ɔ, xókwín Ebléegbe tɔn Har Meghiddôn mɛ wɛ é gosín, bɔ tínmɛ tɔn nyí “Só Mɛgído tɔn.” Mɛgído ɔ, toxo ɖé wɛ ka nɔ nyí mɔ̌ ɖo Izlayɛ́li hwexónu tɔn. Ðó hwɛjijɔ énɛ́ wú ɔ, mɛɖé lɛ́ nɔ lin ɖɔ ahwan e nɔ nyí Aamagedɔ́ni é ɔ, Israël wɛ è ná fun ɖe. Amɔ̌, fí e nɔ nyí Mɛgído é alǒ xá ɖěvo ɖěbǔ ɖe ɖo Zǎnzǎnhwe jí Mɛditɛlanɛ́ɛ xu ɔ tɔn bo d’agba sɔmɔ̌ bɔ “axɔ́sú e ɖo ayǐkúngban ɔ bǐ jí lɛ́ é” kpó ahwangɔnu yětɔn lɛ́ kpó ná kplé ɖe ǎ.

 Nǔ e è wlán dó wěma Nǔɖexlɛ́mɛ tɔn mɛ lɛ́ é ɔ, “wuntun lɛ́” wɛ yě nyí, alǒ xógbe nǔjlɛ́dónǔwú tɔn lɛ́ wɛ è zán dó wlán yě. (Nǔɖexlɛ́mɛ 1:1) Aamagedɔ́ni nɔ dó gesí fí ɖé lě tlɔlɔ ǎ, loɔ, ninɔmɛ e mɛ akɔta e gbɔn gbɛ ɔ bǐ mɛ lɛ́ é ná kplé ɖe azɔn gǔdo tɔn ɔ, bo ná fɔ́n gǔ dó acɛkpikpa Mawu tɔn jí é wɛ é nɔ dó gesí.—Nǔɖexlɛ́mɛ 19:11-16, 19-21.