Ya ɖaxó ɔ na dɔn hwenu hunnyahunnya tɔn ɖaxó hugǎn e ma ko tíìn ɖò gbɛ̀ ɔ mɛ kpɔ́n ǎ é wá. Sɔgbe xá nǔɖɔɖ’ayǐ Biblu tɔn ɔ, é na bɛ́ ɖò “azǎn gudogudo tɔn lɛ” mɛ, alǒ ɖò “nǔ lɛ bǐ sín fifó hwenu.” (2 Timɔtée 3:1; Daniyɛli 12:4) “Adǎn e na gbò gbɛtɔ́ lɛ ɔ na syɛn kaka, bɔ è ko mɔ mɔ̌hunkɔtɔn kpɔ́n gbeɖé sín hwenu e Mawu ko ɖó gbɛ̀ ɔ dó ɔ kaka jɛ dìn é ǎ; è ka sɔ́ lɛ́ ɖò mɔ̌hunkɔtɔn ɖě na mɔ wɛ gbeɖé ǎ.”—Maki 13:19; Daniyɛli 12:1; Matie 24:21, 22.

Nǔ ɖěɖee na jɛ ɖò ya ɖaxó ɔ hwenu lɛ é

•   Kún súsú dó nú sinsɛn nǔvú. È na sú kún dó nú sinsɛn nǔvú ɖò cɛju mɛ b’ɛ na kpaca mɛ. (Nǔɖexlɛ́mɛ 17:1, 5; 18:9, 10, 21) Acɛkpikpa hlɔnhlɔnnɔ ɖěɖee sín afɔ Gbɛ̌ Kplékplé Akɔta lɛ tɔn sɔ́ ɖó te lɛ é na wà nǔ mɔ̌hun, bonu jlǒ Mawu tɔn na dó jɛ jlɔ́.—Nǔɖexlɛ́mɛ 17:3, 15-18. a

•   Ahwan tíntɔ́n sinsɛn nǔgbo ɔ. Kplékplé akɔta lɛ tɔn, ee è dó gesí ɖò nǔmimɔ Ezekiyɛli tɔn mɛ b’ɛ nyí “Gɔgu . . . ɖò Magɔgi tomɛ” é, na ba na sú kún dó nú mɛ e ɖò sinsɛn nǔgbo ɔ mɛ lɛ é. Amɔ̌, Mawu na cyɔn alɔ mɛsɛntɔ́ tɔn lɛ jí bɔ è na sú kún dó nú ye ǎ.—Ezekiyɛli 38:1, 2, 9-12, 18-23.

•   Hwɛɖiɖɔ xá mɛ e ɖò ayikúngban ɔ jí lɛ é. Jezu na ɖɔhwɛ xá gbɛtɔ́ lɛ bǐ bo “na má ye ɖó donu we, lee lɛngbɔ̌nyitɔ́ nɔ cyan lɛngbɔ̌ lɛ ɖó vo, bo nɔ cyan gbɔ̌ lɛ ɖó vo gbɔn é.” (Matie 25:31-33) Gudo e mɛ ɖokpo ɖokpo nɔ nú “nɔví” Jezu tɔn e na kp’acɛ xá ɛ ɖò jixwé lɛ é, alǒ ma nɔ nú ye ǎ é jí wɛ hwɛɖiɖɔ tɔn na jinjɔn.—Matie 25:34-46.

•   Mɛ e na kp’acɛ ɖò Axɔ́suɖuto ɔ mɛ lɛ é xixokplé. Gbejinɔtɔ́ ɖěɖee è ko cyan bɔ ye na kp’acɛ xá Klisu lɛ é na fó gbɛzán ayikúngban jí tɔn yetɔn bɔ è na fɔ́n ye, lobɔ ye na nɔ gbɛ̀ ɖò jixwé.—Matie 24:31; 1 Kɔlɛntinu lɛ 15:50-53; 1 Tɛsalonikinu lɛ 4:15-17.

•   Haamagedɔni. “Ahwan e è na fun ɖò Mawu Nǔbǐwukpétɔ́ ɔ sín azǎn ɖaxó ɔ gbè,” bɔ è nɔ lɛ́ ylɔ́ ɖɔ “Mawu mavɔmavɔ sín azǎn ɔ” é wɛ. (Nǔɖexlɛ́mɛ 16:14, 16; Ezayíi 13:9; 2 Piyɛ́ɛ 3:12) Klisu na sú kún dó nú mɛ e é ɖó hwɛ na lɛ é. (Sofoníi 1:18; 2 Tɛsalonikinu lɛ 1:6-10) Kún súsú dó nú tuto toxóɖiɖɔ tɔn gbɛ̀ ɔ tɔn e kanlin ta tɛnwenɔ e xó Biblu ɖɔ é nɔte na é lɔ ɖ’emɛ.—Nǔɖexlɛ́mɛ 19:19-21.

Nǔ e na jɛ ɖò ya ɖaxó ɔ gudo lɛ é

•   Satáan kpo awoví lɛ kpo ginglɔ́n. Wɛnsagun ɖaxó ɖé na wlí Satáan kpo awoví lɛ kpo dó “domaɖó-azan ɔ” mɛ, xlɛ̌ ninɔmɛ nǔɖemawa tɔn e cí ɖɔ è kú ɖɔhun é tɔn ɖé wɛ. (Nǔɖexlɛ́mɛ 20:1-3) Ninɔmɛ e mɛ Satáan ɖè ɖò domaɖó-azan ɔ mɛ é sixu cí ɖɔ é ɖò gankpá mɛ wɛ ɖɔhun, é sɔ́ na kpéwú bo flú mɛ gbɔn fí ɖě ǎ.—Nǔɖexlɛ́mɛ 20:7.

•   Xwè Afatɔ́n ɔ na bɛ́. Axɔ́suɖuto Mawu tɔn na bɛ́ acɛkpikpa xwè 1 000 tɔn e na hɛn nyɔna ɖaxó lɛ wá nú gbɛtɔ́ lɛ é. (Nǔɖexlɛ́mɛ 5:9, 10; 20:4, 6) “Mɛ wɔbuwɔbu” e è ma sixu xà ǎ é na xò “ya ɖaxó ɔ” zlɛ́ bo na mɔ bǐbɛ̌ Xwè Afatɔ́n ɔ tɔn ɖò ayikúngban jí.—Nǔɖexlɛ́mɛ 7:9, 14; Ðɛhan 37:9-11.