Ganji, Awoví tíìn nǔgbo. É wɛ nyí “axɔ́su gbɛ̀ elɔ tɔn,” nǔɖiɖó gbigbɔ tɔn ɖé wɛ bo wá huzu mɛ nyanya lobo fɔ́n gǔ dó Mawu jí. (Jaan 14:30; Efɛzinu lɛ 6:11, 12) Biblu ɖè mɛ alɔkpa e Awoví nyí é xlɛ́ gbɔn nyikɔ elɔ lɛ kpo tinmɛ yetɔn lɛ kpo gblamɛ:

•   Satáan, tinmɛ tɔn wɛ nyí “Gbeklánxámɛtɔ́.”—Jɔbu 1:6.

•   Awoví, tinmɛ tɔn wɛ nyí “Jidómɛtɔ́.”—Nǔɖexlɛ́mɛ 12:9.

•   Dan, ee è zán ɖò Biblu mɛ bɔ tinmɛ tɔn nyí “Mɛblɛɖutɔ́” é.—2 Kɔlɛntinu lɛ 11:3.

•   Mɛtɛnkpɔntɔ́.—Matie 4:3.

•   Adingbannɔ.—Jaan 8:44.

É nyí jijɔ nyanya ɖé ǎ

 Mɛɖé lɛ nɔ lin ɖɔ jijɔ nyanya ɖé kpowun wɛ Satáan Awoví nyí bo ɖò mǐ mɛ. Amɔ̌, è wlan xóɖɔɖókpɔ́ Mawu kpo Satáan kpo tɔn ɖé dó Biblu mɛ. Mawu mɛ́ bɔ nǔ bǐ vɔ ɖ’ewu, enɛ wu ɔ, nǔ nyanya ɖebǔ ɖò Mawu ɖesunɔ mɛ bonu é na ɖɔ xó xá ǎ. (Sɛ́nflínmɛ 32:4; Jɔbu 2:1-6) Mɔ̌ ɖokpo ɔ, Satáan tɛ́n Jezu e ma ɖó hwɛ ɖebǔ ɖò kɔ ǎ é kpɔ́n. (Matie 4:8-10; 1 Jaan 3:5) Mɔ̌ mɛ ɔ, Biblu ɖexlɛ́ ɖɔ Awoví tíìn nǔgbo, é kún nyí jijɔ nyanya ɖé kpowun ó.

 É ka ɖó na kpaca mǐ ɖɔ mɛ gegě nɔ ɖi nǔ ɖɔ Satáan kún tíìn nǔgbo nǔgbo ó wɛ à? Ðebǔ lɔ ǎ, ɖó Biblu ɖɔ ɖɔ Satáan nɔ zán mɛblɛblɛ́ dó kpé nǔ e gbé nya wɛ é ɖè lɛ é wu. (2 Tɛsalonikinu lɛ 2:9, 10) Wlɛnwín tɔn ɖaxó hugǎn e é nɔ zán lɛ é ɖokpo wɛ nyí ɖɔ é na va nukún nú mɛ gegě bonu ye ni ma tuùn ɖɔ é tíìn ó.—2 Kɔlɛntinu lɛ 4:4.

  Xɛxó: Nyikɔ ɖevo e Awoví ɖó é wɛ nyí Lusifɛ́ɛ.

 Nǔgbo: Xógbe Ebléegbe tɔn e Biblu ɖé lɛ lilɛ dó “Lusifɛ́ɛ” é sín tinmɛ wɛ nyí “sunví zǎnzǎn tɔn.” (Ezayíi 14:12) Nǔ ɖěɖee lɛlɛ̌ dó wemafɔ ɔ lɛ é xlɛ́ ɖɔ xógbe enɛ ɖò gesí dó axɔ́su-hɛ́nnu, alǒ axɔ́su-kúnkan Babilɔnu tɔn e Mawu na dó winnya ɖó goyiyi tɔn wutu é wɛ. (Ezayíi 14:4, 13-20) È zán xógbe “sunví zǎnzǎn tɔn” ɔ dó cá nú axɔ́su-hɛ́nnu Babilɔnu tɔn hwenu e è sú kún tɔn dó gudo é.

  Xɛxó: Satáan nɔ wà azɔ̌ nú Mawu ɖi “mɛɖesínhwɛmɛtɔ́.”

 Nǔgbo: Kɛntɔ́ Mawu tɔn wɛ Awoví nyí, é nyí mɛsɛntɔ́ tɔn ǎ. Satáan Awoví nɔ klán gbè xá mɛ e nɔ sɛn Mawu lɛ é bo nɔ lɛ́ dóhwɛ agɔ ye.—1 Piyɛ́ɛ 5:8; Nǔɖexlɛ́mɛ 12:10.