Qori na ka ratou kaya eso na dauvakadidike me baleta na veisau ni draki. Ke o vakabauta na Dauveibuli yalololoma, o na rairai nanuma ena ka ratou kaya ni Kalou e bulia na vuravura me vakavinakataki koya ga ena levu na sala.

Ia e sega ni rawa ni vakavinakataki koya ga na vuravura ni sa vakacacani tiko vakalevu. Na cava meda nuidei kina ni na rawa ni cakava na Kalou e dua na ka?

Raica eso na tikinivolatabu ena kato e vakadeitaka ni na tudei na vuravura, ena bulabula tale ga.

• Na Kalou e bulia na vuravura. “Ena ivakatekivu, e bulia na lomalagi kei na vuravura na Kalou.”—Vakatekivu 1:1

• Na Kalou e taukena na vuravura. “E nei Jiova a o vuravura kei na ka kece e tu kina.”—Same 24:1.

• E bulia na Kalou na vuravura me kua ni vakarusai. “Sa vakataudeitaka na yavu ni vuravura o koya, ena sega ni yavalati mai na kena vanua me tawamudu, io me tawamudu.” —Same 104:5.

• E yalataka na Kalou ni na bula tawamudu na ka bula kece e vuravura. “Na Kalou dina, o koya e bulia na vuravura, . . . e sega ni bulia me lala, e bulia ga me tawa.”—Aisea 45:18.

• E yalataka na Kalou nida na bula tawamudu e vuravura. “O ira na yalododonu era na taukena na vuravura, era na qai bula tawamudu kina.”—Same 37:29.

Na Kalou e bulia na vuravura meda bula tawamudu kina qai kua ni vakacacani. E parofisaitaka na iVolatabu ni Kalou o Jiova ena tarova, qai vakarusai ira na vakacacana tiko na vuravura ena nona gauna lokuci. —Vakatakila 11:18.

E yalataka na iVolatabu ni Kalou ena veisautaka na vuravura me dua na parataisi totoka qai bulabula. Ena qai dedeka na ligana me “vakaceguya na veika era gadreva na ka bula kece.”—Same 145:16.