Nodra Cakacaka na Yapositolo 7:1-60
7 E qai tukuna na bete levu: “E dinataki na ka qo?”
2 E sauma o Sitiveni: “Kemuni na veiwekani kei kemuni na qase, ni rogoca mada. Na Kalou lagilagi a rairai vua na tukada o Eparama ni se tiko mai Mesopotemia ni bera ni toki i Karana,+
3 qai kaya vua, ‘Mo lako tani mai na nomu vanua, biuti ira na wekamu mo lako ina vanua au na vakaraitaka vei iko.’+
4 Mani biuta nodra vanua na kai Kalitia me lai tiko e Karana. Ni sa mate o tamana+ e qai vakasalataki koya na Kalou me toki ina vanua sara ga oni sa tiko kina qo.+
5 Ia e sega ni solia vua e dua na ka ena vanua qo me nona ivotavota, sega mada ga ni dua na tikina lailai,* e yalataka ga ni na qai solia vua me nona ivotavota, vei ira tale ga na nona kawa,+ dina ni se sega ni vakaluveni.
6 E qai kaya vua na Kalou nira na tiko vulagi na nona kawa ena vanua e sega ni nodra, era na vakabobulataki vei ira na lewenivanua, era na vakararawataki tale ga me 400 na yabaki.+
7 ‘Au na qai veilewaitaka na matanitu ena vakabobulataki ira,’+ e kaya na Kalou, ‘oti ya era na qai sereki mera cakava vei au na veiqaravi tabu ena vanua qo.’+
8 “E solia tale ga vei Eparama e dua na veiyalayalati ni veicilivi,+ e qai tamai Aisake o koya,+ e cilivi koya sara ena ikawalu ni siga,+ o Aisake e tamai Jekope, o Jekope e qai tamadra na 12 na ulunivuvale.*
9 Eratou vuvutaki Josefa o iratou na ulunivuvale+ ratou qai volitaki koya i Ijipita.+ Ia a tiko vata kei koya na Kalou,+
10 e vakabulai koya mai na nona rarawa kece, e vukei koya me maqosa, me vuku tale ga ni mai tu e matai Fero na tui Ijipita. E mani lesi koya o Fero me lewai Ijipita kei na nona vuvale kece.+
11 Ia e qai yaco e Ijipita taucoko kei Kenani na dausiga, e vakilai sara ga na rarawa levu, ra qai sega ni kunea rawa na tukada na kakana mera kania.+
12 Ia e rogoca o Jekope ni tiko mai Ijipita na kakana, mani talai ira kina na tukada ena imatai ni nodra ilakolako.+
13 Ena ikarua ni ilakolako, sa qai vakatakilai koya o Josefa vei ratou na tuakana, mai kila tale ga na vuvale i Josefa o Fero.+
14 Mani talatala o Josefa me lai kau mai o Jekope na tamana kei ira kece na wekana ena vanua ya,+ era le 75 taucoko.+
15 E lako sobu sara i Ijipita o Jekope,+ e mate kina+ kei ira tale ga na tukada.+
16 E kau na yagodra i Sikemi, era lai vakadavori ena qaravatu a volia o Eparama vei ira na luvei Emori mai Sikemi ena ilavo siliva.+
17 “Ni voleka na gauna me vakayacori kina na yalayala ni Kalou vei Eparama, sa qai tubu ga na kedra iwiliwili era tiko e Ijipita,
18 me yacova ni veiliutaki e Ijipita e dua na tui e sega ni kilai Josefa.+
19 Na tui qo e dabui ira na wekada, e vakasaurarataki ira na tama mera biuti ira na luvedra lalai mera kua tale ni bula tiko.+
20 Ena gauna ya e sucu kina o Mosese, e gone rairai totoka ena mata ni Kalou. E tolu na vula nona susugi tiko ena vale nei tamana.+
21 Ia ena gauna e sa biu kina,*+ e kauti koya na luvei Fero yalewa qai susugi koya me vaka ga na luvena dina.+
22 E mani vakavulici o Mosese ena nodra vuku kece na kai Ijipita. E kaukaua ena vosa kei na veika e cakava.+
23 “Ni sa yabaki 40, sa qai lomana* me lai raici ira mada na tacina, o ira na luvei Isireli.+
24 Ni raica na nona vakalolomataki tiko e dua, e mani cudruvaka na ka e yaco ya qai vakamatea na kai Ijipita e veivakalolomataki tiko.
25 E nanuma o koya nira na siqema na tacina ni ligana ga ena vakabulai ira kina na Kalou, ia era sega ni kila rawa.
26 Ena siga e tarava, e raica sara e rua ni rau veivala tiko, e saga me rau veiyaloni ena duavata, e kaya: ‘Drau veitacini ga. Na cava drau veivala tiko kina?’
27 Ia e biliraki Mosese o koya e vakalolomataki tacina tiko, qai kaya: ‘O cei e lesi iko mo iliuliu, mo turaganilewa tale ga vei keirau?
28 E cava, o via vakamatei au me vaka nomu vakamatea na kai Ijipita ya enanoa?’
29 Ni rogoca ya o Mosese, e dro sara qai lai tiko vulagi ena vanua o Mitiani, lai rua kina na luvena tagane.+
30 “Ni oti e 40 na yabaki, e rairai vua e dua na agilosi ena vanua talasiga ni Ulu i Saineai, ena dua na kau vakavotona e caudre tiko.+
31 Ni raica ya o Mosese, e kurabui sara ga. Ni toso yani me vakadikeva, e qai rogoca na domo i Jiova:*
32 ‘O yau na nodra Kalou na tukamuni, na Kalou i Eparama, i Aisake, kei Jekope.’+ E sautaninini o Mosese qai sega tale ni doudou me via vakadidike.
33 E tukuna vua o Jiova:* ‘Luvata mai yavamu nomu ivava, ni vanua o butuka tu qori e qele tabu.
34 Au sa raica na nodra vakalolomataki na noqu tamata era tiko mai Ijipita, au rogoca tale ga na nodra vutugu,+ au sa lako sobu mai kina meu vakabulai ira. Ia qo lako mai, au na talai iko i Ijipita.’
35 O Mosese qo, o koya era sega ni via kila, era kaya: ‘O cei e lesi iko mo iliuliu, mo turaganilewa?’+ E tala mai na Kalou+ me iliuliu me veivakabulai tale ga ena veidusimaki ni agilosi e rairai vua ena kau vakavotona.
36 O koya sara ga qo e kauti ira yani+ ena nona cakava na cakacaka veivakurabuitaki kei na cakamana ena vanua o Ijipita,+ ena Wasa Damudamu,+ kei na vanua talasiga me 40 na yabaki.+
37 “O Mosese sara ga qo a kaya vei ira na luvei Isireli: ‘Ena vakatubura na Kalou e dua vei ira na tacimuni me parofita me vakataki au.’+
38 O koya qo e lewe ni ivavakoso ena vanua talasiga, a vosa vua+ na agilosi+ ena Ulu i Saineai, e tiko vata kei ira na tukada, a ciqoma tale ga na vosa bula ni Kalou qai vakadewataka vei keda.+
39 Era sega ni talairawarawa vua na tukada, ia era biligi koya tani,+ qai lesu na lomadra i Ijipita,+
40 Era kaya vei Eroni: ‘Cakava eso na kalou me liutaki keda. Nida sega ni kila se cava sa manati koya na Mosese qo, o koya a kauti keda mai na vanua o Ijipita.’+
41 Era sa qai cakava e dua na luvenibulumakau ena siga ya, era vakacabora kina na isoro, ra qai marautaka yani na weniligadra.+
42 Mani vakanadakui ira na Kalou qai vakalaiva mera qarava na matanisiga, na vula, kei na kalokalo ni lomalagi+ me vaka ga e volai ena nodra ivola na Parofita: ‘Kemuni na vuvale i Isireli, oni a sega ni vakacabora vei au na manumanu kei na isoro ena 40 na yabaki oni tiko kina ena vanua talasiga.
43 Oni vakaliuca ga na valelaca nei Moloke+ kei na nona kalokalo na kalou o Remifani, na ivakatakarakara oni bulia moni qarava. O koya gona, au na vakatalai kemuni tani me sivia na iyalayala kei Papiloni.’+
44 “Era cakava na tukada ena vanua talasiga na valelaca ni ivakadinadina, a vakarota vei Mosese me cakava me vaka ga na kena icakacaka e raica.+
45 Ia o ira na tukada era taura na ivotavota, era qai kauta yani na valelaca nira lako vata kei Josua ina nodra vanua na veimatanitu.+ A vakasavi ira na lewe ni veivanua qo na Kalou e matadra na tukada.+ E se tiko ga na valelaca me yacova na gauna i Tevita.
46 E vakadonui koya na Kalou, mani kerea me nona itavi me vakarautaka e dua na itikotiko ni Kalou i Jekope.+
47 Ia e qai tara na vale o Solomoni me nona.+
48 E sega ni tiko ena vale e tara ena liga o koya e Cecere Duadua,+ me vaka e kaya na parofita:
49 ‘E noqu itikotiko vakaturaga o lomalagi,+ na itutuniyavaqu o vuravura.+ Na vale vakacava oni na tara me noqu? e kaya o Jiova.* I vei na noqu ivakavakacegu?
50 Na ligaqu ga e cakava na ka kece qo.’+
51 “Ni yavu tamata domoqa, e sega ni cili na lomamuni kei na daligamuni! Oni beca tiko ga na yalo tabu me vakataki ira ga na tukamuni.+
52 Na parofita cava era a sega ni vakacacana na tukamuni?+ Era vakamatei ira era kacivaka voli na nona lako mai o koya na Yalododonu,+ o koya oni bukiveretaka, oni vakamatea tale ga.+
53 Oni ciqoma na Lawa era vakadewataka mai na agilosi,+ oni sega ga ni muria.”
54 Nira rogoca qo, dua na ka na ca ni lomadra kei na nodra katibati vua.
55 Ia e vakilai dina vei Sitiveni na veidusimaki ni yalo tabu. E tacake i lomalagi qai raica na lagilagi ni Kalou, e raici Jisu tale ga ni tucake tu ena ligaimatau ni Kalou,+
56 e kaya: “Au raica ni sa tadola na lomalagi, e tucake tale tu ga na Luve ni tamata+ ena ligaimatau ni Kalou.”+
57 Ni cavuta oti ya, era qolouvaki koya ena domodra kece, era tabonaka na daligadra ena ligadra ra qai sosovi koya yani.
58 Era kolotaki koya ina taudaku ni koro, ra qai vakaviriki koya ena vatu.+ O ira na ivakadinadina+ era qai mai biuta na nodra isulu e sau ena yava ni cauravou na yacana o Saula.+
59 Nira vakaviriki Sitiveni tiko ena vatu, e qai kerea: “Turaga Jisu, ni taura noqu bula.”*
60 E tekiduru qai kaci ena domolevu: “I Jiova,* ni kua ni cudruvi ira ena nodra ivalavala ca qo.”+ Ni cavuta oti ya sa qai moce, oya ni sa mate.
iVakamacala e ra
^ Kir., “me vaka na levu ni mawe ni yava.”
^ Se “peteriaki.”
^ Se “e sa vakaraitaki.”
^ Se “sa qai nanuma.”
^ Kir., “pneu’ma,” kena ibalebale na “igu ni bula.”
