E kaya ga na iVolatabu: “Ena ivakatekivu, e bulia na lomalagi kei na vuravura na Kalou.” (Vakatekivu 1:1) E sega ni tukuni kina se a bulia vakacava na Kalou na veika kece. Ke mani dua gona na kacabote levu a buli kina na lomalagi kei na vuravura, ena sega ga ni saqata na ka e kaya na iVolatabu. Ia o cei e vakavuna na kacabote levu qori? Ena saumi qori ena Vakatekivu 1:1.

Era vakabauta e levu na saenitisi ni kacabote vakaitamera qo e yaco ga vakasauri, qai taura toka e dua na gauna mera buli ira ga vakataki ira na veika somidi mera kalokalo, se so tale na vuravura. E sega ni duavata kina na iVolatabu, e tukuni ga ni vakavuna na Kalou na buli ni lomalagi kei na vuravura, se mani lewa me yaco e dua na kacabote levu se vakayagataka eso tale na sala ni bulibuli.

“Ena ivakatekivu, e bulia na lomalagi kei na vuravura na Kalou.”—Vakatekivu 1:1.

Io. E kaya na iVolatabu ni bulia na veika bula na Kalou ena kena “veimataqali.” (Vakatekivu 1:11, 12, 21, 24, 25) Vakacava e rawa ni laurai na duidui ena dua ga na ka bula? Io. Ia vakacava ni vakadikevi e dua ga na mataqali ka bula, rawa ni vakadinadinataki ni bula tiko vakaidewadewa ni veiveisau na ituvaki? Sega.

Vakasamataka mada na ivakaraitaki qo: Ena 1970 vakacaca, era vakadikeva kina na daunivakadidike ena yanuyanu na Galápagos e dua na mataqali manumanuvuka lailai na finch. Era raica ni gauna e veisau kina na draki e levu ga na kena mataqali era gusu lelevu era dau bula dede. Era kaya kina eso ni qori e ivakadinadina ni bula vakaidewadewa. Ia e dina qori se veisau ga e dau yaco ni vakatau ena ituvaki? Oti ga e vica na yabaki, sa levu tale na kedra iwiliwili na kena mataqali era gusu lalai. E kaya kina o Jeffrey H. Schwartz, na parofesa e dau dikeva na bula ni kawatamata ena gauna makawa kei na gauna qo ni rawa ni vakatau na bula ni so na ibulibuli ena veiveisau ni ituvaki, ia “e sega ni buli tale kina e dua na ka bula vou.”

E kaya na iVolatabu ni “bulia na ka kece [na Kalou].” (Vakatakila 4:11) E sega ni “vakacegu” me yacova ni sa oti na nona bulibuli. (Vakatekivu 2:2) E matata kina qo: E sega ni bulia tu ga na Kalou e dua na ka bula, oti mai wawa tu yani me yacova ni dewa tiko na ka bula qori me sivia e milioni vakacaca na yabaki me qai basika kina na ika, maqe kei na kawatamata. * Qori e vakatokai me macroevolution se na veiveisau lelevu e yaco ena veika bula nira bula tiko vakaidewadewa. E saqati kina nona cakacaka na Dauveibuli, ni kaya na iVolatabu ni “bulia o Jiova na lomalagi kei na vuravura, na wasawasa kei na ka kece e tu kina.”—Lako Yani 20:11; Vakatakila 10:6.

“E ganiti kemuni Jiova, na neimami Kalou, me nomuni na lagilagi, na vakarokoroko, kei na kaukaua, ni oni bulia na ka kece.”—Vakatakila 4:11.

Eso tale na ka mo kila: E kaya na iVolatabu ni “kilai” na “veika tawarairai me baleti koya” na Kalou me “tekivu [sara] mai na gauna a buli kina na vuravura.” (Roma 1:20) E rawa ni vakainaki na bula ena kena vulici na veika me baleta na Kalou, ni yavutaki ena loloma na nona inaki, era okati tale tiko ga kina o ira na vakasaqarai koya dina. (Dauvunau 12:13; Iperiu 11:6) Ke o via kila eso tale na ka, rai ena www.pr418.com se raica e dua na iVakadinadina i Jiova. Rai ena IVAKAVUVULI VAKAIVOLATABU > SAUMI NA TARO VAKAIVOLATABU.