Mɛ̌ Mɛ̌ E Alǒ Etɛ Wɛnsagun lɛ ka Nyí?
Xósin e Biblu na é
Wɛnsagun lɛ ɔ, mɛ wɛ ye nyí bo ɖó hlɔnhlɔn kpo nǔwukpíkpé kpo hugǎn gbɛtɔ́ lɛ. (2 Piyɛ́ɛ 2:11) Ye nɔ nɔ jixwé, alǒ fí e nǔɖiɖó gbigbɔ tɔn lɛ nɔ nɔ é; fí ɖé wɛ bo yì jí tawun hú wɛkɛ ɔ. (1 Axɔ́su lɛ 8:27; Jaan 6:38) Enɛ wu wɛ è nɔ lɛ́ ylɔ́ ye ɖɔ gbigbɔ lɛ.—1 Axɔ́su lɛ 22:21; Ðɛhan 18:11.
Fitɛ wɛnsagun lɛ ka gosin?
Mawu dá wɛnsagun lɛ gbɔn Jezu jí. Biblu ɖɔ ɖɔ “nukɔngbeví wɛ é nyí, bo hugǎn nǔ e Mawu bló lɛ bǐ.” Ee Biblu ɖò lee Mawu zán Jezu ɖò nǔ lɛ dídá hwenu gbɔn é tinmɛ wɛ é ɔ, é ɖɔ: “[Jezu jí] wɛ Mawu bló nǔ e ɖò jinukúnsin lɛ kpodo ee ɖò ayikúngban jí lɛ bǐ kpan gbɔn: nǔ e mɔ wɛ è ɖè lɛ kpodo ee è ma ɖò mimɔ wɛ ǎ lɛ kpo,” kaka jɛ wɛnsagun lɛ jí. (Kolosinu lɛ 1:13-17) Wɛnsagun lɛ nɔ wlí alɔ ǎ, ye ka nɔ lɛ́ gbà kún ǎ. (Maki 12:25) É nyɔ́ wà ɔ, dǎ wɛ è dá “vǐ sunnu Mawu nǔgbo ɔ tɔn” enɛ lɛ ɖokpo ɖokpo.—Jɔbu 1:6, nwt.
È dá wɛnsagun lɛ é ɔ, é ko lín tawun hwɛ̌ cobɔ ayikúngban ɔ wá tíìn. Ee Mawu dá ayikúngban ɔ é ɔ, wɛnsagun lɛ jɛ ‘xó sú jí kpo xomɛhunhun kpo.’—Jɔbu 38:4-7.
Wɛnsagun nabi ka ɖè?
Biblu ɖɔ kɛ́n yetɔn tawun ǎ, amɔ̌ é ɖexlɛ́ ɖɔ ye sukpɔ́ tawun. Ði kpɔ́ndéwú ɔ, wɛnsagun wɔ̌bliwɔ̌va tɔ́n ɖò nǔ e è ɖexlɛ́ Jaan é ɖé mɛ.—Nǔɖexlɛ́mɛ 5:11.
Wɛnsagun lɛ ɖó nyikɔ yeɖesunɔ tɔn lɛ kpo jijɔ yeɖesunɔ tɔn lɛ kpo wɛ à?
Ɛɛn. Biblu ɖɔ wɛnsagun we sín nyikɔ, ye wɛ nyí Micɛli kpo Gabliyɛli kpo. (Daniyɛli 12:1; Luki 1:26,27) a Wɛnsagun ɖevo lɛ yí gbè ɖɔ emi ɖó nyikɔ, amɔ̌, ye kɔ́n sɛ̀ sín jí ǎ.—Bǐbɛ̌mɛ 32:30; Hwɛɖɔtɔ́ lɛ 13:17, 18.
Wɛnsagun lɛ ɖó jijɔ ɖokpo ɔ lɛ ǎ. Ye sixu ɖɔ xó xá yeɖée lɛ. (1 Kɔlɛntinu lɛ 13:1) Ye ɖó nǔwukpíkpé tamɛ linlin tɔn, lobo nɔ lɛ́ kpéwú bo nɔ zán xógbe ɖé lɛ dó kpa súsú nú Mawu. (Luki 2:13, 14) Gɔ́ na ɔ, ye ɖó acɛ bo na wá gbeta nǔ ɖagbe alǒ nǔ nyanya tɔn kɔn nú yeɖée, lee é nyí gbɔn hwenu e ye mɛ ɖé lɛ xò kpóɖó nú Satáan bo fɔ́n gǔ dó Mawu jí é. Mɔ̌ mɛ ɔ, ye hu hwɛ.—Matie 25:41; 2 Piyɛ́ɛ 2:4.
Tɛn vovo lɛ mɛ wɛ wɛnsagun lɛ ɖè à?
Ɛɛn. Wɛnsagun e ɖó hlɔnhlɔn hugǎn bo lɛ́ ɖó acɛ hugǎn é wɛ nyí Micɛli, wɛnsagun ɖaxó ɔ. (Judi 9; Nǔɖexlɛ́mɛ 12:7) Selafɛ́ɛn lɛ nyí wɛnsagun e ɖò tɛn ɖaxó mɛ lɛ é bo ɖò axɔ́suzinkpo Jehovah tɔn kpá. (Ezayíi 6:2, 6) Wɛnsagun ɖevo lɛ lɛ́ ɖò tɛn ɖaxó mɛ, bɔ è nɔ ylɔ́ ye ɖɔ Celubɛ́ɛn lɛ lobɔ ye nɔ wà azɔ̌ bǔnɔ lɛ. Ði kpɔ́ndéwú ɔ, Celubɛ́ɛn lɛ cɔ́ jikpá Edɛni tɔn sín ali ɔ, hwenu e è nya Adamu kpo Ɛvu kpo tɔ́n gudo é.—Bǐbɛ̌mɛ 3:23, 24.
Wɛnsagun lɛ nɔ d’alɔ gbɛtɔ́ lɛ wɛ à?
Ɛɛn, Mawu nɔ zán wɛnsagun tɔn gbejinɔtɔ́ lɛ dó d’alɔ gbɛtɔ́ lɛ ɖò égbé.
Mawu nɔ zán wɛnsagun lɛ dó xlɛ́ ali mɛsɛntɔ́ tɔn lɛ ɖò wɛnɖagbe Axɔ́suɖuto Mawu tɔn tɔn jijla mɛ. (Nǔɖexlɛ́mɛ 14:6, 7) Alixlɛ́mɛ enɛ nɔ hɛn lè wá nú mɛ ɖěɖee nɔ jlá wɛnɖagbe ɔ lɛ é kpo mɛ ɖěɖee nɔ ɖótó lɛ é kpo bǐ.—Mɛsɛ́dó 8:26-28.
Wɛnsagun lɛ nɔ d’alɔ bɔ è nɔ nya xɛ ɖò agun Klisanwun tɔn jí bonu mɛ nyanya lɛ ma hɛn ɛ blí ó.—Matie 13:49.
Wɛnsagun lɛ nɔ xlɛ́ ali mɛ e ɖò gbeji nú Mawu lɛ é bo nɔ lɛ́ nya xɛ ɖò ye jí.—Ðɛhan 34:8; 91:10, 11; Eblée lɛ 1:7, 14.
Zaanɖé dìn ɔ, wɛnsagun lɛ na gɔ́ nú Jezu Klisu bɔ ye na fun ahwan dó sú kún dó nú nǔnyanyawiwa, bo na gbɔn mɔ̌ mɛ dó na gbɔjɛ gbɛtɔ́ lɛ.—2 Tɛsalonikinu lɛ 1:6-8.
Mǐ mɛ ɖokpo ɖokpo ɖó wɛnsagun xɛnyaɖomɛjitɔ́ ɖé wɛ à?
Ganjininɔ mɛsɛntɔ́ Mawu tɔn lɛ tɔn ɖò gbigbɔ lixo nɔ ɖu ayi mɛ nú wɛnsagun lɛ, amɔ̌, enɛ xlɛ́ ɖɔ Mawu nɔ sɔ́ wɛnsagun ɖé nú Klisanwun ɖokpo ɖokpo b’ɛ nɔ nyí xɛnyaɖomɛjitɔ́ tɔn dandan ǎ. b (Matie 18:10) Wɛnsagun lɛ nɔ nya xɛ ɖò mɛsɛntɔ́ Mawu tɔn lɛ jí sín wuvɛ̌ alǒ mɛtɛnkpɔn lɛ bǐ mɛ ǎ. Biblu xlɛ́ ɖɔ hwɛhwɛ ɔ, Mawu nɔ “ɖè ali nú” mɛɖé bonu é “na tɔ́n sín” wuvɛ̌ ɖé mɛ, gbɔn nǔnywɛ kpo hlɔnhlɔn kpo nina ɛ bonu é na dɛ ɖ’enu gblamɛ.—1 Kɔlɛntinu lɛ 10:12, 13; Jaki 1:2-5.
Nukúnnúmɔjɛnǔmɛ agɔ lɛ dó wɛnsagun lɛ wu
Nukúnnúmɔjɛnǔmɛ agɔ: Wɛnsagun lɛ bǐ wɛ nyí wɛnsagun ɖagbe.
Nǔgbo: Biblu ɖɔ xó dó “nǔɖoyɛswímɛ nyanya” lɛ kpo “wɛnsagun e hu hwɛ lɛ é” kpo wu. (Efɛzinu lɛ 6:12; 2 Piyɛ́ɛ 2:4) Wɛnsagun nyanya enɛ lɛ ɔ, awoví lɛ wɛ ye nyí bo xò kpóɖó nú Satáan bo fɔ́n gǔ dó Mawu jí.
Nukúnnúmɔjɛnǔmɛ agɔ: Wɛnsagun lɛ nyí jɔmakú.
Nǔgbo: È na sú kún dó nú wɛnsagun nyanya lɛ, kaka jɛ Satáan Awoví jí.—Judi 6.
Nukúnnúmɔjɛnǔmɛ agɔ: Enyi gbɛtɔ́ lɛ kú ɔ, ye nɔ huzu wɛnsagun.
Nǔgbo: Nǔɖiɖó Mawu tɔn alɔkpa vo wɛ wɛnsagun lɛ nyí, ye nyí gbɛtɔ́ e fɔ́n sín kú lɛ é ǎ. (Kolosinu lɛ 1:16) Mawu nɔ na gbɛ̀ jɔmakú mɛ ɖěɖee é fɔ́n sín kú bɔ ye na nɔ gbɛ̀ ɖò jixwé lɛ é. (1 Kɔlɛntinu lɛ 15:53, 54) Tɛn e mɛ è na sɔ́ ye ɖó é na yì aga hú wɛnsagun lɛ tɔn.—1 Kɔlɛntinu lɛ 6:3.
Nukúnnúmɔjɛnǔmɛ agɔ: Bo na dó sɛn gbɛtɔ́ lɛ wu wɛ wɛnsagun lɛ tíìn.
Nǔgbo: Gbeɖiɖe Mawu tɔn lɛ wɛ wɛnsagun lɛ nɔ xwedó, enyi mǐdɛɛ lɛ tɔn lɛ ǎ. (Ðɛhan 103:20, 21) Jezu ɖesu tlɛ tuùn ɖɔ Mawu wɛ emi na byɔ alɔdó, é kún nyí wɛnsagun lɛ tlɔlɔ wɛ ó.—Matie 26:53.
Nukúnnúmɔjɛnǔmɛ agɔ: Mǐ sixu xoɖɛ sɛ́dó wɛnsagun lɛ dó byɔ alɔdó.
Nǔgbo: Akpáxwé Mawusinsɛn mǐtɔn tɔn ɖé wɛ ɖɛxixo nyí, bɔ Jehovah Mawu kɛɖɛ wɛ mǐ ɖó na nɔ xò sɛ́dó. (Nǔɖexlɛ́mɛ 19:10) Mǐ ɖó na nɔ xoɖɛ sɛ́dó Mawu ɖokponɔ géé gbɔn Jezu jí.—Jaan 14:6.
a Lilɛdógbeɖevomɛ ɖé lɛ zán xókwín “Lucifer” ɖò Ezayíi 14:12 mɛ, bɔ mɛɖé lɛ nɔ lin ɖɔ nyikɔ wɛnsagun e wá huzu Satáan Awoví é tɔn wɛ. É ɖò mɔ̌ có, xókwín Ebléegbe tɔn dodó e è zán ɖò finɛ é sín tinmɛ wɛ nyí “nɔ kɛn.” Nǔ ɖěɖee lɛlɛ̌ dó wemafɔ enɛ lɛ é xlɛ́ ɖɔ xókwín enɛ kún nɔ dó gesí Satáan ó, loɔ, acɛkpikpa Babilɔnu tɔn e Mawu wá hu acɛ na ɖó goyiyi tɔn wutu é wɛ é nɔ dó gesí. (Ezayíi 14:4, 13-20) È zán xógbe “nɔ kɛn” ɔ bo na dó ko acɛkpikpa Babilɔnu tɔn hwenu e é j’ayǐ gudo é.
b Mɛɖé lɛ lin ɖɔ tan e ɖɔ xó dó Piyɛ́ɛ ɖiɖetɔ́n sín gankpá mɛ wu é xlɛ́ ɖɔ Piyɛ́ɛ ɖó wɛnsagun xɛnyaɖomɛjitɔ́ ɖé. (Mɛsɛ́dó lɛ 12:6-16) È ɖò mɔ̌ có, ee ahwanvu lɛ ɖɔ “sɛ́ [Piyɛ́ɛ] tɔn wɛ” é ɔ, é sixu ko nyí ɖɔ, ye vɛ́dó ɖɔ wɛnsagun e sɔ́ Piyɛ́ɛ sín afɔ ɖó te é ɖé wɛ wá ye gɔ́n sín, lé é kún nyí Piyɛ́ɛ ɖesu wɛ ó.
Xóta élɔ́ lɛ́ lɔ sixú jɛjí nú we
NǓKANBYƆ́ BIBLU TƆN LƐ́ SÍN XÓSIN
Mɛ̌ ka Nyí Wɛnsagun Ðaxó Micɛli?
È nɔ lɛ́ sɔ́ nyikɔ ɖevo dó tuùn i, bɔ a sixu ko tuùn éyɛ ganji hugǎn.
ATƆXWƐ
A ka Ðó Wɛnsagun Xɛnyaɖomɛjitɔ́ ɖé Wɛ À?
A ka sixu kanɖeji ɖɔ wɛnsagun ɖé alǒ wɛnsagun lɛ na nya xɛ ɖò jǐ towe à?
NǓKANBYƆ́ BIBLU TƆN LƐ́ SÍN XÓSIN
Awoví lɛ ka Tíìn Nǔgbo À?
Mɛ̌ mɛ̌ e awoví lɛ ka nyí? Fitɛ ye ka gosin?
NǓKPLƆ́NMƐ BIBLU TƆN LƐ́
Tɛ́n lěe mǐ nɔ kplɔ́n Biblu xá mɛ gbɔn é kpɔ́n
Nǔ nǔkplɔ́nmɛtɔ́ ɖé ní kplɔ́n Biblu xá we vɔ̌nu.