Ɛɛn. Biblu sixu d’alɔ mǐ bɔ mǐ na ɖí xwi xá hwɛ didó mɛɖée kpo nǔnywɛ kpo. (Ðɛhan 32:1-5) Enyi mǐ wà nǔɖe nyi dò, bɔ é ka vɛ́ nú mǐ nǔgbo nǔgbo tɔn ɔ, Mawu na sɔ́ hwɛ kɛ mǐ, bo na d’alɔ mǐ bɔ mǐ na mɔ mǐɖée mɛ. (Ðɛhan 86:5) Biblu xlɛ́ ɖɔ hwɛ didó mɛɖée sixu hɛn lè wá hweɖelɛnu, é wɛ nyí ɖɔ, é sixu sísɛ́ mǐ bɔ mǐ na ɖó nǔ nyanya ɖé wiwa te, lobo na dó gǎn syɛnsyɛn bo nyi alɔ na hweɖevonu. (Ðɛhan 51:19; Nǔnywɛxó 14:9) Amɔ̌, Biblu ɖè wě xá mǐ ɖɔ mǐ ni nyi alɔ nú hwɛ didó mǐɖée zɛ xwé wu, vlafo mǐ na nɔ ɖó hwɛ nú mǐɖée ɖɔ mǐ kú nyí nǔɖewanú ɖò Mawu nukúnmɛ ó. Enyi mǐ nɔ lin mɔ̌ dó mǐɖée wu ɔ, é sixu zɔ́n bɔ mǐ na “jɛ aluwɛ ɖaxó ɖé mɛ, bo na mɔ ɖɔ nǔ bǐ ko vɔ.”—2 Kɔlɛntinu lɛ 2:7.

•  Etɛ ka sixu zɔ́n bɔ è na nɔ dóhwɛ mɛɖée?

•  Nɛ̌ un ka sixu ɖí xwi xá hwɛ didó nyiɖée gbɔn?

•  Wemafɔ Biblu tɔn lɛ dó hwɛ didó mɛɖée kpo hwɛsɔ́kɛmɛ kpo jí

 Mǐ sixu nɔ dóhwɛ mǐɖée ɖó hwɛjijɔ gegě wu. Mǐ sixu mɔ ɖɔ mǐ jɛ dò nú mɛ e mǐ yí wǎn na é ɖé, alǒ mɔ ɖɔ mǐ kún wà nǔ e mǐ ɖó na wà é ɖé ó. Hweɖelɛnu ɔ, mǐ sixu nɔ ma wà nǔ nyi dò, bo ka na nɔ dóhwɛ mǐɖée. Ði kpɔ́ndéwú ɔ, enyi mǐ sɔ́ nǔgbododó e ma ɖò jlɛ̌ jí ǎ é ɖé lɛ ɖ’ayǐ nú mǐɖée ɔ, mǐ na ɖibla wá dóhwɛ e ma ɖò dandan ǎ lɛ é mǐɖée, hweɖebǔnu e mǐ ma kpéwú bo wà nǔ sɔgbe xá nǔgbododó enɛ lɛ ǎ é. Enɛ wu wɛ Biblu dó wusyɛn lanmɛ nú mǐ ɖɔ mǐ ni ma nɔ ɖó nukún nǔ ɖò mǐɖée sí zɛ xwé wu ó.—Nǔnywɛtɔ́xó 7:16.

 Nǔwanyido towe ni ma zɔ́n bonu a lin ɖɔ nukúnɖiɖó ɖebǔ kún sɔ́ ɖè ó ó, é nyɔ́ wà ɔ, wà nǔ e wu a kpé é dó jlá nǔ lɛ ɖó. Gbɔn nɛ̌ é?

•   Yǐ gbè nú nǔwanyido towe lɛ. Xoɖɛ sɛ́dó Jehovah a Mawu, bo byɔ ɛ ɖɔ é ni sɔ́ hwɛ kɛ we. (Ðɛhan 38:19; Luki 11:4) Enyi nǔ e a wà nyi dò é vɛ́ nú we nǔgbo nǔgbo, bonu a lɛkɔ sín gudo, lobo dó gǎn syɛnsyɛn bonu ɖě ma sɔ́ jɛnu ó ɔ, a sixu ɖeji ɖɔ Mawu na sè ɖɛ towe. (2 Tan 33:13; Ðɛhan 34:19) É nɔ mɔ nǔ e mɛɖé nyí ɖò xomɛ é, gbɛtɔ́ ɖebǔ ka sixu mɔ enɛ ǎ. Enyi Mawu ɖ’ayi wu ɖɔ mǐ ɖò gǎn dó wɛ bo na jó nǔ nyanya ɖé wiwa dó ɔ, “nǔ jlɔjlɔ wɛ é nɔ wà; é na sɔ́ hwɛ mǐtɔn lɛ kɛ mǐ.”—1 Jaan 1:9; Nǔnywɛxó 28:13.

   É ɖò wɛn ɖɔ nú a jɛ dò nú mɛɖé ɔ, a ɖó na yí hwɛ gbè, bo dó kɛnklɛn nú mɛ ɔ dó nǔjɔnǔ mɛ. Mɔ̌ biblo sixu nɔ ma bɔwǔ! É na byɔ ɖɔ a ni kpankɔ́n bo lɛ́ sɔ́ hwiɖée hwe. Amɔ̌, kɛnklɛn didó kpo ayi ɖokpo kpo nɔ wà nǔ taji we: É na ɖè agban kpinkpɛn ɖé sín abɔ̌ towe lɛ jí, bo na lɛ́ hɛn fífá wá tɛntin mitɔn.—Matie 3:8; 5:23, 24.

•   Lin tamɛ dó wemafɔ e ɖɔ xó dó nǔblawukúnúmɛ Mawu tɔn jí lɛ é jí. Kpɔ́ndéwú tɔn ɖokpo wɛ nyí 1 Jaan 3:19, 20. Ðò finɛ ɔ, Biblu yí gbè ɖɔ ‘ayi mǐtɔn sixu ɖó hwɛ nú mǐ,’ é wɛ nyí ɖɔ, mǐ sixu nɔ syɛn nukún dó mǐɖée dín, vlafo bo na nɔ mɔ ɖɔ mǐ kún jɛxa wanyiyi Mawu tɔn ó. É ɖò mɔ̌ có, wemafɔ ɔ lɛ́ ɖɔ ɖɔ “Mawu hugǎn ayi mǐtɔn.” Gbɔn nɛ̌ é? É tuùn nǔ e kúnkplá mǐ lɛ é bǐ, lobo mɔ nukúnnú jɛ lee nǔ nɔ cí nú mǐ é kpo gǎnmaɖó mǐtɔn lɛ kpo wu mlɛ́mlɛ́. É tuùn ɖɔ è jì mǐ kpo hwɛhuhu kpo wɛ, tinmɛ tɔn wɛ nyí ɖɔ mǐ nɔ yawǔ mlɛ́ dó nǔ nyanya. b (Ðɛhan 51:7) Enɛ wu ɔ, é nɔ ɖè kɔ dó mɛ ɖěɖee sín hwɛ vɛ́ nú ye nǔgbo nǔgbo lɛ é ǎ.—Ðɛhan 32:5.

•   Ma nɔ ɖò tamɛ lin dó nǔwanyido towe xóxó lɛ jí wɛ ó. Sunnu kpo nyɔnu kpo ɖěɖee wà nǔ nyanya lɛ, bo ka wá ɖyɔ walɔ yetɔn lɛ é gegě sín tan wɛ ɖò Biblu mɛ. Mɛ ɖokpo sín kpɔ́ndéwú wɛ nyí Solu Táasi tɔn, ee è wá ylɔ́ ɖɔ mɛsɛ́dó Pɔlu é. Hwenu e é nyí Falizyɛn ɖé é ɔ, é dóya nú ahwanvu Jezu tɔn lɛ tawun dó adaka mɛ. (Mɛsɛ́dó 8:3; 9:1, 2, 11) Amɔ̌, ee é wá mɔ ɖɔ Mawu kpo Mɛsiya alǒ Klisu ɔ kpo klán gbè xá wɛ emi ɖè é ɔ, é lɛkɔ sín hwɛ tɔn lɛ gudo, bo ɖyɔ walɔ tɔn lɛ, lobo wá nyí Klisanwun e ɖó kpɔ́ndéwú ɖagbe é ɖé. É ɖò wɛn ɖɔ nǔ e Pɔlu wà nyi dò wá yì lɛ é vɛ́ n’i tawun, amɔ̌, é nɔ fɔ́n bo nɔ ɖò tamɛ lin dó nǔwanyido enɛ lɛ jí wɛ kpowun ǎ. Ee Pɔlu mɔ nǔ jɛ wu ɖɔ Mawu kú nǔblawu ɖaxó nú emi é ɔ, é jlá wɛnɖagbe ɔ kpo kanɖodónǔwu kpo, lobo ɖè ayi sín gbɛ̀ ninɔ kaka sɔyi sín nukúnɖiɖó ɔ jí kpɔ́n ǎ.—Filipunu lɛ 3:13, 14.

 Jelemíi 31:34: “Un na sɔ́ nǔ e ye wà nyi dò ɔ bǐ kɛ ye, bo sɔ́ na flín hwɛ e ye hu dó mì lɛ ǎ.”

 Tinmɛ tɔn: Nú Mawu sɔ́ hwɛ kɛ mǐ ɔ, é sɔ́ na sɔ́ nǔwanyido mǐtɔn lɛ wá atɛ jí ǎ. Nǔblawukúnúmɛ tɔn nyí mɛblɛblɛ́ tɔn ǎ.