Hwɛ e mɛɖé hu bɔ nǔwalɔ mɛ ɔ tɔn e bɔ d’ewu lɛ é nɔ zɔ́n bɔ Mawu ma sixu sɔ́ kɛ ɛ gbeɖé ǎ é wɛ hwɛ e è ma nɔ sɔ́ kɛ mɛ ǎ é ɖé nyí. Nɛ̌ mɛɖé ka sixu sɔnǔ nú nǔwalɔ mɔhun ɖé gbɔn?

 Mawu nɔ sɔ́ hwɛ kɛ mɛ ɖěɖee lɛkɔ sín hwɛ yetɔn gudo, nɔ zán gbɛ̀ sɔgbe xá nǔgbododó tɔn lɛ, bo ɖi nǔ nú Jezu Klisu lɛ é. (Mɛsɛ́dó 3:19, 20) É ɖò mɔ̌ có, mɛɖé sixu dóve ɖò hwɛhuhu mɛ sɔmɔ̌ bo sɔ́ na sixu huzu jijɔ tɔn kpo nǔwalɔ tɔn kpo gbeɖé ǎ. Biblu tinmɛ ɖɔ mɛ mɔhun ɖó “ayi nyanya,” bo “jó éɖée dó” bɔ “hwɛhuhu flú i,” lobo “wá huzu tótlítɔ́.” (Eblée lɛ 3:12, 13) Lee è ma sɔ́ sixu sɔ́ ko e ko gbɔn myɔ mɛ é dó wà nǔ ɖevo na ǎ gbɔn é ɔ, mɔ̌ wɛ ayi mɛ mɔhun tɔn ko dó gudo Mawu bǐ dégbédégbé gbɔn é nɛ. (Ezayíi 45:9) È sɔ́ sixu zɔ́n dó hwɛjijɔ ɖě jí bo sɔ́ hwɛ kɛ mɛ mɔhun ǎ, ɖó é hu hwɛ e è ma nɔ sɔ́ kɛ mɛ ǎ é.—Eblée lɛ 10:26, 27.

 Sinsɛngán Jwifu lɛ tɔn e nɔ gbɛ̀ ɖò Jezu sín hwenu lɛ é ɖé lɛ hu hwɛ e è ma nɔ sɔ́ kɛ mɛ ǎ é. Ye tuùn ɖɔ gbigbɔ mímɛ́ Mawu tɔn wɛ nyí hlɔnhlɔn e Jezu nɔ dó bló nǔjiwǔ lɛ na é có, ye zán ayi winniwínní bo ɖɔ ɖɔ Satáan Awoví gɔ́n wɛ é ba hlɔnhlɔn enɛ sín.—Maki 3:22, 28-30.

Kpɔ́ndéwú hwɛ e è sixu sɔ́ kɛ mɛ lɛ é tɔn

•  Nu e è ma tuùn ǎ bo nyla é. Nu wɛ mɛsɛ́dó Pɔlu nɔ nyla dó mɛ wu ɖ’ayǐ, amɔ̌, é wá ɖɔ ɖò gudo mɛ ɖɔ: “[Mawu] kú nǔblawu nú mì, ɖó hwenɛnu ɔ, un ɖi nǔ n’i ǎ, un ka tuùn nǔ e wà wɛ un ɖè ɔ ǎ.”—1 Timɔtée 1:13.

•  Afɔdógbě alǒ nyɔnu ɖevo biba. Biblu ɖɔ xó dó mɛɖé lɛ wu bɔ ye dó afɔ gbě alǒ ba nyɔnu ɖevo, amɔ̌, ye wá huzu jijɔ bɔ Mawu sɔ́ hwɛ yetɔn kɛ ye.—1 Kɔlɛntinu lɛ 6:9-11.

“Un ka hu hwɛ e è ma nɔ sɔ́ kɛ mɛ ǎ é ɖé wɛ à?”

 Enyi hwɛ towe lɛ vɛ́ nú we dodó, bɔ a jló na huzu nǔgbo nǔgbo ɔ, a sɔ́ hu hwɛ e è ma nɔ sɔ́ kɛ mɛ ǎ é ǎ. Mawu tlɛ sixu sɔ́ hwɛ e è hu azɔn mɔkpan é ɖé kɛ mɛ, enyi ayi hwɛhutɔ́ ɔ tɔn ma ko dó gudo è bǐ mlɛ́mlɛ́ ǎ ɔ nɛ.—Ezayíi 1:18.

 Mɛɖé lɛ sixu mɔ ɖɔ emi hu hwɛ e è ma nɔ sɔ́ kɛ mɛ ǎ é ɖé, ɖó hwɛdómɛɖée sín linlin lɛ nɔ ɖò tagba dó nú ye wɛ. É ɖò mɔ̌ có, Biblu kplɔ́n mɛ ɖɔ mǐ kún sixu ganjɛ lee nǔ nɔ cí nú mǐ é wu hwebǐnu ó. (Jelemíi 17:9) Mawu na mǐ acɛ ɖɔ mǐ ni dá hwɛ nú mɛɖé ǎ, mǐ tlɛ na dá hwɛ nú mǐɖée ǎ. (Hlɔmanu lɛ 14:4, 12) Nú ayi mǐtɔn na bo kpò ɖò hwɛ dó mǐ wɛ ɔ, Mawu hɛn ɔ, é na sɔ́ hwɛ kɛ mǐ.—1 Jaan 3:19, 20.

Hwɛ e è ma nɔ sɔ́ kɛ mɛ ǎ é ɖé wɛ Judasi Isikaliɔti ka hu à?

 Ganji, é wɛ é hu. Nukúnkɛ́n zɔ́n bɔ é fin akwɛ e è na bɔ è na zán nú nǔ mímɛ́ lɛ é. É tlɛ wà nǔ mɛ e ɖò wamamɔnɔ lɛ tɔn mɛ ví dó wɛ é ɖɔhun, loɔ, lee é na wà gbɔn bo na mɔ akwɛ sukpɔ́ bo fin é wɛ nyí nǔ e ba wɛ é ɖè nǔgbo nǔgbo é. (Jaan 12:4-8) Ee Judasi sín ayi wá dó ɖɔ̀ dò ɖò nǔnyanyawiwa mɛ bǐ é ɔ, é sà Jezu yí gankwɛ 30. Jezu tuùn ɖɔ Judasi sín hwɛ kún na vɛ́ n’i dó nǔjɔnǔ mɛ gbeɖé ó, bo ylɔ́ ɛ ɖɔ “mɛ e ɖó na bú é.” (Jaan 17:12) Enɛ xlɛ́ ɖɔ kú mavɔmavɔ wɛ Judasi kú, bo ɖó nukúnɖiɖó fínfɔ́n sín kú tɔn ɖě ǎ.—Maki 14:21.

 Judasi xlɛ́ ɖɔ hwɛ emitɔn vɛ́ nú emi nǔgbo nǔgbo ǎ. É ɖɔ hwɛ tɔn lɛ nú Mawu ǎ, loɔ, sinsɛngán e kpo é kpo bla sé lɛ é wɛ é ɖɔ na.—Matie 27:3-5; 2 Kɔlɛntinu lɛ 7:10.