Nodra Cakacaka na Yapositolo 4:1-37
4 Ni rau se vosa tiko o Pita kei Joni vei ira na lewenivanua, era sa lako yani vei rau na bete, na ivakatawa ni valenisoro, kei ira na Setoki.+
2 Dua na ka nodra cudru ni rau vakavulici ira tiko na lewenivanua na yapositolo rau qai vakamatatataka nona vakaturi mai na mate o Jisu.+
3 Era vesuki rau qai biuti rau ina valeniveivesu+ me yacova na siga tarava ni sa yakavi na vanua.
4 E levu era rogoca na vosa ya era vakabauta, na kedra iwiliwili na tagane e rauta ni 5,000.+
5 Ena siga tarava era soqoni vata yani i Jerusalemi o ira na veiliutaki, na qase, kei ira na vunivola,
6 o Anasa+ tale ga na iliuliu ni bete, o Kaiafa,+ o Joni, o Alekisada, kei ira kece na wekana na iliuliu ni bete.
7 Era biuti Pita kei Joni ena kedra maliwa ra qai tarogi rau: “Ena kaukaua i cei se yaca i cei drau cakava kina na ka qo?”
8 E qai kaya vei ira o Pita ni sa sobuti koya na yalo tabu:+
“Kemuni na veiliutaki kei kemuni na qase,
9 ke keirau mai vaqaqai nikua ena ka vinaka keirau cakava vua na tagane lokiloki qo,+ oni qai via kila tale ga se o cei e vakabula na tagane qo,
10 moni kila kece na tiko qo kei ira kece na Isireli, ena yaca ga i Jisu Karisito na kai Nasareci+ o koya oni vakamatea ena kau,+ ia e vakatura mai na mate na Kalou.+ Ena vukuna ga e tucake tu kina e matamuni na tagane qo ena bula vinaka.
11 Qo ‘na vatu oni a cata na matai, e sa mai ivakadei ni tutunivale.’+
12 Kena ikuri, e sega tale ni dua ena veivakabulai, ni sega tale ni dua na yaca+ e ruku i lomalagi e soli vei keda meda vakabulai kina.”+
13 Nira raica na vosa doudou i Pita kei Joni, era kila tale ga ni rau sega ni vuli vinaka sara qai tauvanua ga,+ dua na ka nodra kurabui. Era qai liaca ni rau dau tiko vata kei Jisu.+
14 Era vakaraici koya na tagane se qai vakabulai ga ni tucake vata tu kei rau,+ era sega sara ga ni tukuna rawa e dua na ka mera sabaya kina.+
15 Era mani vakarota ena valeniveilewai ni Sanadrini me ratou curu e tuba mera veivosaki vakataki ira,
16 era kaya: “Na cava meda cakava vei rau qo?+ Na ka levu erau cakava era sa kila kece na lewe i Jerusalemi,+ e sega ni rawa tale nida cakitaka.
17 Me kua ni tete na itukutuku qo vei ira na lewenivanua, meda vakarerei rau me rau kua tale ni qai vosa vua e dua ena yaca qo.”+
18 Era kacivi rau, ra vakaroti rau me rau kua tale ni vosa vua e dua se veivakavulici ena yaca i Jisu.
19 Ia erau sauma o Pita kei Joni: “Ke oni nanuma ni dodonu ena mata ni Kalou me keirau vakarorogo vei kemuni, me kua vua na Kalou, qori moni qai lewa.
20 Ia o keirau, keirau na sega ni galuvaka na ka keirau raica kei na ka keirau rogoca.”+
21 Era mani vosa tale vakaukaua vei rau, oti era qai sereki rau ni sega ni dua na yavu mera totogitaki rau kina. Era rerevaki ira tale ga na lewenivanua+ nira sa mai vakarokorokotaka kece na Kalou ena vuku ni ka e yaco ya.
22 Sa yabaki 40 vakacaca na tagane a caka vua na cakamana qo.
23 Ni rau sa sereki erau mani lesu vei ira na vo ni tisaipeli rau tukuna vei ira na ka era kaya vei rau na iliuliu ni bete kei ira na qase.
24 Nira rogoca ya era tabalaka na domodra vua na Kalou ena duavata, era kaya:
“Kemuni na Turaga Cecere Duadua, o kemuni oni bulia na lomalagi, na vuravura, na wasawasa, kei na ka kece era tu kina.+
25 Oni a vosa mai ena yalo tabu vua na tukai keimami o Tevita+ na nomuni dauveiqaravi, oni kaya: ‘Na cava era cudru kina na veimatanitu ra qai vakananuma na ka wale na lewenivanua?
26 Era sa tuvaivalu na tui kei vuravura ra qai soqoni vata na veiliutaki mera saqati Jiova* kei na nona lumuti.’*+
27 E sega ni lasu na vosa qori nira soqoni vata ena koro qo o Eroti* kei Ponitio Pailato,+ o ira na lewe ni veimatanitu, kei ira tale ga na Isireli, mera saqata na nomuni dauveiqaravi yalosavasava o Jisu, o koya oni lumuta,+
28 era vakayacora kina na ka oni sa lesia tu me yaco ena nomuni kaukaua kei na nomuni inaki.+
29 Ia qo Jiova,* ni raica na nodra veivakarerei, ni vakadoudoutaki keimami na nomuni dauveiqaravi me keimami tukuna na nomuni vosa,
30 ni oni dodoka na ligamuni me veivakabulai, moni cakava tale ga na cakamana kei na cakacaka veivakurabuitaki+ ena yaca i koya na nomuni dauveiqaravi yalosavasava o Jisu.”+
31 Nira masu oti,* e yavala na vanua era soqoni vata tiko kina, e sobuti ira kece na yalo tabu+ ra qai tukuna na vosa ni Kalou ena doudou.+
32 Kena ikuri, era lomavata qai yalovata na ilala levu era sa mai vakabauta, e sega ni dua vei ira e kaya ni ka e taukena e nona duadua ga, ia era wasea vata na ka kece. +
33 Ena kaukaua levu, eratou vunautaka voli na yapositolo na nona vakaturi mai na mate na Turaga o Jisu.+ Era qai vakalougatataki vakalevu ena loloma soli wale ni Kalou.
34 E sega ni dua vei ira me leqa ena dua na ka,+ ni o ira kece era taukena na tikiniqele se vale, era volitaka na ka era taukena ra qai kauta na kena isau,
35 qai lai biuta ena yavadratou na yapositolo.+ Eratou na vota me vaka na ka era gadreva.+
36 E dua na turaga na yacana o Josefa, eratou kilai koya tale ga na yapositolo me o Panapasa.+ (Na ibalebale ni yacana na “Luve ni Vakacegu”), e Livai o koya, e kai Saipurusi,
37 e taukena e dua na tikiniqele, e volitaka qai kauta na ilavo, e lai biuta sara ena yavadratou na yapositolo.+
