De dua o na lomaleqa, rarawa se sega ni levu nomu ilavo ni o vakacegui mai na nomu cakacaka. Dikeva mada qo eso na ivakavuvuli vakaivolatabu ena rawa ni vukei iko mo vosota.

•   Talaucaka na lomamu.

   Ka e kaya na iVolatabu: “Na itokani dina e loloma ena veigauna.”—Vosa Vakaibalebale 17:17.

   De dua o na rarawa, cudru se veilecayaki ni o vakacegui mai na nomu cakacaka. Era rawa ni vukei iko nomu vuvale kei ira nomu itokani voleka, ni o talaucaka vei ira na lomamu. Era rawa ni vakasalataki iko tale ga mo vaqara e dua tale nomu cakacaka.

•   Kua ni lomaocaoca vakasivia.

   Ka e kaya na iVolatabu: “Kua vakadua ni lomaocaocataka na siga nimataka, ni siga nimataka e tu vata kei na kena lomaocaoca.”—Maciu 6:34.

   E uqeti keda na iVolatabu meda tuvanaka rawa na ka meda cakava. (Vosa Vakaibalebale 21:5) E vakasalataki keda tale ga meda kua ni lomaocaocataka vakalevu na veigauna se bera mai. Eso na gauna eda dau leqataka tu na ka e sega sara ga ni yaco. Mo kauaitaka ga na siga yadua.

   E tu ena iVolatabu na ivakavuvuli yaga ena vukei iko mo walia kina na lomaocaoca. Mo kila eso tale na ka, wilika na ulutaga “Sala Mo Walia Kina na Lomaocaoca.”

•   Ke vinakati, cakava na veiveisau ena nomu vakayagataki ilavo.

   Ka e kaya na iVolatabu: “Au sa vulica . . . na ka meu cakava seu vutuniyau seu ligalala.”—Filipai 4:12.

   Yalorawarawa mo veisau. Kena ibalebale, ni o cakava qori o na sega ni vakayagataki ilavo vakasivia, o na bula ga ena ilavo o sa rawata tiko. Kua ni dinau vakalevu.—Vosa Vakaibalebale 22:7.

   Mo kila e levu tale na ka mo cakava ena veiveisau ena vakayagataki ilavo ena gauna qo, raica na ulutaga “Cava Mo Cakava ke Vakalailaitaki na Kemu iSau?”

•   Vakayagataka vinaka nomu gauna.

   Ka e kaya na iVolatabu: “Moni lewa vakayalomatua . . . , ni vakayagataka vinaka na nomuni gauna.”—Kolosa 4:5.

   Dina ni sa sega nomu ituvatuva ni cakacaka, ia mo dei ena nomu ituvatuva ni vakayagataki gauna. Qori ena vukei iko mo dau tuvatuvanaki vinaka, o na marau tale ga.

•   Yalorawarawa ni veisau.

   Ka e kaya na iVolatabu: “E yaga na cakacaka kaukaua kece.”—Vosa Vakaibalebale 14:23.

   Mo yalorawarawa ni ciqoma na cakacaka cava ga e soli vei iko. De dua o na cakava na cakacaka o nanuma ni sega ni yaga, se lailai kina na kemu isau.

•   Sasaga tiko ga.

   Ka e kaya na iVolatabu: “Mo kaburaka na nomu sorenikau ena mataka, me kua ni cegu na ligamu me yacova na yakavi, ni o na sega ni kila na kena ena tubu.”—Dauvunau 11:6.

   Vaqara cakacaka tiko ga. Tukuna vei ira eso tale ni o vaqara cakacaka tiko, me vakataki ira na wekamu, ira nomu veikilai, ira oni cakacaka vata tu i liu, kei ira oni tiko veitikivi. Taro vei ira na tabana ni cakacaka, rai ena niusipepa se na website e dau biu mai kina na vaqara cakacaka. Mo tu vakarau mo intaviu (interview) ena so na vanua ni cakacaka. Ni bera ni o kunea e dua na cakacaka, biuta rawa nomu ivola ni kere cakacaka.