iKarua ni iVola Vei Ira mai Korinica 9:1-15
9 E sega ni gadrevi meu volavola tale yani vei kemuni ena ka e vauca na nodra qaravi na yalosavasava,+
2 niu kila vinaka na nomuni sa vakarau tu. Au sakitaki kemuni gona vei ira mai Masitonia, ni sa dua na yabaki nodra vakarau tu mai Akaia mera veivuke ni uqeti ira vakalevu na nomuni yalogu.
3 Au tala yani qo eso na tacida me kua ni tawayaga kina na neitou sakitaki kemuni ena tikina qo, ia moni vakarau rawa, me vaka au tukuna me baleti kemuni.
4 Ia ke ra tomani au yani na kai Masitonia oni qai sega ni vakarau, keitou na madua, o kemuni tale ga, ni sa na tawayaga na neitou vakanuinui.
5 Au nanuma kina meu vakauqeti ratou na veitacini me ratou liu yani me ratou lai vakarautaka rawa na levu ni iloloma me vaka oni yalataka. Me vakarautaki rawa gona na iloloma qori me vaka na iloloma e soli ena yalomarau, sega ni iloloma e kovei.
6 Ena tikina qo, o koya e kaburaka vakalailai ena tamusuka tale ga vakalailai, o koya e kaburaka vakalevu ena tamusuka tale ga vakalevu.+
7 Me cakava na tamata yadua na ka e vakadeitaka e lomana, me kua ni cakava ena voraki se vuturi,+ baleta na Kalou e taleitaki koya e soli ka ena marau.+
8 Kena ikuri, na Kalou e rawa ni vakalevutaka vei kemuni na nona loloma soli wale kece, me veirauti kina na ka kece oni gadreva, moni vakaitavi vakalevu tale ga ena cakacaka vinaka kece ga.+
9 (Me vaka e volai: “E wasewase o koya ena lomasavu, e soli ka vua na dravudravua. Na nona yalododonu ena tu ga me tawamudu.”+
10 O koya e solia vakayauyau na sorenikau vei koya e kaburaka kei na madrai me laukana, ena solia, ena vakalevutaka tale ga vei kemuni na sorenikau moni kaburaka, ena vakatubura tale ga na vua ni nomuni yalododonu.)
11 E vakalougatataki kemuni vakalevu na Kalou moni lomasoli kina ena ka kece, mera vakacaucautaka kina na Kalou eso ena vuku ni ka eda cakava,
12 baleta na itavi ni veiqaravi qo e sega ni kena inaki wale ga me vakarautaka na veika era gadreva na yalosavasava,+ ia me vakacaucautaki tale ga kina vakalevu na Kalou.
13 Na cakacaka qo e vakalagilagi kina na Kalou ni oni talairawarawa ina itukutuku vinaka kei Karisito me vaka oni dau tukuna, ena vuku tale ga ni nomuni lomasavu ena nomuni cau vei ira, vei ira tale ga na tamata kece,+
14 kei na nodra masulaki kemuni, era kauaitaki kemuni ni rui uasivi na loloma soli wale ni Kalou sa tu vei kemuni.
15 Me vakavinavinakataki na Kalou ena nona loloma soli wale, na iloloma e sega ni vakamacalataki rawa.
