Wema Nǔɖexlɛ́mɛ Tɔn: Etɛ ka Nyí Tinmɛ Tɔn?
Xósin e Biblu na é
Wema Biblu tɔn Nǔɖexlɛ́mɛ ɔ sín nyikɔ Glɛkigbe tɔn apokalupsis (apocalypse) sín tinmɛ wɛ nyí “Nǔ E Ðò Wěxo É” alǒ “Nǔ E Jí È Kɔ́n Sɛ̀ Sín É.” Nyikɔ enɛ ɖè tinmɛ Nǔɖexlɛ́mɛ tɔn xlɛ́, enɛ wɛ nyí ɖɔ é ɖè nǔ ɖěɖee ɖò hwlahwlá lɛ é nyi wěxo bo kɔ́n sɛ́ sín nǔ ɖěɖee na wá jɛ bɔ è ko wlan ɖ’ayǐ sín tɛgbɛ lɛ é jí. Nǔɖɔɖ’ayǐ e ɖ’emɛ lɛ é gegě kpò bo na wá jɛnu.
Sin sɛ̀ xwè na wema Nǔɖexlɛ́mɛ tɔn tɔn
Xónusɔ́ɖóte.—Nǔɖexlɛ́mɛ 1:1-9.
Wɛn e Jezu sɛ́dó agun tɛnwe lɛ é.—Nǔɖexlɛ́mɛ 1:10–3:22.
Nǔmimɔ e mɛ Mawu ɖò axɔ́suzinkpo tɔn jí ɖò jixwé ɖè é ɖé.— Nǔɖexlɛ́mɛ 4:1-11.
Nǔmimɔ ɖebɔdoɖewu ɖé, bɔ ɖě nɔ kplá mɛ yì ee bɔ d’ewu é jí:
Wuntun tɛnwe lɛ.—Nǔɖexlɛ́mɛ 5:1–8:6.
Kpɛn tɛnwe lɛ, atɔn gudo tɔn lɛ nɔte nú awě atɔn.—Nǔɖexlɛ́mɛ 8:7–14:20.
Sinnugannú tɛnwe lɛ, nǔ nyanya ɖò ɖokpo ɖokpo mɛ bo nɔ nɔte nú xomɛsin Mawu tɔn e è na kɔn nyi ayikúngban ɔ jí é.—Nǔɖexlɛ́mɛ 15:1–16:21.
Nǔmimɔ ɖěɖee mɛ è ɖɔ kún súsú dó nú kɛntɔ́ Mawu tɔn lɛ sín xó ɖè lɛ é.—Nǔɖexlɛ́mɛ 17:1–20:10.
Nǔmimɔ ɖěɖee ɖɔ xó dó nyɔna ɖěɖee Mawu na kɔn dó jixwé kpo ayikúngban kpo jí lɛ é wu lɛ é.—Nǔɖexlɛ́mɛ 20:11–22:5.
Tasuna.—Nǔɖexlɛ́mɛ 22:6-21.
Wlɛnwín ɖěɖee è na zán bo mɔ nukúnnú jɛ wema Nǔɖexlɛ́mɛ tɔn mɛ lɛ é
Nǔ ɖagbe wɛ tinmɛ tɔn hɛn nu nú Mawu sɛntɔ́ lɛ, é nyí xɛsi alǒ adohu adohu sín nǔ nú ye ǎ. Nǔgbo wɛ ɖɔ mɛ gegě nɔ lin ɖɔ xókwín “apocalypse” ɔ nɔ dó gesí adla ɖaxó, amɔ̌, wema Nǔɖexlɛ́mɛ tɔn ɔ sín bǐbɛ̌ kpo fifó kpo ɖɔ ɖɔ mɛ ɖěɖee nɔ xà, nɔ mɔ nukúnnú jɛ mɛ, bo nɔ wà nǔ sɔgbe xá wɛn e ɖ’emɛ lɛ é na ɖó awǎjijɛ hwenu e ye na ɖò mɔ̌ wà wɛ é.—Nǔɖexlɛ́mɛ 1:3; 22:7.
Nǔɖexlɛ́mɛ zán “xlɛ̌” alǒ wuntun gegě bɔ è ɖó na mɔ nukúnnú jɛ mɛ nyi gbɛɖe gbɛɖe ǎ.—Nǔɖexlɛ́mɛ 1:1.
Nǔ taji kpo wuntun kpo gegě ɖò wema Nǔɖexlɛ́mɛ tɔn mɛ bɔ è ko sɔ́ nu yetɔn ɖó te ɖò bǐbɛ̌mɛ Biblu ɔ tɔn:
Jehovah: É “ɖokpo géé wɛ nyí Mawu ɖò jixwé,” bo dá nǔ lɛ bǐ.—Sɛ́nflínmɛ 4:39; Ðɛhan 103:19; Nǔɖexlɛ́mɛ 4:11; 15:3.
Jezu Klisu: É wɛ nyí “Lɛngbɔ̌ví Mawu tɔn.”—Jaan 1:29; Nǔɖexlɛ́mɛ 5:6; 14:1.
Satáan Awoví: É wɛ nyí kɛntɔ́ Mawu tɔn.—Bǐbɛ̌mɛ 3:14, 15, nwt; Jaan 8:44; Nǔɖexlɛ́mɛ 12:9.
Babilɔnu Ðaxó ɔ: É cí Babilɔnu (Babɛli) hwexónu tɔn ɖɔhun, kɛntɔ́ Jehovah Mawu kpo togun tɔn kpo tɔn wɛ, bo lɛ́ nyí jɔtɛn sinsɛn adingban tɔn tɔn.—Bǐbɛ̌mɛ 11:2-9; Ezayíi 13:1, 11; Nǔɖexlɛ́mɛ 17:4-6; 18:4, 20.
“Xù”: Gbɛtɔ́ nyanya ɖěɖee klán gbè xá Mawu lɛ é wɛ.—Ezayíi 57:20; Nǔɖexlɛ́mɛ 13:1; 21:1.
Nǔ ɖěɖee sɔgbe xá nǔ e è nɔ zán ɖò goxɔ hwexónu tɔn mɛ dó sɛn Mawu lɛ é: Akɔjijɛgbá ɔ, xù wěkpɛ́n ɖɔhun ɔ (basya e è nɔ zán dó slá wǔ é), zogbɛ́n lɛ, zalinkpɔ́n didó zo kpo vɔsakpe e jí è nɔ dó vɔ̌ zo ɖè é ɖé kpo ɖò nǔ enɛ lɛ mɛ.—Tíntɔ́n 25:10, 17, 18; 40:24-32; Nǔɖexlɛ́mɛ 4:5, 6; 5:8; 8:3; 11:19.
Gběkanlin lɛ: Ye nɔte nú acɛkpikpa gbɛtɔ́ tɔn lɛ.—Daniyɛli 7:1-8, 17-26; Nǔɖexlɛ́mɛ 13:2, 11; 17:3.
Kɛ́n ɖěɖee è zán ɖò nǔjlɛdonǔwu linu lɛ é.—Nǔɖexlɛ́mɛ 1:20; 8:13; 13:18; 21:16.
Nǔmimɔ lɛ kúnkplá “Aklunɔzán . . . ɔ,” bo bɛ́ jijɛnu hwenu e è ɖó Axɔ́suɖuto Mawu tɔn ayǐ ɖò 1914 bɔ Jezu nyí Axɔ́su bo jɛ acɛ kpa jí é. (Nǔɖexlɛ́mɛ 1:10) Enɛ wu ɔ, mǐ sixu ɖó nukún ɖɔ akpáxwé taji hugǎn nǔɖɔɖ’ayǐ e ɖò Nǔɖexlɛ́mɛ mɛ lɛ é tɔn na jɛnu ɖò hwe mǐtɔn nu.
Bo na dó mɔ nukúnnú jɛ wema Nǔɖexlɛ́mɛ tɔn mɛ ɔ, mǐ lɛ́ ɖó hudo nǔ ɖěɖee d’alɔ mǐ bɔ mǐ mɔ nukúnnú jɛ akpáxwé Biblu ɔ tɔn e kpò lɛ é mɛ lɛ é tɔn, kaka jɛ nǔnywɛ e gosin Mawu gɔ́n é kpo alɔdó mɛ ɖěɖee ko mɔ nukúnnú jɛ mɛ lɛ é kpo tɔn jí.—Mɛ́sɛ́do 8:26-39; Jaki 1:5.