É ɖò wɛn ɖɔ Micɛli e sinsɛn ɖé lɛ nɔ dó gesí ɖɔ “Mɛ Mímɛ́ Micɛli” é wɛ nyí nyikɔ e è na Jezu jɛ nukɔn nú gbɛzán tɔn ayikúngban jí tɔn ɔ kpo hwenu e é gosin ayikúngban jí gudo é kpo é. a Micɛli dɔn nǔ xá Satáan ɖò kú Mɔyizi tɔn gudo, bo lɛ́ d’alɔ wɛnsagun ɖé b’ɛ dó wɛn Mawu tɔn gbeyiɖɔ Daniyɛli. (Daniyɛli 10:13, 21; Judi 9) Micɛli nɔ zán gbɛ̀ sɔgbe xá nyikɔ tɔn e sín tinmɛ nyí “Mɛ̌ ka Cí Mawu Ðɔhun?” é, gbɔn hunjijɛ dó acɛkpikpa Mawu tɔn jí kpo ahwanfunfun xá kɛntɔ́ Mawu tɔn lɛ kpo gblamɛ.—Daniyɛli 12:1; Nǔɖexlɛ́mɛ 12:7.

 Kpɔ́n nǔ e wu é sɔgbe ɖɔ è ni wá gbeta ɔ kɔn ɖɔ Jezu wɛ nyí wɛnsagun ɖaxó Micɛli é.

•   Micɛli wɛ nyí “wɛnsagun ɖaxó” ɔ. (Judi 9) Wemafɔ Biblu tɔn we mɛ jɛn tɛnmɛ-nyikɔ “wɛnsagun ɖaxó” e tinmɛ tɔn nyí “gǎn wɛnsagun lɛ tɔn” é tɔ́n ɖè. Ðò ninɔmɛ we lɛ bǐ mɛ ɔ, mɛ ɖokpo géé wɛ è zán xógbe enɛ na dó xlɛ́ ɖɔ wɛnsagun ɖokpo ta wɛ tɛnmɛ-nyikɔ enɛ ɖè. Wemafɔ we enɛ lɛ ɖokpo ɖɔ ɖɔ Aklunɔ Jezu e è fɔ́n sín kú é “na jɛ te sín jixwé, bɔ è na sè mɛɖé na ɖegbe kpo xósúsú kpo, bo na sè wɛnsagun Mawu tɔn ɖaxó ɖokpo sín gbè.” (1 Tɛsalonikinu lɛ 4:16) Jezu ɖó ‘wɛnsagun ɖaxó ɖokpo sín gbè’ ɖó é wɛ nyí wɛnsagun ɖaxó Micɛli ɔ.

•   Micɛli nyí gǎn nú ahwankpá wɛnsagun lɛ tɔn ɖé. “Micɛli kpodo wɛnsagun e ɖò glɔ̌ tɔn lɛ kpo fun ahwan xá Dlagɔ́ɔn ɔ,” alǒ Satáan. (Nǔɖexlɛ́mɛ 12:7) Micɛli ɖó acɛ ɖaxó ɖé ɖò nǔɖiɖó gbigbɔ tɔn lɛ tɛntin, ɖó è ylɔ́ ɛ ɖɔ “wɛnsagun Mawu tɔn ɖaxó lɛ ɖokpo” kpo “gǎn wɛnsagun lɛ tɔn” kpo. (Daniyɛli 10:13, 21; 12:1) Lee David E. Aune, ee nyí Akɔwé Alɛnuwema Yɔyɔ̌ ɔ tɔn ɖé é ɖɔ gbɔn é ɔ, tɛnmɛ-nyikɔ enɛ lɛ nɔ ɖexlɛ́ ɖɔ Micɛli nyí “gǎn e nɔ ɖegbe ɖò ahwankpá wɛnsagun lɛ tɔn nu é.”

   Biblu ɖɔ mɛ ɖevo sín nyikɔ, bɔ éɖokponɔ géé wɛ ɖó acɛ dó ahwankpá wɛnsagun lɛ tɔn ɖé jí. É tinmɛ ɖɔ “hwenu Aklunɔ Jezu kpo wɛnsagun tɔn hlɔnhlɔnnɔ lɛ kpo na gosin jixwé, bo na zɔn zo hɛhɛ tɛntin wá ɔ, é na . . . dɔn tó nú mɛ.” (2 Tɛsalonikinu lɛ 1:7, 8; Matie16:27) Jezu “yì [jixwé] . . . finɛ wɛ é ɖu axɔ́su nú wɛnsagun lɛ bǐ kpo acɛkpikpa lɛ bǐ kpo, kpodo hlɔnhlɔn lɛ bǐ kpan ɖè.” (1 Piyɛ́ɛ 3:21, 22) É na sɔgbe ɖɔ è ni lin ɖɔ Mawu na sɔ́ Jezu kpo Micɛli kpo ɖó tɛn acɛkpikpa tɔn ɖokpo ɔ mɛ, bonu ye na nyí gǎn nú wɛnsagun mímɛ́ lɛ ǎ. É nyɔ́ wà ɔ, é na sɔgbe hugǎn ɖɔ è ni wá gbeta ɔ kɔn ɖɔ Jezu kpo Micɛli kpo bǐ wɛ nɔ dó gesí mɛ ɖokpo ɔ.

•   Micɛli “na wá” ɖò “akpɔmimɔ sín hwenu” e ma ko tíìn kpɔ́n gbeɖé ǎ é. (Daniyɛli 12:1) Ðò wema Daniyɛli tɔn mɛ ɔ, è zán xókwín “wá” ɔ hwɛhwɛ dó dó gesí axɔ́su e site bo na wà nǔ bǔnɔ ɖé é. (Daniyɛli 11:2-4, 21) Jezu Klisu e è ɖexlɛ́ ɖɔ é nyí “Mawuxó” é na wà nǔ bǔnɔ ɖé ɖi “Axɔ́su axɔ́su lɛ tɔn” dó sú kún dó nú kɛntɔ́ Mawu tɔn lɛ bǐ bo lɛ́ cyɔn alɔ togun Mawu tɔn jí. (Nǔɖexlɛ́mɛ 19:11-16) É na wà mɔ̌ ɖò ‘adǎn e na wá gbò gbɛtɔ́ lɛ bo na syɛn dín, bɔ mɔ̌hunkɔtɔn ma ko jɛ kpɔ́n gbeɖé sín hwenu e Mawu ko ɖó gbɛ̀ ɔ é ǎ é’ hwenu, alǒ ɖò ya ɖaxó ɔ hwenu.—Matie 24:21, 42.