O KATHERINE a susu mai Merika, a papitaiso me dua na iVakadinadina i Jiova ni se qai yabaki 16. E dau taleitaka sara vakalevu na cakacaka vakaitalatala, ia e raica ni vica ga era ciqoma na itukutuku vinaka ena vanua e dau vunau kina. E kaya: “Au dau wilika na kedra italanoa o ira era dau masuta me talai e dua me vukei ira me rawa nira kila na Kalou. Au dau vinakata meu kunea e dua e va ya, ia e se bera vakadua.”

Ni oti e vica vata na yabaki nona vunau tiko ena dua ga na yalava, sa qai nanuma o Katherine me sa toki ena dua tale na vanua e rawa ni kunei ira kina na tamata era na kauai ena itukutuku vinaka. Ia sa qai vakasamataka tale ke rawa vua me cakava qori. Se qai vakadua ga ena nona bula me yawaki ratou na nona vuvale—me rua ga na macawa—e vakanananu tale ga vakalevu i vale e veisiga. Ia e yaga vakalevu na nona guta me vakila na marau ni nodra vukei o ira era vakasaqarai Jiova. Ni vakasamataka eso na vanua me toki kina, sa qai volavola ena valenivolavola ni tabana e Guam me rawa ni kila na itukutuku e gadreva. Ena Julai 2007, ni sa yabaki 26, sa qai toki o Katherine e Saipan, e dua na yanuyanu ena Pasifika, rauta ni 10,000 na kilomita na kena yawa mai na nona vale. Na cava e qai yaco?

Ni oti ga vakalailai nona toki yani o Katherine, e sotavi Doris, e dua na marama sa yabaki 40 vakacaca, e taleitaka me vulica na iVolatabu. Ni rau vulica oti ga na imatai ni tolu na wase ni ivola Kaya na iVolatabu, sa tekivu lomaleqa o Katherine. E kaya: “O Doris e dua na gonevuli vinaka, ia au sega ni vinakata meu vakaleqa qori. Se sega vakadua niu caka vuli vakawasoma va qo, au raica tale ga ni vinaka me vakavulici Doris e dua sa bau matua toka, de dua me rau yabaki vata.” E masuti Jiova o Katherine me vukei koya me qara e dua na tacida yalewa nuitaki e rawa ni vukei nona gonevuli. Sa qai nanuma me tukuna vei Doris na veisau qori.

E tukuna o Katherine: “Ni bera niu tukuna na veisau qori, e kaya o Doris ni via tukuna vei au e dua na leqa. Au vakarogoci koya vinaka, oti au sa qai tukuna vua na sala e vukei au kina o Jiova meu walia na ituvaki vata ga ya ena noqu bula. E vakavinavinakataki au.” Sa qai tukuna o Doris vei Katherine: “E vakayagataki iko o Jiova mo vukei au. Na imatai ni siga o gole mai kina i vale, au a wili iVolatabu tiko me vicavata na aua. Au tagi sara ga ena noqu kerea na Kalou me tala mai e dua me vukei au meu kila na iVolatabu. Oti ga  ya o tukituki sara mai na katuba. E sauma o Jiova na noqu masu!” E luluvu sara ga o Katherine ni talanoataka tiko na veika e yaco oya. E kaya: “Na veika e tukuna o Doris e isau sara ga ni noqu masu. E vakaraitaka vei au o Jiova ni rawa niu tomana tiko ga na vuli.”

E papitaiso o Doris ena 2010, nikua sa vakavulica tiko e levu ena iVolatabu. E vola o Katherine: “Dua na ka na levu ni noqu marau ni sa qai saumi na noqu kerekere meu vukea e dua me dauveiqaravi yalodina i Jiova!” Nikua, sa marautaka tiko o Katherine nona veiqaravi vakapainia lavotaki ena yanuyanu o Kosrae ena Pasifika.

Sivia e duanadrau na mataveitacini mai na vanuatani (duidui na yabaki ni bula mai na 19 ina 79) era veiqaravi tiko e Micronesia, na vanua e vinakati kina vakalevu na veivuke. Na yalo ni cakacaka e tu vei ira na mataveitacini qori e vakamacalataka vinaka o Erica, a toki i Guam ena 2006 ni se yabaki 19. E kaya: “E ka marautaki nida painia ena vanua era karamaca tu kina vakayalo na tamata. Au vakavinavinakataki Jiova vakalevu niu mai vakaitavi ena cakacaka qo. E ivakarau ni bula vinaka duadua!” Nikua, sa marautaka tiko o Erica nona veiqaravi vakapainia lavotaki ena vanua o Ebeye ena Marshall Islands. Ia e rawa ni ka ni bolebole toka na veiqaravi e vanua tani. Meda raica mada qo e tolu na ituvaki dredre kei na ka era cakava na mataveitacini era toki e kea mera walia kina na ituvaki qori.

iVakarau ni Bula. Ni yaco yani ena 2007 ena yanuyanu o Palau o Simon yabaki 22, e raica ni lailai ga na ka e rawata vakailavo ena vanua oya ni vakatauvatani kei na ka e rawata ena nona vanua o Igiladi. “E vinakati meu vulica meu kua ni volia na ka ga au vinakata. Ia qo, au na digia vakayalomatua na kakana meu volia, au na vakaraica tale ga na isau vinaka duadua. Ni dua na iyaya e ca, au na vakaraica na iyaya era vakayagataki oti qai kerea e dua me vakavinakataka.” E yaga vakacava vei Simon na nona vinakata me bula rawarawa ga? E kaya: “E vukei au meu vulica na ka e bibi duadua ena noqu bula, meu bula tale ga ena ka lailai ga e tu vei au. Au vakadinadinataka sara ga na veivuke i Jiova ena levu na ituvaki au sotava. Na vitu na yabaki ni noqu veiqaravi tu eke, e sega vakadua ni leqa na ka meu kania kei na vanua meu moce kina.” Io, o Jiova e tokoni ira era bula rawarawa ga baleta nira via vakaliuca na Matanitu ni Kalou.—Maciu 6:32, 33.

Vakanananu e vale. E kaya o Erica: “Au dau veivolekati sara vakalevu kei ratou e vale, au leqataka gona ni na rawa ni vakaleqa na noqu cakacaka vakaitalatala na noqu dau vakananumi ratou.” Na cava e cakava me vakarautaki koya kina? “Ni bera niu toki, au dau vakawilika ena Vale ni Vakatawa na ulutaga me baleta na vakanananu e vale. E vukei au vakalevu qori meu rawa ni vakarautaka vinaka na lomaqu ena ituvaki au na sotava. Ena dua na ulutaga, a vakadeitaka vei luvena yalewa e dua na tina na veikaroni i Jiova, ena nona kaya, ‘O Jiova ena maroroi iko vinaka sara ni vakatauvatani vei au.’ Qori e vakaukauataki  au sara ga.” O Hannah kei na watina o Patrick, rau veiqaravi tiko e Majuro ena Marshall Islands. Nona dau vakasamataki ira na mataveitacini ena ivavakoso o Hannah e vosota rawa kina na vakanananu e vale. E kaya: “Au dau vakavinavinakataki Jiova vakalevu me baleta na mataveitacini e vuravura raraba nira noqu vuvale tale ga. Ke sega na nodra veitokoni, au na sega ni rawa ni veiqaravi ena vanua e gadrevi kina na veivuke.”

Veikilai. E kaya o Simon: “Nida yaco yani ena dua na vanua vou, voleka ni ka kece ga e duidui. So na gauna au dau vinakata meu dau veiwali, me kilai tale ga na ka au tukuna.” E kaya o Erica: “Niu se qai tekivu, vaka e sega ni dau sota na mita, ia qori e vukei au meu raica na inaki ni lomaqu me baleta na noqu toki. Au sega ni toki meu saga na ka e yaga vei au, ia meu cakava e levu na ka vei Jiova.” E tomana: “Ni toso na gauna, au sa kunea sara eso na noqu itokani au marautaka.” E saga vagumatua o Simon me vulica na vosa vakaPalau, a rawa kina vua me “lomasavu” vei ira na mataveitacini e kea. (2 Kor. 6:13) Era taleitaki koya sara ga na mataveitacini ena nona sasaga me vulica na nodra vosa. O koya gona, nira cakacaka vata na mataveitacini ena vanua ya kei ira na tacida mai vanuatani, era vakalougatataki ena nodra marautaka vata na veitokani voleka ena loma ni ivavakoso. Na cava eso tale na veivakalougatataki era sotava o ira era yalorawarawa mera veiqaravi ena vanua e gadrevi kina na veivuke?

E kaya na yapositolo o Paula: “O koya e kaburaka vakalevu ena tamusuka tale ga vakalevu.” (2 Kor. 9:6) Na ivakavuvuli e vakamacalataki ena tikinivolatabu qo e baleti ira sara ga era vakalevutaka na nodra cakacaka vakaitalatala. Na ka vinaka cava era ‘tamusuka vakalevu’ e Micronesia?

E levu na vuli iVolatabu e rawa ni tauyavutaki e Micronesia, era toso tale ga vakayalo o ira na vulica qai bulataka na Vosa ni Kalou. Rau vunau tale ga e Angaur o Patrick kei Hannah, e dua na yanuyanu lailai era tiko kina e le 320 na lewenivanua. Ni oti e rua na vula na vunau, erau sotava e dua na marama itubutubu le dua. E vakadonuya me vulica na iVolatabu, taleitaka sara vakalevu na ka dina, qai vakayacora na veisau lelevu ena nona bula. E kaya o Hannah: “Ni oti neirau dau caka vuli, me keirau biubiu mai nona vale ena basikeli, keirau dau veiraici ga qai kaya: ‘Vinaka Jiova!’” E tomana: “Au kila ni o Jiova e rawa ni vagolea mai na marama ya ni vakayagataki ira na nona dauveiqaravi, ia ni keirau veiqaravi tiko ena vanua e gadrevi kina na veivuke, keirau rawa kina ni vakasaqara qai vukei ira era vaka na sipi mera mai kilai Jiova. Qo e dua na veivakalougatataki levu duadua ena neirau bula!” Me vaka ga a tukuna o Erica, “ni o vukea e dua me mai kilai Jiova, o na tamusuka na marau e sega ni tukuni rawa!”

Levu na vanua era gadrevi kina vakalevu na dautukutuku. Vakacava o rawa ni toki ena so na vanua era gadrevi tu kina na veivuke? Kerei Jiova ena masu me uqeti iko mo rawa ni taleitaka mo vakalevutaka nomu cakacaka vakaitalatala. Veivosakitaka qori kei ira na qase ni ivavakoso, na ivakatawa dauveilakoyaki, se o ira era sa veiqaravi ena vanua e gadrevi kina na veivuke. Ni o sa tekivu lalawa, volavola ena valenivolavola ni tabana e qarava na yalava o taleitaka mo veiqaravi kina, qai taroga eso tale na itukutuku o gadreva. * Io, o rawa tale ga ni tomani ira na vica na udolu na mataveitacini—gone kei na qase, dawai se vakawati—era soli ira vakarawarawa ra qai vakila na marau nira ‘tamusuka vakalevu.’